অন্নপূর্ণোপনিষত্

 অন্নপূর্ণোপনিষত্ ॥

সর্বাপহ্নবসংসিদ্ধব্রহ্মমাত্রতয়োজ্জ্বলম্ ।
ত্রৈপদং শ্রীরামতত্ত্বং স্বমাত্রমিতি ভাবয়ে ॥

ওঁ ভদ্রং কর্ণেভিঃ শৃণুয়াম দেবাঃ ॥ ভদ্রং পশ্যেমাক্ষভির্যজত্রাঃ ॥

স্থিরৈরঙ্গৈস্তুষ্টুবা⁠সস্তনূভিঃ ॥ ব্যশেম দেবহিতং য়দায়ুঃ ॥

স্বস্তি ন ইন্দ্রো বৃদ্ধশ্রবাঃ ॥ স্বস্তি নঃ পূষা বিশ্ববেদাঃ ॥

স্বস্তি নস্তার্ক্ষ্যো অরিষ্টনেমিঃ ॥ স্বস্তি নো বৃহস্পতির্দধাতু ॥

ওঁ শান্তিঃ শান্তিঃ শান্তিঃ ॥

হরিঃ ওঁ নিদাঘো নাম য়োগীন্দ্র ঋভুং ব্রহ্মবিদাং বরম্ ।
প্রণম্য দণ্ডবদ্ভূমাবুত্থায় স পুনর্মুনিঃ ॥ ১॥

আত্মতত্ত্বমনুব্রূহীত্যেবং পপ্রচ্ছ সাদরম্ ।
কয়োপাসনয়া ব্রহ্মন্নীদৃশং প্রাপ্তবানসি ॥ ২॥

তাং মে ব্রূহি মহাবিদ্যাং মোক্ষসাম্রাজ্যদায়িনীম্ ।
নিদাঘ ত্বং কৃতার্থোঽসি শৃণু বিদ্যাং সনাতনীম্ ॥ ৩॥

য়স্যা বিজ্ঞানমাত্রেণ জীবন্মুক্তো ভবিষ্যসি ।
মূলশৃঙ্গাটমধ্যস্থা বিন্দুনাদকলাশ্রয়া ॥ ৪॥

নিত্যানন্দা নিরাধারা বিখ্যাতা বিলসত্কচা ।
বিষ্টপেশী মহালক্ষ্মীঃ কামস্তারো নতিস্তথা ॥ ৫॥

ভগবত্যন্নপূর্ণেতি মমাভিলষিতং ততঃ ।
অন্নং দেহি ততঃ স্বাহা মন্ত্রসারেতি বিশ্রুতা ॥ ৬॥

সপ্তবিংশতি বর্ণাত্মা য়োগিনীগণসেবিতা ॥ ৭॥

ঐং হ্রীং সৌং শ্রীং ক্লীমোন্নমো ভগবত্যন্নপূর্ণে
মমাভিলষিতমন্নং দেহি স্বাহা ।
ইতি পিত্রোপদিষ্টোঽস্মি তদাদিনিয়মঃ স্থিতঃ ।
কৃতবান্স্বাশ্রমাচারো মন্ত্রানুষ্ঠানমন্বহম্ ॥ ৮॥

এবং গতে বহুদিনে প্রাদুরাসীন্মমাগ্রতঃ ।
অন্নপূর্ণা বিশালাক্ষী স্ময়মানমুখাম্বুজা ॥ ৯॥

তাং দৃষ্ট্বা দণ্ডবদ্ভূমৌ নত্বা প্রাঞ্জলিরাস্থিতঃ ।
অহো বত্স কৃতার্থোঽসি বরং বরয় মা চিরম্ ॥ ১০॥

এবমুক্তো বিশালাক্ষ্যা ময়োক্তং মুনিপুঙ্গব ।
আত্মতত্ত্বং মনসি মে প্রাদুর্ভবতু পার্বতি ॥ ১১॥

তথৈবাস্থিতি মামুক্ত্বা তত্রৈবান্তরধীয়ত ।
তদা মে মতিরুত্পন্না জগদ্বৈচিত্র্যদর্শনাত্ ॥ ১২॥

ভ্রমঃ পঞ্চবিধো ভাতি তদেবেহ সমুচ্যতে ।
জীবেশ্বরৌ ভিন্নরূপাবিতি প্রাথমিকো ভ্রমঃ ॥ ১২॥

আত্মনিষ্ঠং কর্তৃগুণং বাস্তবং বা দ্বিতীয়কঃ ।
শরীরত্রয়সংয়ুক্তজীবঃ সঙ্গী তৃতীয়কঃ ॥ ১৩॥

জগত্কারণরূপস্য বিকারিত্বং চতুর্থকঃ ।
কারণাদ্ভিন্নজগতঃ সত্যত্বং পঞ্চমো ভ্রমঃ ।
পঞ্চভ্রমনিবৃত্তিশ্চ তদা স্ফুরতি চেতসি ॥ ১৫॥

বিম্বপ্রতিবিম্বদর্শনেন ভেদভ্রমো নিবৃত্তঃ ।
স্ফটিকলোহিতদর্শনেন পারমার্থিককর্তৃত্বভ্রমো নিবৃত্তঃ ।
ঘটমঠাকাশদর্শনেন সঙ্গীতিভ্রমো নিবৃত্তঃ ।
রজ্জুসর্পদর্শনেন কারণাদ্ভিন্নজগতঃ সত্যত্বভ্রমো নিবৃত্তঃ ।
কনকরুচকদর্শনেন বিকারিত্বভ্রমো নিবৃত্তঃ ।
তদাপ্রভৃতি মচ্চিত্তং ব্রহ্মাকারমভূত্স্বয়ম্ ।
নিদাঘ ত্বমপীত্থং হি তত্ত্বজ্ঞানমবাপ্নুহি ॥ ১৬॥

নিদাঘঃ প্রণতো ভূত্বা ঋভুং পপ্রচ্ছ সাদরম্ ।
ব্রূহি মে শ্রদ্দধানায় ব্রহ্মবিদ্যামনুত্তমাম্ ॥ ১৭॥

তথেত্যাহ ঋভুঃ প্রীতস্তত্ত্বজ্ঞাং বদামি তে ।
মহাকর্তা মহাভোক্তা মহাত্যাগী ভবানঘ ।
স্বস্বরূপানুসন্ধানমেবং কৃত্বা সুখী ভব ॥ ১৮॥

নিত্যোদিতং বিমলমাদ্যমনতরূপং
     ব্রহ্মাস্মি নেতরকলাকলনং হি কিংচিত্ ।
ইত্যেব ভাবয় নিরঞ্জনতামুপেতো
     নির্বাণমেহি সকলামলশান্তবৃত্তিঃ ॥ ১৯॥

য়দিদং দৃশ্যতে কিংচিত্তত্তন্নাস্তীতি ভাবয় ।
য়থা গন্ধর্বনগরং য়থা বারি মরুস্থলে ॥ ২০॥

য়ত্তু নো দৃশ্যতে কিংচিদ্যন্নু কিংচিদিব স্থিতম্ ।
মনঃষষ্ঠেন্দ্রিয়াতীতং তন্ময়ো ভব বৈ মুনে ॥ ২১॥

অবিনাশি চিদাকাশং সর্বাত্মকমখণ্ডিতম্ ।
নীরন্ধ্রং ভূরিবাশেষং তদস্মীতি বিভাবয় ॥ ২২॥

য়দা সংক্ষীয়তে চিত্তমভাবাত্যন্তভাবনাত্ ।
চিত্সামান্যস্বরূপস্য সত্তাসামান্যতা তদা ॥ ২৩॥

নূনং চৈত্যাংশরহিতা চিদ্যদাত্মনি লীয়তে ।
অসদ্রূপবদত্যচ্ছা সত্তাসামান্যতা তদা ॥ ২৪॥

দৃষ্টিরেষা হি পরমা সদেহাদেহয়োঃ সমা ।
মুক্তয়োঃ সংভবত্যেব তুর্যাতীতপদাভিধা ॥ ২৫॥

ব্যুত্থিতস্য ভবত্যেষা সমাধিস্থস্য চানঘ ।
জ্ঞস্য কেবলমজ্ঞস্য ন ভবত্যেব বোধজা ।
অনানন্দসমানন্দমুগ্ধমুগ্ধমুখদ্যুতিঃ ॥ ২৬॥

চিরকালপরিক্ষীণমননাদিপরিভ্রমঃ ।
পদমাসাদ্যতে পুণ্যং প্রজ্ঞয়ৈবৈকয়া তথা ॥ ২৭॥

ইমং গুণসমাহারমনাত্মত্বেন পশ্যতঃ ।
অন্তঃশীতলয়া য়াসৌ সমাধিরিতি কথ্যতে ॥ ২৮॥

অবাসনং স্থিরং প্রোক্তং মনোধ্যানং তদেব চ ।
তদেব কেবলীভানং শান্ততৈব চ তত্সদা ॥ ২৯॥

তনুবাসনমত্যুচ্চৈঃ পদায়োদ্যতমুচ্যতে ।
অবাসগং মনোঽকর্তৃপদং তস্মাদবাপ্যতে ॥ ৩০॥

ঘনবাসনমেতত্তু চেতঃকর্তৃত্বভাবনম্ ।
সর্বদুঃখপ্রদং তস্মাদ্বাসনাং তনুতাং নয়েত্ ॥ ৩১॥

চেতসা সম্পরিত্যজ্য সর্বভাবাত্মভাবনাম্ ।
সর্বমাকাশতামেতি নিত্যমন্তর্মুখস্থিতেঃ ॥ ৩২॥

য়থা বিপণগা লোকা বিহরন্তোঽপ্যসত্সমাঃ ।
অসংবন্ধাত্তথা জ্ঞস্য গ্রামোঽপি বিপিনোপমঃ ॥ ৩৩॥

অন্তর্মুখতয়া নিত্যং সুপ্তো বুদ্ধো ব্রজন্পঠন্ ।
পুরং জনপদং গ্রামমরণ্যমিব পশ্যতি ॥ ৩৪॥

অন্তঃশীতলতায়াং তু লব্ধায়াং শীতলং জগত্ ।
অন্তস্তৃষ্ণোপতপ্তানাং দাবদাহময়ং জগত্ ॥ ৩৫॥

ভবত্যখিলজন্তূনাং য়দন্তস্তদ্বহিঃ স্থিতম্ ॥ ৩৬॥

য়স্ত্বাত্মরতিরেবান্তঃ কুর্বন্কর্মেন্দ্রিয়ৈঃ ক্রিয়াঃ ।
ন বশো হর্ষশোকাভ্যাং স সমাহিত উচ্যতে ॥ ৩৭॥

আত্মবত্সর্বভূতানি পরদ্রব্যাণি লোষ্ঠবত্ ।
স্বভাবাদেব ন ভয়াদ্যঃ পশ্যতি স পশ্যতি ॥ ৩৮॥

অদ্যৈব মৃতিরায়াতু কল্পান্তনিচয়েন বা ।
নাসৌ কলঙ্কমাপ্নোতি হেম পঙ্কগতং য়থা ॥ ৩৯॥

কোঽহং কথমিদং কিং বা কথং মরণজন্মনী ।
বিচারয়ান্তরে বেত্থং মহত্তত্ফলমেষ্যসি ॥ ৪০॥

বিচারেণ পরিজ্ঞাতস্বভাবস্য সতস্তব ।
মনঃ স্বরূপমুত্সৃজ্য শমমেষ্যতি বিজ্বরম্ ॥ ৪১॥

বিজ্বরত্বং গতং চেতস্তব সংসারবৃত্তিষু ।
ন নিমজ্জতি তদ্ব্রহ্মন্গোষ্পদেষ্বিব বারণঃ ॥ ৪২॥

কৃপণং তু মনো ব্রহ্মন্গোষ্পদেঽপি নিমজ্জতি ।
কার্যে গোষ্পদতোয়েঽপি বিশীর্ণো মশকো য়থা ॥ ৪৩॥

য়াবদ্যাবন্মুনিশ্রেষ্ঠ স্বয়ং সংতজ্যতেঽখিলম্ ।
তাবত্তাবত্পরালোকঃ পরমাত্মৈব শিষ্যতে ॥ ৪৪॥

য়াবত্সর্বং ন সংত্যক্তং তাবদাত্মা ন লভ্যতে ।
সর্ববস্তুপরিত্যাগে শেষ আত্মেতি কথ্যতে ॥ ৪৫॥

আত্মাবলোকনার্থং তু তস্মাত্সর্বং পরিত্যজেত্ ।
সর্বং সংত্যজ্য দূরেণ য়চ্ছিষ্টং তন্ময়ো ভব ॥ ৪৬॥

সর্বং কিংচিদিদং দৃশ্যং দৃশ্যতে য়জ্জগদ্গতম্ ।
চিন্নিষ্পন্দাংশমাত্রং তন্নান্যত্কিংচন শাশ্বতম্ ॥ ৪৭॥

সমাহিতা নিত্যতৃপ্তা য়থাভূতার্থদর্শিনী ।
ব্রহ্মন্সমাধিশব্দেন পরা প্রজ্ঞোচ্যতে বুধৈঃ ॥ ৪৮॥

অক্ষুব্ধা নিরহংকারা দ্বন্দ্বেষ্বননুপাতিনী ।
প্রোক্তা সমাধিশব্দেন মেরোঃ স্থিরতরা স্থিতিঃ ॥ ৪৯॥

নিশ্চিতা বিগতাভীষ্টা হেয়োপদেয়বর্জিতা ।
ব্রহ্মন্সমাধিশব্দেন পরিপূর্ণা মনোগতিঃ ॥ ৫০॥

কেবলং চিত্প্রকাশাংশকল্পিতা স্থিরতাং গতা ।
তুর্যা সা প্রাপ্যতে দৃষ্টির্মহদ্ভির্বেদবিত্তমৈঃ ॥ ৫১॥

অদূরগতসাদৃশ্যা সুষুপ্তস্যোপলক্ষ্যতে ।
মনোহংকারবিলয়ে সর্বভাবান্তরস্থিতা ॥ ৫২॥

সমুদেতি পরানন্দা য়া তনুঃ পারমেশ্বরী ।
মনসৈব মনশ্ছিত্ত্বা সা স্বয়ং লভ্যতে গতিঃ ॥ ৫৩॥

তদনু বিষয়বাসনাবিনাশ-
     স্তদনু শুভঃ পরমঃ স্ফুটপ্রকাশঃ ।
তদনু চ সমতাবশাত্স্বরূপে
     পরিণমনং মহতামচিন্ত্যরূপম্ ॥ ৫৪॥

অখিলমিদমনন্তমনন্তমাত্মতত্ত্বং
     দৃঢপরিণামিনি চেতসি স্থিতোঽন্তঃ ।
বহিরুপশমিতে চরাচরাত্মা
     স্বয়মনুভূয়ত এব দেবদেবঃ ॥ ৫৫॥

অসক্তং নির্মলং চিত্তং য়ুক্তং সংসার্যবিস্ফুটম্ ।
সক্তং তু দীর্ঘতপসা মুক্তমপ্যতিবদ্ধবত্ ॥ ৫৬॥

অন্তঃসংসক্তিনির্মুক্তো জীবো মধুরবৃত্তিমান্ ।
বহিঃ কুর্বন্নকুর্বন্বা কর্তা ভোক্তা ন হি ক্বচিত্ ॥ ৫৭॥

ইতি প্রথমোঽধ্যায়ঃ ॥ ১॥

নিদাঘ উবাচ ॥

সঙ্গঃ কীদৃশ ইত্যুক্তঃ কশ্চ বন্ধায় দেহিনাম্ ।
কশ্চ মোক্ষায় কথিতঃ কথং ত্বেষ চিকিত্স্যতে ॥ ১॥

দেহদেহিবিভাগৈকপরিত্যাগেন ভাবনা ।
দেহমাত্রে হি বিশ্বাসঃ সঙ্গো বন্ধায় কথ্যতে ॥ ২॥

সর্বমাত্মেদমত্রাহং কিং বাঞ্ছামি ত্যজামি কিম্ ।
ইত্যসঙ্গস্থিতিং বিদ্ধি জীবন্মুক্ততনুস্থিতাম্ ॥ ৩॥

নাহমস্মি ন চান্যোস্তি ন চায়ং ন চ নেতরঃ ।
সোঽসঙ্গ ইতি সম্প্রোক্তো ব্রহ্মাস্মীত্যেব সর্বদা ॥ ৪॥

নাভিনন্দতি নৈষ্কর্ম্যং ন কর্মস্বনুষজ্জতে ।
সুসমো য়ঃ পরিত্যাগী সোঽসংসক্ত ইতি স্মৃতঃ ॥ ৫॥

সর্বকর্মফলাদীনাং মনসৈব ন কর্মণা ।
নিপুণো য়ঃ পরিত্যাগী সোঽসংসক্ত ইতি স্মৃতঃ ॥ ৬॥

অসংকল্পেন সকলাশ্চেষ্টা নানা বিজৃংভিতাঃ ।
চিকিত্সিতা ভবন্তীহ শ্রেয়ঃ সম্পাদয়ন্তি হি ॥ ৭॥

ন সক্তমিহ চেষ্টাসু ন চিন্তাসু ন বস্তুষু ।
ন গমাগমচেষ্টাসু ন কালকলনাসু চ ॥ ৮॥

কেবলং চিতি বিশ্রম্য কিংচিচ্চৈত্যাবলংব্যপি ।
সর্বত্র নীরসমিহ তিষ্ঠত্যাত্মরসং মনঃ ॥ ৯॥

ব্যবহারমিদং সর্বং মা করোতু করোতু বা ।
অকুর্বন্বাপি কুর্বন্বা জীবঃ স্বাত্মরতিক্রিয়ঃ ॥ ১০॥

অথবা তমপি ত্যক্ত্বা চৈত্যাংশং শান্তচিদ্ঘনঃ ।
জীবস্তিষ্ঠতি সংশান্তো জ্বলন্মণিরিবাত্মনি ॥ ১১॥

চিত্তে চৈত্যদশাহীনে য়া স্থিতিঃ ক্ষীণচেতসাম্ ।
সোচ্যতে শান্তকলনা জাগ্রত্যেব সুষুপ্ততা ॥ ১২॥

এষা নিদাঘ সৌষুপ্তস্থিতিরভ্যাসয়োগতঃ ।
প্রৌঢা সতী তুরীয়েতি কথিতা তত্ত্বকোবিদৈঃ ॥ ১৩॥

অস্যাং তুরীয়াবস্থায়াং স্থিতিং প্রাপ্যাবিনাশিনীম্ ।
আনন্দৈকান্তশীলত্বাদনানন্দপদং গতঃ ॥ ১৪॥

অনানন্দমহানন্দকালাতীতস্ততোঽপি হি ।
মুক্ত ইত্যুচ্যতে য়োগী তুর্যাতীতপদং গতঃ ॥ ১৫॥

পরিগলিতসমস্তজন্মপাশঃ
     সকলবিলীনতমোময়াভিমানঃ ।
পরমরসময়ীং পরাত্মসত্তাং
     জলগতসৈন্ধবখণ্ডবন্মহাত্মা ॥ ১৬॥

জডাজডদৃশোর্মধ্যে য়ত্তত্ত্বং পারমার্থিকম্ ।
অনুভূতিময়ং তস্মাত্সারং ব্রহ্মেতি কথ্যতে ॥ ১৭॥

দৃশ্যসংবলিতো বন্ধস্তন্মুক্তৌ মুক্তিরুচ্যতে ।
দ্রব্যদর্শনসংবন্ধে য়ানুভূতিরনাময়া ॥ ১৮॥

তামবষ্টভ্য তিষ্ঠ ত্বং সৌষুপ্তীং ভজতে স্থিতিম্ ।
সৈব তুর্যত্বমাপ্নোতি তস্যাং দৃষ্টিং স্থিরাং কুরু ॥ ১৯॥

আত্মা স্থূলো ন চৈবাণুর্ন প্রত্যক্ষো ন চেতরঃ ।
ন চেতনো ন চ জডো ন চৈবাসন্ন সন্ময়ঃ ॥ ২০॥

নাহং নান্যো ন চৈবৈকো ন চানেকোঽদ্বয়োঽব্যয়ঃ ।
য়দীদং দৃশ্যতাং প্রাপ্তং মনঃ সর্বেন্দ্রিয়াস্পদম্ ॥ ২১॥

দৃশ্যদর্শনসংবন্ধে য়ত্সুখং পারমার্থিকম্ ।
তদতীতং পদং য়স্মাত্তন্ন কিংচিদিবৈব তত্ ॥ ২২॥

ন মোক্ষো নভসঃ পৃষ্ঠে ন পাতালে ন ভূতলে ।
সর্বাশাসংক্ষয়ে চেতঃক্ষয়ো মোক্ষ ইতীষ্যতে ॥ ২৩॥

মোক্ষো মেঽস্ত্বিতি চিন্তান্তর্জাতা চেদুত্থিতং মনঃ ।
মননোত্থে মনস্যৈষ বন্ধঃ সাংসারিকো দৃঢঃ ॥ ২৪॥

আত্মন্যতীতে সর্বস্মাত্সর্বরূপেঽথ বা ততে ।
কো বন্ধঃ কশ্চ বা মোক্ষো নির্মূলং মননং কুরু ॥ ২৫॥

অধ্যাত্মরতিরাশান্তঃ পূর্ণপাবনমানসঃ ।
প্রাপ্তানুত্তমবিশ্রান্তির্ন কিংচিদিহ বাঞ্ছতি ॥ ২৬॥

সর্বাধিষ্ঠানসন্মাত্রে নির্বিকল্পে চিদাত্মনি ।
য়ো জীবতি গতস্নেহঃ স জীবন্মুক্ত উচ্যতে ॥ ২৭॥

নাপেক্ষতে ভবিষ্যচ্চ বর্তমানে ন তিষ্ঠতি ।
ন সংস্মরত্যতীতং চ সর্বমেব করোতি চ ॥ ২৮॥

অনুবন্ধপরে জন্তাবসংসর্গমনাঃ সদা ।
ভক্তে ভক্তসমাচরঃ শঠে শঠ ইব স্থিতঃ ॥ ২৯॥

বালো বালেষু বৃদ্ধেষু বৃদ্ধো ধীরেষু ধৈর্যবান্ ।
য়ুবা য়ৌবনবৃত্তেষু দুঃখিতেষু সুদুঃখধীঃ ॥ ৩০॥

ধীরধীরুদিতানন্দঃ পেশলঃ পুণ্যকীর্তনঃ ।
প্রাজ্ঞঃ প্রসন্নমধুরো দৈন্যাদপগতাশয়ঃ ॥ ৩১॥

অভ্যাসেন পরিস্পন্দে প্রাণানাং ক্ষয়মাগতে ।
মনঃ প্রশমমায়াতি নির্বাণমবশিষ্যতে ॥ ৩২॥

য়তো বাচো নিবর্তন্তে বিকল্পকলনান্বিতাঃ ।
বিকল্পসংক্ষয়াজ্জন্তোঃ পদং তদবশিষ্যতে ॥ ৩৩॥

অনাদ্যন্তাবভাসাত্মা পরমাত্মৈব বিদ্যতে ।
ইত্যেতন্নিশ্চয়ং স্ফারং সম্যগ্জ্ঞানং বিদুর্বুধাঃ ॥ ৩৪॥

য়থাভূতার্থদর্শিত্বমেতাবদ্ভুবনত্রয়ে ।
য়দাত্মৈব জগত্সর্বমিতি নিশ্চিত্য পূর্ণতা ॥ ৩৫॥

সর্বমাত্মৈব কৌ দৃষ্টৌ ভাবাভাবৌ ক্ব বা স্থিতৌ ।
ক্ব বন্ধমোক্ষকলনে ব্রহ্মৈবেদং বিজৃম্ভতে ॥ ৩৬॥

সর্বমেকং পরং ব্যোম কো মোক্ষঃ কস্য বন্ধতা ।
ব্রহ্মেদং বৃংহিতাকারং বৃহদ্বৃহদবস্থিতম্ ॥ ৩৭॥

দূরাদস্তমিতদ্বিত্বং ভবাত্মৈব ত্বমাত্মনা ।
সম্যগালোকিতে রূপে কাষ্ঠপাষাণবাসসাম্ ॥ ৩৮॥

মনাগপি ন ভেদোঽস্তি ক্বাসি সংকল্পনোন্মুখঃ ।
আদাবন্তে চ সংশান্তস্বরূপমবিনাশি য়ত্ ॥ ৩৯॥

বস্তূনামাত্মনশ্চৈতত্তন্ময়ো ভব সর্বদা ।
দ্বৈতাদ্বৈতসমুদ্ভেদৈর্জরামরণবিভ্রমৈঃ ॥ ৪০॥

স্ফুরত্যাত্মভিরাত্মৈব চিত্তৈরব্ধীব বীচিভিঃ ।
আপত্করঞ্জপরশুং পরায়া নির্বৃতেঃ পদম্ ॥ ৪১॥

শুদ্ধমাত্মানমালিঙ্গ্য নিত্যমন্তস্থয়া ধিয়া ।
য়ঃ স্থিতস্তং ক আত্মেহ ভোগো বাধয়িতুং ক্ষমঃ ॥ ৪২॥

কৃতস্ফারবিচারস্য মনোভোগাদয়োঽরয়ঃ ।
মনাগপি ন ভিন্দন্তি শৈলং মন্দানিলা ইব ॥ ৪৩॥

নানাত্বমস্তি কলনাসু ন বস্তুতোঽন্ত-
     র্নানাবিধাসু সরসীব জলাদিবান্যত্ ।
ইত্যেকনিশ্চয়ময়ঃ পুরুষো বিমুক্ত
     ইত্যুচ্যতে সমবলোকিতসম্যগর্থঃ ॥ ৪৪॥

ইতি দ্বিতীয়োঽধ্যায়ঃ ॥ ২॥

বিদেহমুক্তেঃ কিং রূপং তদ্বান্কো বা মহামুনিঃ ।
কং য়োগং সমুপস্থায় প্রাপ্তবান্পরমং পদম্ ॥ ১॥

সুমেরোর্বসুধাপীঠে মাণ্ডব্যো নাম বৈ মুনিঃ ।
কৌণ্ডিন্যাত্তত্ত্বমাস্থায় জীবন্মুক্তো ভবত্যসৌ ॥ ২॥

জীবন্মুক্তিদশাং প্রাপ্য কদাচিদ্ব্রহ্মবিত্তমঃ ।
সর্বেন্দ্রিয়াণি সংহর্তুং মনশ্চক্রে মহামুনিঃ ॥ ৩॥

বদ্ধপদ্মাসনস্তিষ্ঠন্নর্ধোন্মীলিতলোচনঃ ।
বাহ্যানাভ্যান্তরাংশ্চৈব স্পর্শান্পরিহরঞ্ছনৈঃ ॥ ৪॥

ততঃ স্বমনসঃ স্থৈর্যং মনসা বিগতৈনসা ।
অহো নু চঞ্চলমিদং প্রত্যাহৃতমপি স্ফুটম্ ॥ ৫॥

পটাদ্ঘটমুপায়াতি ঘটাচ্ছকটমুত্কটম্ ।
চিত্তমর্থেষু চরতি পাদপেষ্বিব মর্কটঃ ॥ ৬॥

পঞ্চ দ্বারাণি মনসা চক্ষুরাদীন্যমূন্যলম্ ।
বুদ্ধীন্দ্রিয়াভিধানানি তান্যেবালোকয়াম্যহম্ ॥ ৭॥

হন্তেন্দ্রিয়গণা য়ূয়ং ত্যজতাকুলতাং শনৈঃ ।
চিদাত্মা ভগবান্সর্বসাক্ষিত্বেন স্থিতোঽস্ম্যহম্ ॥ ৮॥

তেনাত্মনা বহুজ্ঞেন নির্জ্ঞাতাশ্চক্ষুরাদয়ঃ ।
পরিনির্বামি শান্তোঽস্মি দিষ্ট্যাস্মি বিগতজ্বরঃ ॥ ৯॥

স্বাত্মন্যেবাবতিষ্ঠেঽহং তুর্যরূপপদেঽনিশম্ ।
অন্তরেব শশামাস্য ক্রমেণ প্রাণসন্ততিঃ ॥ ১০॥

জ্বালাজালপরিস্পন্দো দগ্ধেন্ধন ইবানলঃ ।
তদিতোঽস্তং গত ইব হ্যস্তং গত ইবোদিতঃ ॥ ১১॥

সমঃ সমরসাভাসস্তিষ্ঠামি স্বচ্ছতাং গতঃ ।
প্রবুদ্ধোঽপি সুষুপ্তিস্থঃ সুষুপ্তিস্থঃ প্রবুদ্ধবান্ ॥ ১২॥

তুর্যমালম্ব্য কায়ান্তস্তিষ্ঠামি স্তম্ভিতস্থিতিঃ ।
সবাহ্যাভ্যন্তরান্ভাবান্স্থূলান্সূক্ষ্মতরানপি ॥ ১৩॥

ত্রৈলোক্যসংভবাংস্ত্যক্ত্বা সংকল্পৈকবিনির্মিতান্ ।
সহ প্রণবপর্যন্তদীর্ঘনিঃস্বনতন্তুনা ॥ ১৪॥

জহাবিন্দ্রিয়তন্মাত্রজালং খগ ইবানলঃ ।
ততোঽঙ্গসংবিদং স্বচ্ছাং প্রতিভাসমুপাগতাম্ ॥ ১৫॥

সদ্যোজাতশিশুজ্ঞানং প্রাপ্তবান্মুনিপুঙ্গবঃ ।
জহৌ চিত্তং চৈত্যদশাং স্পন্দশক্তিমিবানিলঃ ॥ ১৬॥

চিত্সামান্যমথাসাদ্য সত্তামাত্রাত্মকং ততঃ ।
সুষুপ্তপদমালম্ব্য তস্থৌ গিরিরিবাচলঃ ॥ ১৭॥

সুষুপ্তস্থৈর্যমাসাদ্য তুর্যরূপমুপায়য়ৌ ।
নিরানন্দোঽপি সানন্দঃ সচ্চাসচ্চ বভূব সঃ ॥ ১৮॥

ততস্তু সংবভূবাসৌ য়দ্গিরামপ্যগোচরঃ ।
য়চ্ছূন্যবাদিনাং শূন্যং ব্রহ্ম ব্রহ্মবিদাং চ য়ত্ ॥ ১৯॥

বিজ্ঞানমাত্রং বিজ্ঞানবিদাং য়দমলাত্মকম্ ।
পুরুষঃ সাংখ্যদৃষ্টীনামীশ্বরো য়োগবাদিনাম্ ॥ ২০॥

শিবঃ শৈবাগমস্থানাং কালঃ কালৈকবাদিনাম্ ।
য়ত্সর্বশাস্ত্রসিদ্ধান্তং য়ত্সর্বহৃদয়ানুগম্ ॥ ২১॥

য়ত্সর্বং সর্বগং বস্তু য়ত্তত্ত্বং তদসৌ স্থিতঃ ।
য়দনুক্তমনিষ্পন্দং দীপকং তেজসামপি ॥ ২২॥

স্বানুভূত্যৈকমানং চ য়ত্তত্ত্বং তদসৌ স্থিতঃ ।
য়দেকং চাপ্যনেকং চ সাঞ্জনং চ নিরঞ্জনম্ ।
য়ত্সর্বং চাপ্যসর্বং চ য়ত্তত্ত্বং তদসু স্থিতঃ ॥ ২৩॥

অজমমরমনাদ্যমাদ্যমেকং
     পদমমলং সকলং চ নিষ্কলং চ ।
স্থিত ইতি স তদা নভঃস্বরূপা-
     দপিবিমলস্থিতিরীশ্বরঃ ক্ষণেন ॥ ২৪॥

ইতি তৃতীয়োঽধ্যায়ঃ ॥ ৩॥

জীবন্মুক্তস্য কিং লক্ষ্ম হ্যাকাশগমনাদিকম্ ।
তথা চেন্মুনিশার্দূল তত্র নৈব প্রলক্ষ্যতে ॥ ১॥

অনাত্মবিদমুক্তোঽপি নভোবিহরণাদিকম্ ।
দ্রব্যমন্ত্রক্রিয়াকালশক্ত্যাপ্নোত্যেব স দ্বিজঃ ॥২॥

নাত্মজ্ঞস্যৈষ বিষয় আত্মজ্ঞো হ্যাত্মমাত্রদৃক্ ।
আত্মনাত্মনি সংতৃপ্তো নাবিদ্যামনুধাবতি ॥ ৩॥

য়ে য়ে ভাবাঃ স্থিতা লোকে তানবিদ্যাময়ান্বিদুঃ ।
ত্যক্তাবিদ্যো মহায়োগী কথং তেষু নিমজ্জতি ॥ ৪॥

য়স্তু মূঢোঽল্পবুদ্ধির্বা সিদ্ধিজালানি বাঞ্ছতি ।
সিদ্ধিসাধনৈর্যোগৈস্তানি সাধয়তি ক্রমাত্ ॥ ৫॥

দ্রব্যমন্ত্রক্রিয়াকালয়ুক্তয়ঃ সাধুসিদ্ধিদাঃ ।
পরমাত্মপদপ্রাপ্তৌ নোপকুর্বন্তি কাশ্চন ॥ ৬॥

য়স্যেচ্ছা বিদ্যতে কাচিত্সা সিদ্ধিং সাধয়ত্যহো ।
নিরিচ্ছোঃ পরিপূর্ণস্য নেচ্ছা সংভবতি ক্বচিত্ ॥ ৭॥

সর্বেচ্ছাজালসংজ্ঞান্তাবাত্মলাভো ভবেন্মুনে ।
স কথং সিদ্ধিজালানি নূনং বাঞ্ছন্ত্যচিত্তকঃ ॥ ৮॥

অপি শীতরুচাবর্কে সুতীক্ষ্ণেঽপীন্দুমণ্ডলে ।
অপ্যধঃ প্রসরত্যগ্নৌ জীবন্মুক্তো ন বিস্ময়ী ॥ ৯॥

অধিষ্ঠানে পরে তত্ত্বে কল্পিতা রজ্জুসর্পবত্ ।
কল্পিতাশ্চর্যজালেষু নাভ্যুদেতি কুতূহলম্ ॥ ১০॥

য়ে হি বিজ্ঞাতবিজ্ঞেয়া বীতরাগা মহাধিয়ঃ ।
বিচ্ছিন্নগ্রন্থয়ঃ সর্বে তে স্বতন্ত্রাস্তনৌ স্থিতঃ ॥ ১১
সুখদুঃখদশাধীরং সাম্যান্ন প্রোদ্ধরন্তি য়ম্ ।
নিশ্বাসা ইব শৈলেন্দ্রং চিত্তং তস্য মৃতং বিদুঃ ॥ ১২॥

আপত্কার্পণ্যমুত্সাহো মদো মান্দ্যং মহোত্সবঃ ।
য়ং নয়ন্তি ন বৈরূপ্যং তস্য নষ্টং মনো বিদুঃ ॥ ১৩॥

দ্বিবিধচিত্তনাশোঽস্তি সরূপোঽরূপ এব চ ।
জীবন্মুক্তৌ সরূপঃ স্যাদরূপো দেহমুক্তিগঃ ॥ ১৪॥

চিত্তসত্তেহ দুঃখায় চিত্তনাশঃ সুখায় চ ।
চিত্তসত্তং ক্ষয়ং নীত্বা চিত্তং নাশমুপানয়েত্ ॥ ১৫॥

মনস্তাং মূঢতাং বিদ্ধি য়দা নশ্যতি সানঘ ।
চিত্তনাশাভিধানং হি তত্স্বরূপমিতীরিতম্ ॥ ১৬॥

মৈত্র্যাদিভির্গুণৈর্যুক্তং ভবত্যুত্তমবাসনম্ ।
ভূয়ো জন্মবিনির্মুক্তং জীবন্মুক্তস্য তন্মনঃ ॥ ১৭॥

সরূপোঽসৌ মনোনাশো জীবন্মুক্তস্য বিদ্যতে ।
নিদাঘাঽরূপনাশস্তু বর্ততে দেহমুক্তিকে ॥ ১৮॥

বিদেহমুক্ত এবাসৌ বিদ্যতে নিষ্কলাত্মকঃ ।
সমগ্রাগ্র্যগুণাধারমপি সত্ত্বং প্রলীয়তে ॥ ১৯॥

বিদেহমুক্তৌ বিমলে পদে পরমপাবনে ।
বিদেহমুক্তিবিষয়ে তস্মিন্সত্ত্বক্ষয়াত্মকে ॥ ২০॥

চিত্তনাশে বিরূপাখ্যে ন কিংচিদিহ বিদ্যতে ।
ন গুণা নাগুণাস্তত্র ন শ্রীর্নাশ্রীর্ন লোকতা ॥ ২১॥

ন চোদয়ো নাস্তময়ো ন হর্ষামর্ষসংবিদঃ ।
ন তেজো ন তমঃ কিংচিন্ন সন্ধ্যাদিনরাত্রয়ঃ ।
ন সত্তাপি ন চাসত্তা ন চ মধ্যং হি তত্পদম্ ॥ ২২॥

য়ে হি পারং গতা বুদ্ধেঃ সংসারাডম্বরস্য চ ।
তেষাং তদাস্পদং স্ফারং পবনানামিবাম্বরম্ ॥ ২৩॥

সংশান্তদুঃখমজডাত্মকমেকসুপ্ত-
     মানন্দমন্থরমপেতরজস্তমো য়ত্ ।
আকাশকোশতনবোঽতনবো মহান্ত-
     স্তস্মিন্পদে গলিতচিত্তলবা ভবন্তি ॥ ২৪॥

হে নিদাঘ মহাপ্রাজ্ঞ নির্বাসনমনা ভব ।
বলাচ্চেতঃ সমাধায় নির্বিকল্পমনা ভব ॥ ২৫॥

য়জ্জগদ্ভাসকং ভানং নিত্যং ভাতি স্বতঃ স্ফুরত্ ।
স এব জগতঃ সাক্ষী সর্বাত্মা বিমলাকৃতিঃ ॥ ২৬॥

প্রতিষ্ঠা সর্বভূতানাং প্রজ্ঞানঘনলক্ষণঃ ।
তদ্বিদ্যাবিষয়ং ব্রহ্ম সত্যজ্ঞানসুখাদ্বনম্ ॥ ২৭॥

একং ব্রহ্মাহমস্মীতি কৃতকৃত্যো ভবেন্মুনিঃ ॥ ২৮॥

সর্বাধিষ্ঠানমদ্বন্দ্বং পরং ব্রহ্ম সনাতনম্ ।
সচ্চিদানন্দরূপং তদবাঙ্মনসগোচরম্ ॥ ২৯॥

ন তত্র চন্দ্রার্কবপুঃ প্রকাশতে
     ন বান্তি বাতঃ সকলাশ্চ দেবতাঃ ।
স এব দেবঃ কৃতভাবভূতঃ
     স্বয়ং বিশুদ্ধো বিরজঃ প্রকাশতে ॥ ৩০॥

ভিদ্যতে হৃদয়গ্রন্থিশ্ছিদ্যন্তে সর্বসংশয়াঃ ।
ক্ষীয়ন্তে চাস্য কর্মাণি তস্মিন্দৃষ্টে পরাবরে ॥ ৩১॥

দ্বৌ সুপর্ণৌ শরীরেঽস্মিঞ্জীবেশাখ্যৌ সহ স্থিতৌ ।
তয়োর্জীবঃ ফলং ভুঙ্ক্তে কর্মণো ন মহেশ্বরঃ ॥ ৩২॥

কেবলং সাক্ষিরূপেণ বিনা ভোগো মহেশ্বরঃ ।
প্রকাশতে স্বয়ং ভেদঃ কল্পিতো মায়য়া তয়োঃ ।
চিচ্চিদাকারতো ভিন্না ন ভিন্না চিত্ত্বহানিতঃ ॥ ৩৩॥

তর্কতশ্চ প্রমাণাচ্চ চিদেকত্বব্যবস্থিতেঃ ।
চিদেকত্বপরিজ্ঞানে ন শোচতি ন মুহ্যতি ॥ ৩৪॥

অধিষ্ঠানং সমস্তস্য জগতঃ সত্যচিদ্ঘনম্ ।
অহমস্মীতি নিশ্চিত্য বীতশোকো ভবেন্মুনিঃ ॥ ৩৫॥

স্বশরীরে স্বয়ংজ্যোতিস্বরূপং সর্বসাক্ষিণম্ ।
ক্ষীণদোষাঃ প্রপশ্যন্তি নেতরে মায়য়াবৃতাঃ ॥ ৩৬॥

তমেব ধীরো বিজ্ঞায় প্রজ্ঞাং কুর্বীত ব্রাহ্মণঃ ।
নানুধ্যায়াদ্বহূঞ্ছব্দান্বাচো বিগ্লাপনং হি তত্ ॥ ৩৭॥

বালেনৈব হি তিষ্ঠাসেন্নির্বিদ্য ব্রহ্মবেদনম্ ।
ব্রহ্মবিদ্যাং চ বাল্যং চ নির্বিদ্য মুনিরাত্মবান্ ॥ ৩৮॥

অন্তর্লীনসমারম্ভঃ শুভাশুভমহাঙ্কুরম্ ।
সংসৃতিব্রততের্বীজং শরীরং বিদ্ধি ভৌতিকম্ ॥ ৩৯॥

ভাবাভাবদশাকোশং দুঃখরত্নসমুদ্গকম্ ।
বীজমস্য শরীরস্য চিত্তমাশাবশানুগম্ ॥ ৪০॥

দ্বে বীজে চিত্তবৃক্ষস্য বৃত্তিব্রততিধারিণঃ ।
একং প্রাণপরিস্পন্দো দ্বিতীয়ো দৃঢভাবনা ॥ ৪১॥

য়দা প্রস্পন্দন্তে প্রাণো নাডীসংস্পর্শনোদ্যতঃ ।
তদা সংবেদনময়ং চিত্তমাশু প্রজায়তে ॥ ৪২॥

সা হি সর্বগতা সংবিত্প্রাণস্পন্দেন বোধ্যতে ।
সংবিত্সংরোধনং শ্রেয়ঃ প্রাণাদিস্পন্দনং বরম্ ॥ ৪৩॥

য়োগিনশ্চিত্তশান্ত্যর্থং কুর্বন্তি প্রাণরোধনম্ ।
প্রাণায়ামৈস্তথা ধ্যানৈঃ প্রয়োগৈর্যুক্তিকল্পিতৈঃ ॥ ৪৪॥

চিত্তোপশান্তিফলদং পরমং বিদ্ধি কারণম্ ।
সুখদং সংবিদঃ স্বাস্থ্যং প্রাণসংরোধনং বিদুঃ ॥ ৪৫॥

দৃঢভাবনয়া ত্যক্তপূর্বাপরবিচারণম্ ।
য়দাদানং পদার্থস্য বাসনা সা প্রকীর্তিতা ॥ ৪৬॥

য়দা ন ভাব্যতে কিংচিদ্ধেয়োপাদেয়রূপি য়ত্ ।
স্থীয়তে সকলং ত্যক্ত্বা তদা চিত্তং ন জায়তে ॥ ৪৭॥

অবাসনত্বাত্সততং য়দা ন মনুতে মনঃ ।
অমনস্তা তদোদেতি পরমোপশমপ্রদা ॥ ৪৮॥

য়দা ন ভাব্যতে ভাবঃ ক্বচিজ্জগতি বস্তুনি ।
তদা হৃদম্বরে শূন্যে কথং চিত্তং প্রজায়তে ॥ ৪৯॥

য়দভাবনমাস্থায় য়দভাবস্য ভাবনম্ ।
য়দ্যথা বস্তুদর্শিত্বং তদচিত্তত্বমুচ্যতে ॥ ৫০॥

সর্বমন্তঃ পরিত্যজ্য শীতলাশয়বর্তি য়ত্ ।
বৃত্তিস্থমপি তচ্চিত্তমসদ্রূপমুদাহৃতম্ ॥ ৫১॥

ভ্রষ্টবীজোপমা য়েষাং পুনর্জননবর্জিতা ।
বাসনারসনাহীনা জীবন্মুক্তা হি তে স্মৃতাঃ ॥ ৫২॥

সত্ত্বরূপপরিপ্রাপ্তচিত্তাস্তে জ্ঞানপারগাঃ ।
অচিত্তা ইতি কথ্যন্তে দেহান্তে ব্যোমরূপিণঃ ॥ ৫৩॥

সংবেদ্যসম্পরিত্যাগাত্প্রাণস্পন্দনবাসনে ।
সমূলং নশ্যতঃ ক্ষিপ্রং মূলচ্ছেদাদিব দ্রুমঃ ॥ ৫৪॥

পূর্বদৃষ্টমদৃষ্টং বা য়দস্যাঃ প্রতিভাসতে ।
সংবিদস্তত্প্রয়ত্নেন মার্জনীয়ং বিজানতা ॥ ৫৫॥

তদমার্জনমাত্রং হি মহাসংসারতাং গতম্ ।
তত্প্রমার্জনমাত্রং তু মোক্ষ ইত্যভিধীয়তে ॥ ৫৬॥

অজডো গলিতানন্দস্ত্যক্তসংবেদনো ভব ॥ ৫৭॥

সংবিদ্বস্তুদশালম্বঃ সা য়স্যেহ ন বিদ্যতে ।
সোঽসংবিদজডঃ প্রোক্তঃ কুর্বন্কার্যশতান্যপি ॥ ৫৮॥

সংবেদ্যেন হৃদাকাশে মনাগপি ন লিপ্যতে ।
য়স্যাসাবজডা সংবিজ্জীবন্মুক্তঃ স কথ্যতে ॥ ৫৯॥

য়দা ন ভাব্যতে কিংচিন্নির্বাসনতয়াত্মনি ।
বালমূকাদিবিজ্ঞানমিব চ স্থীয়তে স্থিরম্ ॥ ৬০॥

তদা জাড্যবিনির্মুক্তমসংবেদনমাততম্ ।
আশ্রিতং ভবতি প্রাজ্ঞো য়স্মাদ্ভূয়ো ন লিপ্যতে ॥ ৬১॥

সমস্তা বাসনাস্ত্যক্ত্বা নির্বিকল্পসমাধিতঃ ।
তন্ময়ত্বাদনাদ্যন্তে তদপ্যন্তর্বিলীয়তে ॥ ৬২॥

তিষ্ঠন্গচ্ছন্স্পৃশঞ্জিঘ্রন্নপি তল্লেপবর্জিতঃ ।
অজডো গলিতানন্দস্ত্যক্তসংবেদনঃ সুখী ॥ ৬৩॥

এতাং দৃষ্টিমবষ্টভ্য কষ্টচেষ্টায়ুতোঽপি সন্ ।
তরেদ্দুঃখাম্বুধেঃ পারমপারগুণসাগরঃ ॥ ৬৪॥

বিশেষং সম্পরিত্যজ্য সন্মাত্রং য়দলেপকম্ ।
একরূপং মহারূপং সত্তায়াস্তত্পদং বিদুঃ ॥ ৬৫॥

কালসত্তা কলাসত্তা বস্তুসত্তেয়মিত্যপি ।
বিভাগকলনাং ত্যক্ত্বা সন্মাত্রৈকপরো ভব ॥ ৬৬॥

সত্তাসামান্যমেবৈকং ভাবয়ন্কেবলং বিভুঃ ।
পরিপূর্ণঃ পরানন্দি তিষ্ঠাপূরিতদিগ্ভরঃ ॥ ৬৭॥

সত্তাসামান্যপর্যন্তে য়ত্তত্কলনয়োজ্ঝিতম্ ।
পদমাদ্যমনাদ্যন্তং তস্য বীজং ন বিদ্যতে ॥ ৬৮॥

তত্র সংলীয়তে সংবিন্নির্বিকল্পং চ তিষ্ঠতি ।
ভূয়ো ন বর্ততে দুঃখে তত্র লব্ধপদঃ পুমান্ ॥ ৬৯॥

তদ্ধেতুঃ সর্বভূতানাং তস্য হেতুর্ন বিদ্যতে ।
স সারঃ সর্বসারাণাং তস্মাত্সারো ন বিদ্যতে ॥ ৭০॥

তস্মিংশ্চিদ্দর্পণে স্ফারে সমস্তা বস্তুদৃষ্টয়ঃ ।
ইমাস্তাঃ প্রতিবিম্বন্তি সরসীব তটদ্রুমাঃ ॥ ৭১॥

তদমলমরজং তদাত্মতত্ত্বং
     তদবগতাবুপশান্তিমেতি চেতঃ ।
অবগতবিগতৈকতত্স্বরূপো
     ভবভয়মুক্তপদোঽসি সম্যগেব ॥ ৭২॥

এতেষাং দুঃখবীজানাং প্রোক্তং য়দ্যন্ময়োত্তরম্ ।
তস্য তস্য প্রয়োগেণ শীঘ্রং তত্প্রাপ্যতে পদম্ ॥ ৭৩॥

সত্তাসামান্যকোটিস্থে দ্রাগিত্যেব পদে য়দি ।
পৌরুষেণ প্রয়ত্নেন বলাত্সংত্যজ্য বাসনাম্ ॥ ৭৪॥

স্থিতিং বধ্নাসি তত্ত্বজ্ঞ ক্ষণমপ্যক্ষয়াত্মিকাম্ ।
ক্ষণেঽস্মিন্নেব তত্সাধু পদমাসাদয়স্যলম্ ॥৭৫॥

সত্তাসামান্যরূপে বা করোষি স্থিতিমাদরাত্ ।
তত্কিংচিদধিকেনেহ য়ত্নেনাপ্নোষি তত্পদম্ ॥ ৭৬॥

সংবিত্তত্ত্বে কৃতধ্যানো নিদাঘ য়দি তিষ্ঠসি ।
তদ্যত্নেনাধিকেনোচ্চৈরাসাদয়সি তত্পদম্ ॥ ৭৭॥

বাসনাসম্পরিত্যাগে য়দি য়ত্নং করোষি ভোঃ ।
য়াবদ্বিলীনং ন মনো ন তাবদ্বাসনাক্ষয়ঃ ॥ ৭৮॥

ন ক্ষীণা বাসনা য়াবচ্চিত্তং তাবন্ন শাম্যতি ।
য়াবন্ন তত্ত্ববিজ্ঞানং তাবচ্চিত্তশমঃ কুতঃ ॥ ৭৯॥

য়াবন্ন চিত্তোপশমো ন তাবত্তত্ত্ববেদনম্ ।
য়াবন্ন বাসনানাশস্তাবত্তত্ত্বাগমঃ কুতঃ ।
য়াবন্ন তত্ত্বসম্প্রাপ্তির্ন তাবদ্বাসনক্ষয়ঃ ॥ ৮০॥

তত্ত্বজ্ঞানং মনোনাশো বাসনাক্ষয় এব চ ।
মিথঃ কারণতাং গত্বা দুঃসাধানি স্থিতান্যতঃ ॥ ৮১॥

ভোগেচ্ছাং দূরতস্ত্যক্ত্বা ত্রয়মেতত্সমাচর ॥ ৮২॥

বাসনাক্ষয়বিজ্ঞানমনোনাশা মহামতে ।
সমকালং চিরাভ্যস্তা ভবন্তি ফলদা মতাঃ ॥ ৮৩॥

ত্রিভিরেভিঃ সমভ্যস্তৈর্হৃদয়গ্রন্থয়ো দৃঢাঃ ।
নিঃশেষমেব ত্রুট্যন্তি বিসচ্ছেদাদ্গুণা ইব ॥ ৮৪॥

বাসনাসম্পরিত্যাগসমং প্রাণনিরোধনম্ ।
বিদুস্তত্ত্ববিদস্তস্মাত্তদপ্যেবং সমাহরেত্ ॥ ৮৫॥

বাসনাসম্পরিত্যাগাচ্চিত্তং গচ্ছত্যচিত্ততাম্ ।
প্রাণস্পন্দনিরোধাচ্চ য়থেচ্ছসি তথা কুরু ॥ ৮৬॥

প্রাণায়ামদৃঢাধ্যাসৈর্যুক্ত্যা চ গুরুদত্তয়া ।
আসনাশনয়োগেন প্রাণস্পন্দো নিরুধ্যতে ॥ ৮৭॥

নিঃসঙ্গব্যবহারত্বাদ্ভবভাবনবর্জনাত্ ।
শরীরনাশদর্শিত্বাদ্বাসনা ন প্রবর্ততে ॥ ৮৮॥

য়ঃ প্রাণপবনস্পন্দশ্চিত্তস্পন্দঃ স এব হি ।
প্রাণস্পন্দজয়ে য়ত্নঃ কর্তব্যো ধীমতোচ্চকৈঃ ॥ ৮৯॥

ন শক্যতে মনো জেতুং বিনা য়ুক্তিমনিন্দিতাম্ ।
শুদ্ধাং সংবিদমাশ্রিত্যবীতরাগঃ স্থিরো ভব ॥ ৯০॥

সংবেদ্যবর্জিতমনুত্তমমাদ্যমেকং
     সংবিদত্পদং বিকলনং কলয়ন্মহাত্মন্ ।
হৃদ্যেব তিষ্ঠ কলনারহিতঃ ক্রিয়াং তু
     কুর্বন্নকর্তৃপদমেত্য শমোদিতশ্রীঃ ॥ ৯১॥

মনাগপি বিচারেণ চেতসঃ স্বস্য নিগ্রহঃ ।
পুরুষেণ কৃতো য়েন তেনাপ্তং জন্মনঃ ফলম্ ॥ ৯২॥

ইতি চতুর্থোঽধ্যায়ঃ ॥ ৪॥

গচ্ছতস্তিষ্ঠতো বাপি জাগ্রতঃ স্বপতোঽপি বা ।
ন বিচারপরং চেতো য়স্যাসৌ মৃত উচ্যতে ॥ ১॥

সম্যগ্জ্ঞানসমালোকঃ পুমাঽজ্ঞেয়সমঃ স্বয়ম্ ।
ন বিভেতি ন চাদত্তে বৈবশ্যং ন চ দীনতাম্ ॥ ২॥

অপবিত্রমপথ্যং চ বিষসংসর্গদূষিতম্ ।
ভুক্তং জরয়তি জ্ঞানী ক্লিন্নং নষ্ঠং চ মৃষ্টবত্ ॥ ৩॥

সঞ্ণ্গত্যাগং বিদুর্মোক্ষং সঙ্গত্যাগাদজন্মতা ।
সঙ্গং ত্যজ ত্বং ভাবানাং জীবন্মুক্তো ভবানঘ ॥ ৪॥

ভাবাভাবে পদার্থানাং হর্ষামর্ষবিকারদা ।
মলিনা বাসনা য়ৈষা সাঽসঙ্গ ইতি কথ্যতে ॥ ৫॥

জীবন্মুক্তশরীরাণামপুনর্জন্মকারিণী ।
মুক্তা হর্ষবিষাদাভ্যাং শুদ্ধা ভবতি বাসনা ॥ ৬॥

দুঃখৈর্ন গ্লানিমায়াসি হৃদি হৃষ্যসি নো সুখৈঃ ।
আশাবৈবশ্যমুত্সৃজ্য নিদাঘাঽসঙ্গতাং ব্রজ ॥ ৭॥

দিক্কালাদ্যনবচ্ছিন্নমদৃষ্টোভয়কোটিকম্ ।
চিন্মাত্রমক্ষয়ং শান্তমেকং ব্রহ্মাস্মি নেতরত্ ॥ ৮॥

ইতি মত্বাহমিত্যন্তর্মুক্তামুক্তবপুঃ পুমান্ ।
একরূপঃ প্রশান্তাত্মা মৌনী স্বাত্মসুখো ভব ॥ ৯॥

নাস্তি চিত্তং ন চাবিদ্যা ন মনো ন চ জীবকঃ ।
ব্রহ্মৈবৈকমনাদ্যন্তমব্ধিবত্প্রবিজৃম্ভতে ॥ ১০॥

দেহে য়াবদহংভাবো দৃশ্যেঽস্মিন্যাবদাত্মতা ।
য়াবন্মমেদমিত্যাস্থা তাবচ্চিত্তাদিবিভ্রমঃ ॥ ১১॥

অন্তর্মুখতয়া সর্বং চিদ্বহ্নৌ ত্রিজগত্তৃণম্ ।
জুহ্বন্তোঽন্তর্নিবর্তন্তে মুনে চিত্তাদিবিভ্রমাঃ ॥ ১২॥

চিদাত্মাস্মি নিরংশোঽস্মি পরাপরবিবর্জিতঃ ।
রূপং স্মরন্নিজং স্ফারং মা স্মৃত্যা সংমিতো ভব ॥ ১৩॥

অধ্যাত্মশাস্ত্রমন্ত্রেণ তৃষ্ণাবিষবিষূচিকা ।
ক্ষীয়তে ভাবিতেনান্তঃ শরদা মিহিকা য়থা ॥ ১৪॥

পরিজ্ঞায় পরিত্যাগো বাসানানং য় উত্তমঃ ।
সত্তাসামান্যরূপত্বাত্তত্কৈবল্যপদং বিদুঃ ॥ ১৫॥

য়ন্নাস্তি বাসনা লীনা তত্সুষুপ্তং ন সিদ্ধয়ে ।
নির্বীজা বাসনা য়ত্র তত্তুর্যং সিদ্ধিদং স্মৃতম্ ॥ ১৬॥

বাসনায়াস্তথা বহ্নেরৃণব্যাধিদ্বিষামপি ।
স্নেহবৈরবিষাণ চ শেষঃ স্বল্পোঽপি বাধতে ॥ ১৭॥

নির্দগ্ধবাসনাবীজঃ সত্তাসামান্যরূপবান্ ।
সদেহো বা বিদেহো বা ন ভূয়ো দুঃখভাগ্ভবেত্ ॥ ১৮॥

এতাবদেবাবিদ্যাত্বং নেদং ব্রহ্মেতি নিশ্চয়ঃ ।
এষ এব ক্ষয়স্তস্যা ব্রহ্মেদমিতি নিশ্চয়ঃ ॥ ১৯॥

ব্রহ্ম চিদ্ব্রহ্ম ভুবনং ব্রহ্ম ভূতপরম্পরা ।
ব্রহ্মাহং ব্রহ্ম চিচ্ছত্রুর্ব্রহ্ম চিন্মিত্রবান্ধবাঃ ॥ ২০॥

ব্রহ্মৈব সর্বমিত্যেব ভাবিতে ব্রহ্ম বৈ পুমান্ ।
সর্বত্রাবস্থিতং শান্তং চিদ্ব্রহ্মেত্যনুভূয়তে ॥ ২১॥

অসংস্কৃতাধ্বগালোকে মনস্যন্যত্র সংস্থিতে ।
য়া প্রতীতিরনাগসকা তচ্চিদ্ব্রহ্মাস্মি সর্বগম্ ॥ ২২॥

প্রশান্তসর্বসংকল্পং বিগতাখিলকৌতুকম্ ।
বিগতাশেষসংরংভং চিদাত্মানং সমাশ্রয় ॥ ২৩॥

এবং পূর্ণধিয়ো ধীরাঃ সমা নীরাগচেতসঃ ।
ন নন্দন্তি ন নিন্দন্তি জীবিতং মরণং তথা ॥ ২৪॥

প্রাণোঽয়মনিশং ব্রহ্মস্পন্দশক্তিঃ সদাগতিঃ ।
সবাহ্যাভ্যন্তরে দেহেপ্রাণোঽসাবূর্ধ্বগঃ স্থিতঃ ॥ ২৫॥

অপানোঽপ্যনিশং ব্রহ্মস্পন্দশক্তিঃ সদাগতিঃ ।
সবাহ্যাভ্যন্তরে দেহে অপানোঽয়মবাক্স্থিতঃ ॥ ২৬॥

জাগ্রতঃ স্বপতশ্চৈব প্রাণায়ামোঽয়মুত্তমঃ ।
প্রবর্ততে হ্যভিজ্ঞস্য তং তাবচ্ছ্রেয়সে শৃণু ॥ ২৭॥

দ্বাদশাঙ্গুলপর্যন্তং বাহ্যমাক্রমতাং ততঃ ।
প্রাণাঙ্গনামা সংস্পর্শো য়ঃ স পূরক উচ্যতে ॥ ২৮॥

অপানশ্চন্দ্রমা দেহমাপ্যায়য়তি সুব্রত ।
প্রাণঃ সূর্যোঽগ্নিরথ বা পচত্যনত্রিদং বপুঃ ॥ ২৯॥

প্রাণক্ষয়সমীপস্থমপানোদয়কোটিগম্ ।
অপানপ্রাণয়োরৈক্যং চিদাত্মানং সমাশ্রয় ॥ ৩০॥

অপানোঽস্তংগতো য়ত্র প্রাণো নাভ্যুদিতঃ ক্ষণম্ ।
কলাকলঙ্করহিতং তচ্চিত্তত্ত্বং সমাশ্রয় ॥ ৩১॥

নাপানোঽস্তংগতো য়ত্র প্রাণশ্চাস্তমুপাগতঃ ।
নাসাগ্রগমনাবর্তং তচ্চিত্তত্ত্বমুপাশ্রয় ॥ ৩২॥

আভাসমাত্রমেবেদং ন সনাসজ্জগত্ত্রয়ম্ ।
ইত্যন্যকলনাত্যাগং সম্যগ্জ্ঞানং বিদুর্বুধাঃ ॥ ৩৩॥

আভাসমাত্রকং ব্রহ্মংশ্চিত্তদর্শকলঙ্কিতম্ ।
ততস্তদপি সংত্যজ্য নিরাভাসো ভবোত্তম ॥৩৪॥

ভয়প্রদমকল্যাণং ধৈর্যসর্বস্বহারিণম্ ।
মনঃপিশাচমুত্সার্য য়োঽসি সোঽসি স্থিরো ভব ॥ ৩৫॥

চিদ্ব্যোমেব কিলাস্তীহ পরাপরবিবর্জিতম্ ।
সর্বত্রাসংভবচ্চৈত্যং য়ত্কল্পান্তেঽবশিষ্যতে ॥ ৩৬॥

বাঞ্ছাক্ষণে তু য়া তুষ্টিস্তত্র বাঞ্ছৈব কারণম্ ।
তুষ্টিস্ত্বতুষ্টিপর্যন্তা তস্মাদ্বাঞ্ছাং পরিত্যজ ॥ ৩৭॥

আশা য়াতু নিরাশাত্বমভাবং য়াতু ভাবনা ।
অমনস্ত্বং মনো য়াতু তবাসঙ্গেন জীবতঃ ॥ ৩৮॥

বাসনারহিতৈরন্তরিন্দ্রিয়ৈরাহরন্ক্রিয়া ।
ন বিকারমবাপ্নোষি খবত্ক্ষোভশতৈরপি ॥ ৩৯॥

চিত্তোন্মেষনিমেষাভ্যাং সংসারপ্রলয়োদয়ৌ ।
বাসনাপ্রাণসংরোধমনুন্মেষং মনঃ কুরু ॥ ৪০॥

প্রাণোন্মেষনিমেষাভ্যাং সংসৃতেঃ প্রলয়োদয়ৌ ।
তমভ্যাসপ্রয়োগাভ্যামুন্মেষরহিতং কুরু ॥ ৪১॥

মৌর্খ্যোন্মেষনিমেষাভ্যাং কর্মণাং প্রলয়োদয়ৌ ।
তদ্বিলীনং কুরু বলাদ্গুরুশাস্ত্রার্থসংগমৈঃ ॥ ৪২॥

অসংবিত্স্পন্দমাত্রেণ য়াতি চিত্তমচিত্ততাম্ ।
প্রাণানাং বা নিরোধেন তদেব পরমং পদম্ ॥ ৪৩॥

দৃশ্যদর্শনসংবন্ধে য়ত্সুখং পারমার্থিকম্ ।
তদন্তৈকান্তসংবিত্ত্যা ব্রহ্মদৃষ্ট্যাবলোকয় ॥ ৪৪॥

য়ত্র নাভ্যুদিতং চিত্তং তদ্বৈ সুখমকৃত্রিমম্ ।
ক্ষয়াতিশয়নির্মুক্তং নোদেতি ন চ শাম্যতি ॥ ৪৫॥

য়স্য চিত্তং ন চিত্তাখ্যং চিত্তং চিত্তত্ত্বমেব হি ।
তদেব তুর্যাবস্থায়ং তুর্যাতীতং ভবত্যতঃ ॥ ৪৬॥

সংন্যস্তসর্বসংকল্পঃ সমঃ শান্তমনা মুনিঃ ।
সংন্যাসয়োগয়ুক্তাত্মা জ্ঞানবান্মোক্ষবান্ভব ॥ ৪৭॥

সর্বসংকল্পসংশান্তং প্রশান্তঘনবাসনম্ ।
ন কিংচিদ্ভাবনাকারং য়ত্তদ্ব্রহ্ম পরং বিদুঃ ॥ ৪৮॥

সম্যগ্জ্ঞানাবরোধেন নিত্যমেকসমাধিনা ।
সাংখ্য এবাববুদ্ধা য়ে তে সাংখ্যা য়োগিনঃ পরে ॥ ৪৯॥

প্রাণাদ্যনিলসংশান্তৌ য়ুক্ত্যা য়ে পদমাগতাঃ ।
অনাময়মনাদ্যন্তং তে স্মৃতা য়োগয়োগিনঃ ॥ ৫০॥

উপাদেয়ং তু সর্বেষাং শাতং পদমকৃত্রিমম্ ।
একার্থাভ্যসনং প্রাণরোধশ্চেতঃ পরিক্ষয়ঃ ॥ ৫১॥

একস্মিন্নেব সংসিদ্ধে সংসিদ্ধ্যন্তি পরস্পরম্ ।
অবিনাভাবিনী নিত্যং জন্তূনাং প্রাণচেতসী ॥ ৫২॥

আধারাধেয়বচ্চৈতে একভাবে বিনশ্যতঃ ।
কুরুতঃ স্ববিনাশেন কার্যং মোক্ষাখ্যমুত্তমম্ ॥ ৫৩॥

সর্বমেতদ্ধিয়া ত্যক্ত্বা য়দি তিষ্ঠসি নিশ্চলঃ ।
তদাহংকারবিলয়ে ত্বমেব পরমং পদম্ ॥ ৫৪॥

মহাচিদেকৈবেহাস্তি মহাসত্তেতি য়োচ্যতে ।
নিষ্কলংকা সমা শুদ্ধা নিরহংকাররূপিণী ॥ ৫৫॥

সকৃদ্বিভাতা বিমলা নিত্যোদয়বতী সমা ।
সা ব্রহ্ম পরমাত্মেতি নামভিঃ পরিগীয়তে ॥ ৫৬॥

সৈবাহমিতি নিশ্চিত্য নিদাঘ কৃতকৃত্যবান্ ।
ন ভূতং ন ভবিষ্যচ্চ চিন্তয়ামি কদাচন ॥ ৫৭॥

দৃষ্টিমালম্ব্য তিষ্ঠামি বর্তমানামিহাত্মনা ।
ইদমদ্য ময়া লব্ধমিদং প্রাপ্স্যামি সুন্দরম্ ॥ ৫৮॥

ন স্তৌমি ন চ নিন্দামি আত্মনোঽন্যন্নহি ক্বচিত্ ।
ন তুষ্যামি শুভপ্রাপ্তৌ ন খিদ্যাম্যশুভাগমে ॥ ৫৯॥

প্রশান্তচাপলং বীতশোকমস্তসমীহিতম্ ।
মনো মম মুনে শান্তং তেন জীবাম্যনাময়ঃ ॥ ৬০॥

অয়ং বন্ধুঃ পরশ্চায়ং মমায়ময়মন্যকঃ ।
ইতি ব্রহ্মন্ন জানামি সংস্পর্শং ন দদাম্যহম্ ॥ ৬১॥

বাসনামাত্রসংত্যাগাজ্জরামরণবর্জিতম্ ।
সবাসনং মনো জ্ঞানং জ্ঞেয়ং নির্বাসনং মনঃ ॥ ৬২॥

চিত্তে ত্যক্তে লয়ং য়াতি দ্বৈতমেতচ্চ সর্বতঃ ।
শিষ্যতে পরমং শান্তমেকমগচ্ছমনাময়ম্ ॥ ৬৩॥

অনন্তমজমব্যক্তমজরং শান্তমচ্যুতম্ ।
অদ্বিতীয়মনাদ্যন্তং য়দাদ্যমুপলম্ভনম্ ॥ ৬৪॥

একমাদ্যন্তরহিতং চিন্মাত্রমমলং ততম্ ।
খাদপ্যতিতরাং সূক্ষ্মং তদ্ব্রহ্মাস্মি ন সংশয়ঃ ॥ ৬৫॥

দিক্কালাদ্যনবচ্ছিন্নং স্বচ্ছং নিত্যোদিতং ততম্ ।
সর্বার্থময়মেকার্থং চিন্মাত্রমমলং ভব ॥ ৬৬॥

সর্বমেকমিদং শান্তমাদিমধ্যান্তবর্জিতম্ ।
ভাবাভাবমজং সর্বমিতি মত্বা সুখী ভব ॥ ৬৭॥

ন বদ্ধোঽস্মি ন মুক্তোঽস্মি ব্রহ্মৈবাস্মি নিরাময়ম্ ।
দ্বৈতভাববিমুক্তোঽস্মি সচ্চিদানন্দলক্ষণঃ ।
এবং ভাবয় য়ত্নেন জীবন্মুক্তো ভবিষ্যসি ॥ ৬৮॥

পদার্থবৃন্দে দেহাদিধিয়া সংত্যজ্য দূরতঃ ।
আশীতলান্তঃকরণো নিত্যমাত্মপরো ভব ॥ ৬৯॥

ইদং রম্যমিদং নেতি বীজং তে দুঃখসংততেঃ ।
তস্মিন্সাম্যাগ্নিনা দগ্ধে দুঃখস্যাবসরঃ কুতঃ ॥ ৭০॥

শাস্ত্রসজ্জনসম্পর্কৈঃ প্রজ্ঞামাদৌ বিবর্ধয়েত্ ॥ ৭১॥

ঋতং সত্যং পরং ব্রহ্ম সর্বসংসারভেষজম্ ।
অত্যর্থমমলং নিত্যমাদিমধ্যান্তবর্জিতম্ ॥ ৭২॥

তথা স্থূলমনাকাশমসংস্পৃশ্যমচাক্ষুষম্ ।
ন রসং ন চ গন্ধাখ্যমপ্রমেয়মনূপমম্ ॥ ৭৩॥

আত্মানং সচ্চিদানন্দমনন্তং ব্রহ্ম সুব্রত ।
অহমস্মীত্যভিধ্যায়েদ্ধ্যেয়াতীতং বিমুক্তয়ে ॥ ৭৪॥

সমাধিঃ সংবিদুত্পত্তিঃ পরজীবৈকতং প্রতি ।
নিত্যঃ সর্বগতো হ্যাত্মা কূটস্থো দোষবর্জিতঃ ॥ ৭৫॥

একঃ সন্ভিদ্যতে ভ্রান্ত্যা মায়য়া ন স্বরূপতঃ ।
তস্মাদদ্বৈত এবাস্তি ন প্রপঞ্চো ন সংসৃতিঃ ॥ ৭৬॥

য়থাকাশো ঘটাকাশো মহাকাশ ইতীরিতঃ ।
তথা ভ্রান্তের্দ্বিধা প্রোক্তো হ্যাত্মা জীবেশ্বরাত্মনা ॥ ৭৭॥

য়দা মনসি চৈতন্যং ভাতি সর্বত্রগং সদা ।
য়োগিনোঽঽব্যবধানেন তদা সম্পদ্যতে স্বয়ম্ ॥ ৭৮॥

য়দা সর্বাণি ভূতানি স্বাত্মন্যেব হি পশ্যতি ।
সর্বভূতেষু চাত্মানং ব্রহ্ম সম্পদ্যতে সদা ॥ ৭৯॥

য়দা সর্বাণি ভূতানি সমাধিস্থো ন পশ্যতি ।
একীভূতঃ পরেণাসৌ তদা ভবতি কেবলঃ ॥ ৮০॥

শাস্ত্রসজ্জনসম্পর্কবৈরাগ্যাভ্যাসরূপিণী ।
প্রথমা ভূমিকৈষোক্তা মুমুক্ষুত্বপ্রদায়িনী ॥ ৮১॥

বিচারণা দ্বিতীয়া স্যাত্তৃতীয়া সাঙ্গভাবনা ।
বিলাপিনী চতুর্থী স্যাদ্বাসনা বিলয়াত্মিকা ॥ ৮২॥

শুদ্ধসংবিন্মনানন্দরূপা ভবতি পঞ্চমী ।
অর্ধসুপ্তপ্রবুদ্ধাভো জীবন্মুক্তোঽত্র তিষ্ঠতি ॥ ৮৩॥

অসংবেদনরূপা চ ষষ্ঠী ভবতি ভূমিকা ।
আনন্দৈকঘনাকারা সুষুপ্তসদৃশী স্থিতিঃ ॥ ৮৪॥

তুর্যাবস্থোপশান্তা সা মুক্তিরেব হি কেবলা ।
সমতা স্বচ্ছতা সৌম্যা সপ্তমী ভূমিকা ভবেত্ ॥ ৮৫॥

তুর্যাতীতা তু য়াবস্থা পরা নির্বাণরূপিণী ।
সপ্তমী সা পরা প্রৌঢা বিষয়ো নৈব জীবতাম্ ॥ ৮৬॥

পূর্বাবস্থাত্রয়ং তত্র জাগ্রদিত্যেব সংস্থিতম্ ।
চতুর্থী স্বপ্ন ইত্যুক্তা স্বপ্নাভং য়ত্র বৈ জগত্ ॥ ৮৭॥

আনন্দৈকঘনাকারা সুষুপ্তাখ্যা তু পঞ্চমী ।
অসংবেদনরূপা তু ষষ্ঠী তুর্যপদাভিধা ॥ ৮৮॥

তুর্যাতীতপদাবস্থা সপ্তমী ভূমিকোত্তমা ।
মনোবচোভিরগ্রাহ্যা স্বপ্রকাশসদাত্মিকা ॥ ৮৯॥

অন্তঃ প্রত্যাহৃতিবশাচ্চৈত্যং চেন্ন বিভাবিতম্ ।
মুক্ত এব ন সন্দেহো মহাসমতয়া তয়া ॥ ৯০॥

ন ম্রিয়ে ন চ জীবামি নাহং সন্নাপ্যসন্ময়ঃ ।
অহং ন কিংচিচ্চিদিতি মত্বা ধীরো ন শোচতি ॥ ৯১॥

অলেপকোঽহমজরো নীরাগঃ শান্তবাসনঃ ।
নিরংশোঽস্মি চিদাকাশমিতি মত্বা ন শোচতি ॥ ৯২॥

অহংমত্যা বিরহিতঃ শুদ্ধো বুদ্ধোঽজরোঽমরঃ ।
শান্তঃ শমসমাভাস ইতি মত্বা ন শোচতি ॥ ৯৩॥

তৃণাগ্রেষ্বম্বরে ভানৌ নরনাগামরেষু চ ।
য়ত্তিষ্ঠতি তদেবাহমিতি মত্বা ন শোচতি ॥ ৯৪॥

ভাবনাং সর্বভাবেভ্যঃ সমুত্সৃজ্য সমুত্থিতঃ ।
অবশিষ্টং পরং ব্রহ্ম কেবলোঽস্মীতি ভাবয় ॥ ৯৫॥

বাচামতীতবিষয়ো বিষয়াশাদশোজ্ঝিতঃ ।
পরানন্দরসাক্ষুব্ধো রমতে স্বাত্মনাত্মনি ॥ ৯৬॥

সর্বকর্মপরিত্যাগী নিত্যতৃপ্তো নিরাশ্রয়ঃ ।
ন পুণ্যেন ন পাপেন নেতরেণ চ লিপ্যতে ॥ ৯৭॥

স্ফটিকঃ প্রতিবিম্বেন য়থা নায়াতি রঞ্জনম্ ।
তজ্জ্ঞঃ কর্মফলেনান্তস্তথা নায়াতি রঞ্জনম্ ॥ ৯৮॥

বিহরঞ্জনতাবৃন্দে দেবকীর্তন পূজনৈঃ ।
খেদাহ্লাদৌ ন জানাতি প্রতিবিম্বগতৈরিব ॥ ৯৯॥

নিস্স্তোত্রো নির্বিকারশ্চ পূজ্যপূজাবিবর্জিতঃ ।
সংয়ুক্তশ্চ বিয়ুক্তশ্চ সর্বাচারনয়ক্রমৈঃ ॥ ১০০॥

তনুং ত্যজতু বা তীর্থে শ্বপচস্য গৃহেঽথ বা ।
জ্ঞানসম্পত্তিসময়ে মুক্তোঽসৌ বিগতাশয়ঃ ॥ ১০১॥

সংকল্পত্বং হি বন্ধস্য কারণং তত্পরিত্যজ ।
মোক্ষো ভবেদসংকল্পাত্তদভ্যাসং ধিয়া কুরু ॥ ১০২॥

সাবধানো ভব ত্বং চ গ্রাহ্যগ্রাহকসংগমে ।
অজস্রমেব সংকল্পদশাঃ পরিহরঞ্শনৈঃ ॥ ১০৩॥

মা ভব গ্রাহ্যভাবাত্মা গ্রাহকাত্মা চ মা ভব ।
ভাবনামখিলাং ত্যক্ত্বা য়চ্ছিষ্টং তন্ময়ো ভব ॥ ১০৪॥

কিংচিচ্চেদ্রোচতে তুভ্যং তদ্বদ্ধোঽসি ভবস্থিতৌ ।
ন কিংচিদ্রোচতে চেত্তে তন্মুক্তোঽসি ভবস্থিতৌ ॥ ১০৫॥

অস্মাত্পদার্থনিচয়াদ্যাবত্স্থাবরজঙ্গমাত্ ।
তৃণাদের্দেহপর্যন্তান্মা কিংচিত্তত্র রোচতাম্ ॥ ১০৬॥

অহংভাবানহংভাবৌ ত্যক্ত্বা সদসতী তথা ।
য়দসক্তং সমং স্বচ্ছং স্থিতং তত্তুর্যমুচ্যতে ॥ ১০৭॥

য়া স্বচ্ছা সমতা শান্তা জীবন্মুক্তব্যবস্থিতিঃ ।
সাক্ষ্যবস্থা ব্যবহৃতৌ সা তুর্যা কলনোচ্যতে ॥ ১০৮॥

নৈতজ্জাগ্রন্ন চ স্বপ্নঃ সংকল্পানামসংভবাত্ ।
সুষুপ্তভাবো নাঽপ্যেতদভাবাজ্জডতাস্থিতেঃ ॥ ১০৯॥

শান্তসম্যক্প্রবুদ্ধানাং য়থাস্থিতমিদং জগত্ ।
বিলীনং তুর্যমিত্যাহুরবুদ্ধানাং স্থিতং স্থিরম্ ॥ ১১০॥

অহংকারকলাত্যাগে সমতায়াঃ সমুদ্গমে ।
বিশরারৌ কৃতে চিত্তে তুর্যাবস্থোপতিষ্ঠতে ॥ ১১১॥

সিদ্ধান্তোঽধ্যাত্মশাস্ত্রাণাং সর্বাপহ্নব এব হি ।
নাবিদ্যাস্তীহ নো মায়া শান্তং ব্রহ্মেদমক্লমম্ ॥ ১১২॥

শান্ত এব চিদাকাশে স্বচ্ছে শমসমাত্মনি ।
সমগ্রশক্তিখচিতে ব্রহ্মেতি কলিতাভিধে ॥ ১১৩॥

সর্বমেব পরিত্যজ্য মহামৌনী ভবানঘ ।
নির্বাণবান্নির্মননঃ ক্ষীণচিত্তঃ প্রশান্তধীঃ ॥ ১১৪॥

আত্মন্যেবাস্ব শান্তাত্মা মূকান্ধবধিরোপমঃ ।
নিত্যমন্তর্মুখঃ স্বচ্ছঃ স্বাত্মনান্তঃ প্রপূর্ণধীঃ ॥ ১১৫॥

জাগ্রত্যেব সুষুপ্তস্থঃ কুরু কর্মাণি বৈ দ্বিজ ।
অন্তঃ সর্বপরিত্যাগী বহিঃ কুরু য়থাগতম্ ॥ ১১৬॥

চিত্তসত্তা পরং দুঃখং চিত্তত্যাগঃ পরং সুখম্ ।
অতশ্চিত্তং চিদাকাশে নয় ক্ষয়মবেদনাত্ ॥ ১১৭॥

দৃষ্ট্বা রম্যমরম্যং বা স্থেয়ং পাষাণবত্সদা ।
এতাবতাত্ময়ত্নেন জিতা ভবতি সংসৃতিঃ ॥ ১১৮॥

বেদান্তে পরমং গুহ্যং পুরাকল্পপ্রচোদিতম্ ।
নাপ্রশান্তায় দাতব্যং ন চাশিষ্যায় বৈ পুনঃ ॥ ১১৯॥

অন্নপূর্ণোপনিষদং য়োঽধীতে গুর্বনুগ্রহাত্ ।
স জীবন্মুক্ততাং প্রাপ্য ব্রহ্মৈব ভবতি স্বয়ম্ ॥ ১২০॥

ইত্যুপনিষত্ ॥ ইতি পঞ্চমোঽধ্যায়ঃ ॥ ৫॥

ওঁ ভদ্রং কর্ণেভিঃ শৃণুয়াম দেবাঃ ॥ ভদ্রং পশ্যেমাক্ষভির্যজত্রাঃ ॥

স্থিরৈরঙ্গৈস্তুষ্টুবা⁠সস্তনূভিঃ ॥ ব্যশেম দেবহিতং য়দায়ুঃ ॥

স্বস্তি ন ইন্দ্রো বৃদ্ধশ্রবাঃ ॥ স্বস্তি নঃ পূষা বিশ্ববেদাঃ ॥

স্বস্তি নস্তার্ক্ষ্যো অরিষ্টনেমিঃ ॥ স্বস্তি নো বৃহস্পতির্দধাতু ॥

ওঁ শান্তিঃ শান্তিঃ শান্তিঃ ॥

ইত্যন্নপূর্ণোপনিষত্সমাপ্তা ॥