॥ অথর্বশিখোপনিষত্ ॥
ওঙ্কারার্থতয়া ভাতং তুর্যোঙ্কারাগ্রভাসুরম্ ।
তুর্যতুর্যংত্রিপাদ্রামং স্বমাত্রং কলয়েঽন্বহম্ ॥
ওঁ ভদ্রং কর্ণেভিঃ শৃণুয়াম দেবাঃ । ভদ্রং পশ্যেমাক্ষভির্যজত্রাঃ ।
স্থিরৈরঙ্গৈস্তুষ্টুবাসস্তনূভির্ব্যশেম দেবহিতং য়দায়ুঃ ।
স্বস্তি ন ইন্দ্রো বৃদ্ধশ্রবাঃ । স্বস্তি নঃ পূষা বিশ্ববেদাঃ ।
স্বস্তি নস্তার্ক্ষ্যো অরিষ্টনেমিঃ । স্বস্তি নো বৃহস্পতির্দধাতু ॥
ওঁ শান্তিঃ শান্তিঃ শান্তিঃ ॥
ওঁ অথ হৈনং পৈপ্পলাদোঽঙ্গিরাঃ সনত্কুমারশ্চাথর্বণমুবাচ
ভগবন্কিমাদৌ প্রয়ুক্তং ধ্যানং ধ্যায়িতব্যং কিং তদ্ধ্যানং কো
বা ধ্যাতা কশ্চ ধ্যেয়ঃ ।
স এভ্যোথর্বা প্রত্যুবাচ ।
ওমিত্যেতদক্ষরমাদৌ প্রয়ুক্তং ধ্যানং ধ্যায়িতব্যমিত্যেতদক্ষরং
পরং ব্রহ্মাস্য পাদাশ্চত্বারো বেদাশ্চতুষ্পাদিদমক্ষরং পরং ব্রহ্ম ।
পূর্বাস্য মাত্রা পৃথিব্যকারঃ ঋগ্ভিরৃগ্বেদো ব্রহ্মা বসবো গায়ত্রী গার্হপত্যঃ ।
দ্বিতীয়ান্তরিক্ষং স উকারঃ স য়জুভির্যজুর্বেদো বিষ্ণুরুদ্রাস্ত্রিষ্টুব্দক্ষিণাগ্নিঃ ।
তৃতীয়ঃ দ্যৌঃ স মকারঃ স সামভিঃ সামবেদো রুদ্রা আদিত্যা জগত্যাহবনীয়ঃ ।
য়াবসানেঽস্য চতুর্থ্যর্ধমাত্রা সা সোমলোক ওঙ্কারঃ
সাথর্বণমন্ত্রৈরথর্ববেদঃ সংবর্তকোঽগ্নির্মরুতো
বিরাডেকর্ষির্ভাস্বতী স্মৃতা ।
প্রথমা রক্তপীতা মহদ্ব্রহ্ম দৈবত্যা ।
দ্বিতীয়া বিদ্যুমতী কৃষ্ণা বিষ্ণুদৈবত্যা ।
তৃতীয়া শুভাশুভা শুক্লা রুদ্রদৈবত্যা ।
য়াবাসানেঽস্য চতুর্থ্যর্ধমাত্রা সা বিদ্যুমতী সর্ববর্ণা পুরুষদৈবত্যা ।
স এষ হ্যোঙ্কারশ্চতুরক্ষরশ্চতুষ্পাদশ্চতুঃশিরশ্চতুর্থমাত্রঃ
স্থূলমেতদ্হ্রস্বদীর্ঘপ্লুত ইতি ॥
ওঁ ওঁ ওঁ ইতি ত্রিরুক্ত্বা চতুর্থঃ শান্ত আত্মাপ্লুতপ্রণবপ্রয়োগেণ
সমস্তমোমিতি প্রয়ুক্ত আত্মজ্যোতিঃ সকৃদাবর্ততে সকৃদুচ্চারিতমাত্রঃ
স এষ ঊর্ধ্বমন্নময়তীত্যোঙ্কারঃ ।
প্রাণান্সর্বান্প্রলীয়ত ইতি প্রলয়ঃ ।
প্রাণান্সর্বান্পরমাত্মনি প্রণাময়তীত্যেতস্মাত্প্রণবঃ ।
চতুর্থাবস্থিত ইতি সর্বদেববেদয়োনিঃ সর্ববাচ্যবস্তু প্রণবাত্মকম্ ॥ ১॥
দেবাশ্চেতি সংধত্তাং সর্বেভ্যো দুঃখভয়েভ্যঃ সংতারয়তীতি
তারণাত্তারঃ । সর্বে দেবাঃ সংবিশন্তীতি বিষ্ণুঃ । সর্বাণি
বৃহয়তীতি ব্রহ্মা । সর্বেভ্যোঽন্তস্থানেভ্যো ধ্যেয়েভ্যঃ
প্রদীপবত্প্রকাশয়তীতি প্রকাশঃ । প্রকাশেভ্যঃ সদোমিত্যন্তঃ শরীরে
বিদ্যুদ্বদ্দ্যোতয়তি মুহুর্মুহুরিতি বিদ্যুদ্বত্প্রতীয়াদ্দিশং দিশং ভিত্ত্বা
সর্বাংল্লোকান্ব্যাপ্নোতি ব্যাপয়তীতি ব্যাপনাদ্ব্যাপী মহাদেবঃ ॥ ২॥
পূর্বাস্য মাত্রা জাগর্তি জাগরিতং দ্বিতীয়া স্বপ্নং তৃতীয়া
সুষুপ্তিশ্চতুর্থী তুরীয়ং মাত্রা মাত্রাঃ প্রতিমাত্রাগতাঃ
সম্যক্সমস্তানপি পাদাঞ্জয়তীতি স্বয়ংপ্রকাশঃ স্বয়ং ব্রহ্ম
ভবতীত্যেষ সিদ্ধিকর এতস্মাদ্ধ্যানাদৌ প্রয়ুজ্যতে । সর্ব
করণোপসংহারত্বাদ্ধার্যধারণাদ্ব্রহ্ম তুরীয়ম্ । সর্বকরণানি
মনসি সম্প্রতিষ্ঠাপ্য ধ্যানং বিষ্ণুঃ প্রাণং মনসি সহ করণৈঃ
সম্প্রতিষ্ঠাপ্য ধ্যাতা রুদ্রঃ প্রাণং মনসি সহকরণৈর্নাদান্তে
পরমাত্মনি সম্প্রতিষ্ঠাপ্য ধ্যায়ীতেশানং প্রধ্যায়িতব্যং সর্বমিদং
ব্রহ্মবিষ্ণুরুদ্রেন্দ্রাস্তে সম্প্রসূয়ন্তে সর্বাণি চেন্দ্রিয়াণি সহ ভূতৈর্ন
কারণং কারণানাং ধ্যাতা কারণং তু ধ্যেয়ঃ সর্বৈশ্বর্যসম্পন্নঃ
শংভুরাকাশমধ্যে ধ্রুবং স্তব্ধ্বাধিকং ক্ষণমেকং ক্রতুশতস্যাপি
চতুঃসপ্তত্যা য়ত্ফলং তদবাপ্নোতি কৃত্স্নমোঙ্কারগতিং চ
সর্বধ্যানয়োগজ্ঞানানাং য়ত্ফলমোঙ্কারো বেদ পর ঈশো বা শিব একো
ধ্যেয়ঃ শিবংকরঃ সর্বমন্যত্পরিত্যজ্য সমস্তাথর্বশিখৈতামধীত্য
দ্বিজো গর্ভবাসাদ্বিমুক্তো বিমুচ্যত এতামধীত্য দ্বিজো গর্ভবাসাদ্বিমুক্তো
বিমুচ্যত ইত্যোসত্যমিত্যুপনিষত্ ॥ ৩॥
ওঁ ভদ্রং কর্ণেভিরিতি শান্তিঃ ॥
॥ ইতি অথর্ববেদীয় অথর্বশিখোপনিষত্সমাপ্তা ॥
