॥ উত্তরগীতা ॥
অখণ্ডং সচ্চিদানন্দমবাঙ্মনসগোচরম্ ।
আত্মানমখিলাধারমাশ্রয়েঽভীষ্টসিদ্ধয়ে ॥
অর্জুন উবাচ -
য়দেকং নিষ্কলং ব্রহ্ম ব্যোমাতীতং নিরঞ্জনম্ ।
অপ্রতর্ক্যমবিজ্ঞেয়ং বিনাশোত্পত্তিবর্জিতম্ ॥ ১॥
কারণং য়োগনির্মুক্তং হেতুসাধনবর্জিতম্ ।
হৃদয়াম্বুজমধ্যস্থং জ্ঞানজ্ঞেয়স্বরূপকম্ ॥ ২॥
তত্ক্ষণাদেব মুচ্যেত য়জ্জ্ঞানাদ্ব্রূহি কেশব ।
শ্রীভগবানুবাচ -
সাধু পৃষ্টং মহাবাহো বুদ্ধিমানসি পাণ্ডব ॥ ৩॥
য়ন্মাং পৃচ্ছসি তত্ত্বার্থমশেষং প্রবদাম্যহম্ ।
আত্মমন্ত্রস্য হংসস্য পরস্পরসমন্বয়াত্ ॥ ৪॥
য়োগেন গতকামানাং ভাবনা ব্রহ্ম চক্ষতে ।
শরীরিণামজস্যান্তং হংসত্বং পারদর্শনম্ ॥ ৫॥
হংসো হংসাক্ষরং চৈতত্কূটস্থং য়ত্তদক্ষরম্ ।
তদ্বিদ্বানক্ষরং প্রাপ্য জহ্যান্মরণজন্মনী ॥ ৬॥
কাকীমুখং ককারান্তমুকারশ্চেতনাকৃতিঃ ।
মকারস্য তু লুপ্তস্য কোঽর্থঃ সম্প্রতিপদ্যতে ॥ ৭॥
কাকীমুখককারান্তমুকারশ্চেতনাকৃতিঃ ।
অকারস্য তু লুপ্তস্য কোঽর্থঃ সম্প্রতিপদ্যতে ॥ ৭॥
গচ্ছংস্তিষ্ঠন্সদা কালং বায়ুস্বীকরণং পরম্ ।
সর্বকালপ্রয়োগেন সহস্রায়ুর্ভবেন্নরঃ ॥ ৮॥
য়াবত্পশ্যেত্খগাকারং তদাকারং বিচিন্তয়েত্ ।
খমধ্যে কুরু চাত্মানমাত্মমধ্যে চ খং কুরু ।
আত্মানং খময়ং কৃত্বা ন কিংচিদপি চিন্তয়েত্ ॥ ৯॥
স্থিরবুদ্ধিরসংমূঢো ব্রহ্মবিদ্ব্রহ্মণি স্থিতঃ ।
বহির্ব্যোমস্থিতং নিত্যং নাসাগ্রে চ ব্যবস্থিতম্ ।
নিষ্কলং তং বিজানীয়াচ্ছ্বাসো য়ত্র লয়ং গতঃ ॥ ১০॥
পুটদ্বয়বিনির্মুক্তো বায়ুর্যত্র বিলীয়তে ॥ ১১॥
তত্র সংস্থং মনঃ কৃত্বা তং ধ্যায়েত্পার্থ ঈশ্বরম্ ॥ ১২॥
নির্মলং তং বিজানীয়াত্ষডূর্মিরহিতং শিবম্ ।
প্রভাশূন্যং মনঃশূন্যং বুদ্ধিশূন্যং নিরাময়ম্ ॥ ১৩॥
সর্বশূন্যং নিরাভাসং সমাধিস্তস্য লক্ষণম্ ।
ত্রিশূন্যং য়ো বিজানীয়াত্স তু মুচ্যেত বন্ধনাত্ ॥ ১৪॥
স্বয়মুচ্চলিতে দেহে দেহী ন্যস্তসমাধিনা ।
নিশ্চলং তদ্বিজানীয়াত্সমাধিস্থস্য লক্ষণম্ ॥ ১৫॥
অমাত্রং শব্দরহিতং স্বরব্যঞ্জনবর্জিতম্ ।
বিন্দুনাদকলাতীতং য়স্তং বেদ স বেদবিত্ ॥ ১৬॥
প্রাপ্তে জ্ঞানেন বিজ্ঞানে জ্ঞেয়ে চ হৃদি সংস্থিতে ।
লব্ধশান্তিপদে দেহে ন য়োগো নৈব ধারণা ॥ ১৭॥
য়ো বেদাদৌ স্বরঃ প্রোক্তো বেদান্তে চ প্রতিষ্ঠিতঃ ।
তস্য প্রকৃতিলীনস্য য়ঃ পরঃ স মহেশ্বরঃ ॥ ১৮॥
নাবার্থী চ ভবেত্তাবদ্যাবত্পারং ন গচ্ছতি ।
উত্তীর্ণে চ সরিত্পারে নাবয়া কিং প্রয়োজনম্ ॥ ১৯॥
গ্রন্থমভ্যস্য মেধাবী জ্ঞানবিজ্ঞানতত্পরঃ ।
পলালমিব ধান্যার্থী ত্যজেদ্গ্রন্থমশেষতঃ ॥ ২০॥
উল্কাহস্তো য়থা কশ্চিদ্দ্রব্যমালোক্য তাং ত্যজেত্
জ্ঞানেন জ্ঞেয়মালোক্য পশ্চাজ্জ্ঞানং পরিত্যজেত্ ॥ ২১॥
য়থামৃতেন তৃপ্তস্য পয়সা কিং প্রয়োজনম্ ।
এবং তং পরমং জ্ঞাত্বা বেদৈর্নাস্তি প্রয়োজনম্ ॥ ২২॥
জ্ঞানামৃতেন তৃপ্তস্য কৃতকৃত্যস্য য়োগিনঃ ।
ন চাস্তি কিঞ্চিত্কর্তব্যমস্তি চেন্ন স তত্ত্ববিত্ ॥ ২৩॥
তৈলধারামিবাচ্ছিন্নং দীর্ঘঘণ্টানিনাদবত্ ।
অবাচ্যং প্রণবস্যাগ্রং য়স্তং বেদ স বেদবিত্ ॥ ২৪॥
আত্মানমরণিং কৃত্বা প্রণবং চোত্তরারণিম্ ।
ধ্যাননির্মথনাভ্যাসাদেবং পশ্যেন্নিগূঢবত্ ॥ ২৫॥
তাদৃশং পরমং রূপং স্মরেত্পার্থ হ্যনন্যধীঃ ।
বিধূমাগ্নিনিভং দেবং পশ্যেদন্ত্যন্তনির্মলম্ ॥ ২৬॥
দূরস্থোঽপি ন দূরস্থঃ পিণ্ডস্থঃ পিণ্ডবর্জিতঃ ।
বিমলঃ সর্বদা দেহী সর্বব্যাপী নিরঞ্জনঃ ॥ ২৭॥
কায়স্থোঽপি ন কায়স্থঃ কায়স্থোঽপি ন জায়তে ।
কায়স্থোঽপি ন ভুঞ্জানঃ কায়স্থোঽপি ন বধ্যতে ॥ ২৮॥
কায়স্থোঽপি ন লিপ্তঃ স্যাত্কায়স্থোঽপি ন বাধ্যতে ।
তিলমধ্যে য়থা তৈলং ক্ষীরমধ্যে য়থা ঘৃতম্ ॥ ২৯॥
পুষ্পমধ্যে য়থা গন্ধঃ ফলমধ্যে য়থা রসঃ ।
কাষ্ঠাগ্নিবত্প্রকাশেত আকাশে বায়ুবচ্চরেত্ ॥ ৩০॥
তথা সর্বগতো দেহী দেহমধ্যে ব্যবস্থিতঃ ।
মনস্থো দেশিনাং দেবো মনোমধ্যে ব্যবস্থিতঃ ॥ ৩১॥
মনস্থং মনমধ্যস্থং মধ্যস্থং মনবর্জিতম্ ।
মনসা মন আলোক্য স্বয়ং সিধ্যন্তি য়োগিনঃ ॥ ৩২॥
আকাশং মানসং কৃত্বা মনঃ কৃত্বা নিরাস্পদম্ ।
নিশ্চলং তদ্বিজানীয়াত্সমাধিস্থস্য লক্ষণম্ ॥ ৩৩॥
য়োগামৃতরসং পীত্বা বায়ুভক্ষঃ সদা সুখী ।
য়মমভ্যস্যতে নিত্যং সমাধির্মৃত্যুনাশকৃত্ ॥ ৩৪॥
ঊর্ধ্বশূন্যমধঃশূন্যং মধ্যশূন্যং য়দাত্মকম্ ।
সর্বশূন্যং স আত্মেতি সমাধিস্থস্য লক্ষণম্ ॥ ৩৫॥
শূন্যভাবিতভাবাত্মা পুণ্যপাপৈঃ প্রমুচ্যতে ।
অর্জুন উবাচ-
অদৃশ্যে ভাবনা নাস্তি দৃশ্যমেতদ্বিনশ্যতি ॥ ৩৬॥
অবর্ণমস্বরং ব্রহ্ম কথং ধ্যায়ন্তি য়োগিনঃ ।
শ্রীভগবানুবাচ-
ঊর্ধ্বপূর্ণমধঃপূর্ণং মধ্যপূর্ণং য়দাত্মকম্ ॥ ৩৭॥
সর্বপূর্ণং স আত্মেতি সমাধিস্থস্য লক্ষণম্ ।
অর্জুন উঅবাচ-
সালম্বস্যাপ্যনিত্যত্বং নিরালম্বস্য শূন্যতা ॥ ৩৮॥
উভয়োরপি দুষ্ঠত্বাত্কথং ধ্যায়ন্তি য়োগিনঃ ।
শ্রীভগবানুবাচ-
হৃদয়ং নির্মলং কৃত্বা চিন্তয়িত্বাপ্যনাময়ম্ ॥ ৩৯॥
অহমেব ইদং সর্বমিতি পশ্যেত্পরং সুখম্ ।
অর্জুন উবাচ-
অক্ষরাণি সমাত্রাণি সর্বে বিন্দুসমাশ্রিতাঃ ॥ ৪০॥
বিন্দুভির্ভিদ্যতে নাদঃ স নাদঃ কেন ভিদ্যতে ।
শ্রীভগবানুবাচ-
অনাহতস্য শব্দস্য তস্য শব্দস্য য়ো ধ্বনিঃ ॥ ৪১॥
ধ্বনেরন্তর্গতং জ্যোতির্জ্যোতিরন্তর্গতং মনঃ ।
তন্মনো বিলয়ং য়াতি তদ্বিষ্ণোঃ পরমং পদম্ ॥ ৪২॥
ওঁকারধ্বনিনাদেন বায়োঃ সংহরণান্তিকম্ ।
নিরালম্বং সমুদ্দিশ্য য়ত্র নাদো লয়ং গতঃ ॥ ৪৩॥
অর্জুন উবাচ-
ভিন্নে পঞ্চাত্মকে দেহে গতে পঞ্চসু পঞ্চধা ।
প্রাণৈর্বিমুক্তে দেহে তু ধর্মাধর্মৌ ক্ব গচ্ছতঃ ॥ ৪৪॥
শ্রীভগবানুবাচ-
ধর্মাধর্মৌ মনশ্চৈব পঞ্চভূতানি য়ানি চ ।
ইন্দ্রিয়াণি চ পঞ্চৈব য়াশ্চান্যাঃ পঞ্চ দেবতাঃ ॥ ৪৫॥
তাশ্চৈব মনসা সর্বে নিত্যমেবাভিমানতঃ ।
জীবেন সহ গচ্ছন্তি য়াবত্তত্ত্বং ন বিন্দতি ॥ ৪৬॥
অর্জুন উবাচ-
স্থাবরং জঙ্গমং চৈব য়ত্কিংচিত্সচরাচরম্ ।
জীবা জীবেন সিধ্যন্তি স জীবঃ কেন সিধ্যতি ॥ ৪৭॥
শ্রীভগবানুবাচ-
মুখনাসিকয়োর্মধ্যে প্রাণঃ সংচরতে সদা ।
আকাশঃ পিবতে প্রাণং স জীবঃ কেন জীবতি ॥ ৪৮॥
অর্জুন উবাচ-
ব্রহ্মাণ্ডব্যাপিতং ব্যোম ব্যোম্না চাবেষ্টিতং জগত্ ।
অন্তর্বহিশ্চ তদ্ব্যোম কথং দেবো নিরঞ্জনঃ ॥ ৪৯॥
শ্রীভগবানুবাচ-
আকাশো হ্যবকাশশ্চ আকাশব্যাপিতং চ য়ত্ ।
আকাশস্য গুণঃ শব্দো নিঃশব্দো ব্রহ্ম উচ্যতে ॥ ৫০॥
অর্জুন উবাচ-
দন্তোষ্ঠতালুজিহ্বানামাস্পদং য়ত্র দৃশ্যতে ।
অক্ষরত্বং কুতস্তেষাং ক্ষরত্বং বর্ততে সদা ॥ ৫১॥
অঘোষমব্যঞ্জনমস্বরং চা-
প্যতালুকণ্ঠোষ্ঠমনাসিকং চ ।
অরেখজাতং পরমূষ্মবর্জিতং
তদক্ষরং ন ক্ষরতে কথংচিত্ ॥ ৫২॥
অর্জুন উবাচ-
জ্ঞাত্বা সর্বগতং ব্রহ্ম সর্বভূতাধিবাসিতম্ ।
ইন্দ্রিয়াণাং নিরোধেন কথং সিধ্যন্তি য়োগিনঃ ॥ ৫৩॥
শ্রীভগবানুবাচ-
ইন্দ্রিয়াণাং নিরোধেন দেহে পশ্যন্তি মানবাঃ ।
দেহে নষ্টে কুতো বুদ্ধির্বুদ্ধিনাশে কুতো জ্ঞতা ॥ ৫৪॥
তাবদেব নিরোধঃ স্যাদ্যাবত্তত্ত্বং ন বিন্দতি ।
বিদিতে তু পরে তত্ত্বে একমেবানুপশ্যতি ॥ ৫৫॥
ভবচ্ছিদ্রকৃতা দেহাঃ স্রবন্তি গলিকা ইব ।
নৈব ব্রহ্ম ন শুদ্ধং স্যাত্পুমান্ব্রহ্ম ন বিন্দতি ॥ ৫৬॥
অত্যন্তমলিনো দেহো দেহী চাত্যন্তনির্মলঃ ।
উভয়োরন্তরং জ্ঞাত্বা কস্য শৌচং বিধীয়তে ॥ ৫৭॥
ইতি উত্তরগীতায়াং প্রথমোঽধ্যায়ঃ ॥
॥ দ্বিতীয়োঽধ্যায়ঃ ॥
অরূঢস্যারুরুক্ষোশ্চ স্বরূপে পরিকীর্তিতে ।
তত্রারূঢস্য বিম্বৈক্যং কথং স্যাদিতি পৃচ্ছতি ॥
অর্জুন উবাচ-
জ্ঞাত্বা সর্বগতং ব্রহ্ম সর্বজ্ঞং পরমেশ্বরম্ ।
অহং ব্রহ্মেতি নির্দেষ্টুং প্রমাণং তত্র কিং ভবেত্ ॥ ১॥
শ্রীভগবানুবাচ-
য়থা জলং জলে ক্ষিপ্তং ক্ষীরে ক্ষীরং ঘৃতে ঘৃতম্ ।
অবিশেষো ভবেত্তদ্বজ্জীবাত্মপরমাত্মনোঃ ॥ ২॥
জীবে পরেণ তাদাত্ম্যং সর্বগং জ্যোতিরীশ্বরম্ ।
প্রমাণলক্ষণৈর্জ্ঞেয়ং স্বয়মেকাগ্রবেদিনা ॥ ৩॥
অর্জুন উবাচ-
জ্ঞানাদেব ভবেজ্জ্ঞেয়ং বিদিত্বা তত্ক্ষণেন তু ।
জ্ঞানমাত্রেণ মুচ্যেত কিং পুনর্যোগধারণা ॥ ৪॥
শ্রীভগবানুবাচ-
জ্ঞানেন দীপিতে দেহে বুদ্ধির্ব্রহ্মসমন্বিতা ।
ব্রহ্মজ্ঞানাগ্নিনা বিদ্বান্নির্দহেত্কর্মবন্ধনম্ ॥ ৫॥
ততঃ পবিত্রং পরমেশ্বরাখ্য-
মদ্বৈতরূপং বিমলাম্বরাভম্ ।
য়থোদকে তোয়মনুপ্রবিষ্টং
তথাত্মরূপো নিরুপাধিসংস্থঃ ॥ ৬॥
আকাশবত্সূক্ষ্মশরীর আত্মা
ন দৃশ্যতে বায়ুবদন্তরাত্মা ।
স বাহ্যমভ্যন্তরনিশ্চলাত্মা
জ্ঞানোল্কয়া পশ্যতি চান্তরাত্মা ॥ ৭॥
য়ত্র য়ত্র মৃতো জ্ঞানী য়েন কেনাপি মৃত্যুনা ।
য়থা সর্বগতং ব্যোম তত্র তত্র লয়ং গতঃ ॥ ৮॥
শরীরব্যাপিতং ব্যোম ভুবনানি চতুর্দশ ।
নিশ্চলো নির্মলো দেহী সর্বব্যাপী নিরঞ্জনঃ ॥ ৯॥
মুহূর্তমপি য়ো গচ্ছেন্নাসাগ্রে মনসা সহ ।
সর্বং তরতি পাপ্মানং তস্য জন্ম শতার্জিতম্ ॥ ১০॥
দক্ষিণে পিঙ্গলা নাডী বহ্নিমণ্ডলগোচরা ।
দেবয়ানমিতি জ্ঞেয়া পুণ্যকর্মানুসারিণী ॥ ১১॥
ইলা চ বামনিশ্বাসসোমমণ্ডলগোচরা ।
পিতৃয়ানমিতি জ্ঞেয়ং বামমাশ্রিত্য তিষ্ঠতি ॥ ১২॥
গুদস্য পৃষ্ঠভাগেঽস্মিন্বীণাদণ্ডস্য দেহভৃত্ ।
দীর্ঘাস্তি মূর্ধ্নিপর্যন্তং ব্রহ্মদণ্ডীতি কথ্যতে ॥ ১৩॥
তস্যান্তে সুষিরং সূক্ষ্মং ব্রহ্মনাডীতি সূরিভিঃ ।
ইলাপিঙ্গলয়োর্মধ্যে সুষুম্না সূক্ষ্মরূপিণী ।
সর্বং প্রতিষ্ঠিতং য়স্মিন্সর্বগং সর্বতোমুখম্ ॥ ১৪॥
তস্য মধ্যগতাঃ সূর্যসোমাগ্নিপরমেশ্বরাঃ ।
ভূতলোকা দিশঃ ক্ষেত্রসমুদ্রাঃ পর্বতাঃ শিলাঃ ॥ ১৫॥
দ্বীপাশ্চ নিম্নগা বেদাঃ শাস্ত্রবিদ্যাকলাক্ষরাঃ ।
স্বরমন্ত্রপুরাণানি গুণাশ্চৈতে চ সর্বশঃ ॥ ১৬॥
বীজং বীজাত্মকাস্তেষাং ক্ষেত্রজ্ঞাঃ প্রাণবায়বঃ ।
সুষুম্নান্তর্গতং বিশ্বং তস্মিন্সর্বং প্রতিষ্ঠিতম্ ॥ ১৭॥
নানানাডীপ্রসবকং সর্বভূতান্তরাত্মনি ।
ঊর্ধ্বমূলমধঃ শাখং বায়ুমার্গেণ সর্বগম্ ॥ ১৮॥
দ্বিসপ্ততিসহস্রাণি নাড্যঃ স্যুর্বায়ুগোচরাঃ ।
কর্মমার্গেণ সুষিরাস্তির্যঞ্চঃ সুষিরাত্মকাঃ ॥ ১৯॥
অধশ্চোর্ধ্বগতাস্তাসু নবদ্বারাণি শোধয়ন্ ।
বায়ুনা সহ জীবোর্ধ্বজ্ঞানী মোক্ষমবাপ্নুয়াত্ ॥ ২০॥
অমরাবতীন্দ্রলোকোঽস্মিন্নাসাগ্রে পূর্বতো দিশি ।
অগ্নিলোকো হৃদি জ্ঞেয়শ্চক্ষুস্তেজোবতী পুরী ॥ ২১॥
য়াম্যা সংয়মনী শ্রোত্রে য়মলোকঃ প্রতিষ্ঠিতঃ ।
নৈরৃতো হ্যথ তত্পার্শ্বে নৈরৃতো লোক আশ্রিতঃ ॥ ২২॥
বিভাবরী প্রতীচ্যাং তু পৃষ্ঠে বারুণিকা পুরী ।
বায়োর্গন্ধবতী কর্ণপার্শ্বে লোকঃ প্রতিষ্ঠিতঃ ॥ ২৩॥
সৌম্যা পুষ্পবতী সৌম্যে সোমলোকস্তু কণ্ঠতঃ ।
বামকর্ণে তু বিজ্ঞেয়ো দেহমাশ্রিত্য তিষ্ঠতি ॥ ২৪॥
বামে চক্ষুষি চৈশানী শিবলোকো মনোন্মনী ।
মূর্ধ্নি ব্রহ্মপুরী জ্ঞেয়া ব্রহ্মাণ্ডং দেহমাশ্রিতম্ ॥ ২৫॥
পাদাদধঃ শিবোঽনন্তঃ কালাগ্নিপ্রলয়াত্মকঃ ।
অনাময়মধশ্চোর্ধ্বং মধ্যমং তু বহিঃ শিবম্ ॥ ২৬॥
অধঃ পদোঽতলং বিদ্যাত্পাদং চ বিতলং বিদুঃ ।
নিতলং পাদসন্ধিশ্চ সুতলং জঙ্ঘমুচ্যতে ॥ ২৭॥
মহাতলং তু জানু স্যাদূরুদেশো রসাতলম্ ।
কটিস্তালতলং প্রোক্তং সপ্ত পাতালসংজ্ঞয়া ॥ ২৮॥
কালাগ্নিনরকং ঘোরং মহাপাতালসংজ্ঞয়া ।
পাতালং নাভ্যধোভাগো ভোগীন্দ্রফণিমণ্ডলম্ ॥ ২৯॥
বেষ্টিতঃ সর্বতোঽনন্তঃ স বিভ্রজ্জীবসংজ্ঞকঃ ।
ভূলোকং নাভিদেশং তু ভুবর্লোকং তু কুক্ষিতঃ ॥ ৩০॥
হৃদয়ং স্বর্গলোকং তু সূর্যাদিগ্রহতারকাঃ ।
সূর্যসোমসুনক্ষত্রং বুধশুক্রকুজাঙ্গিরাঃ ॥ ৩১॥
মন্দশ্চ সপ্তমো হ্যেষ ধ্রুবোঽতঃ স্বর্গলোকতঃ ।
হৃদয়ে কল্পয়ন্যোগী তস্মিন্সর্বসুখং লভেত্ ॥ ৩২॥
হৃদয়স্য মহর্লোকং জনোলোকং তু কণ্ঠতঃ ।
তপোলোকং ভ্রুবোর্মধ্যে মূর্ধ্নি সত্যং প্রতিষ্ঠিতম্ ॥ ৩৩॥
ব্রহ্মাণ্ডরূপিণী পৃথ্বী তোয়মধ্যে বিলীয়তে ।
অগ্নিনা পচ্যতে তোয়ং বায়ুনা গ্রস্যতেঽনলঃ ॥ ৩৪॥
আকাশং তু পিবেদ্বায়ুং মনশ্চাকাশমেব চ ।
বুদ্ধ্যহঙ্কারচিত্তং চ ক্ষেত্রজ্ঞঃ পরমাত্মনি ॥ ৩৫॥
অহং ব্রহ্মেতি মাং ধ্যায়েদেকাগ্রমনসা সকৃত্ ।
সর্বং তরতি পাপ্মানং কল্পকোটিশতৈঃ কৃতম্ ॥ ৩৬॥
ঘটসংবৃতমাকাশং নীয়মানে ঘটে য়থা ।
ঘটো নশ্যতি নাকাশং তদ্বজ্জীব ইহাত্মনি ॥ ৩৭॥
ঘটাকাশমিবাত্মানং বিলয়ং বেত্তি তত্ত্বতঃ ।
স গচ্ছতি নিরালম্বং জ্ঞানালোক্যং ন সংশয়ঃ ॥ ৩৮॥
তপেদ্বর্ষসহস্রাণি একপাদস্থিতো নরঃ ।
একস্য ধ্যানয়োগস্য কলাং নার্হন্তি ষোডশীম্ ॥ ৩৯॥
আলোড্য চতুরো বেদান্ধর্মশাস্ত্রাণি সর্বদা ।
য়ো বৈ ব্রহ্ম ন জানাতি দর্বী পাকরসং য়থা ॥ ৪০॥
য়থা খরশ্চন্দনভারবাহী
সারস্য বাহী ন তু চন্দনস্য ।
এবং হি শাস্ত্রাণি বহূন্যধীত্য
সারং ত্বজানন্খরবদ্বহেত্সঃ ॥ ৪১॥
অনন্তকর্ম শৌচং চ জপো য়জ্ঞস্তথৈব চ ।
তীর্থয়াত্রাদিগমনং য়াবত্তত্ত্বং ন বিন্দতি ॥ ৪২॥
গবামনেকবর্ণানাং ক্ষীরং স্যাদেকবর্ণকম্ ।
ক্ষীরবদ্দৃশ্যতে জ্ঞানং দেহিনাং চ গবাং য়থা ॥ ৪৩॥
অহং ব্রহ্মেতি নিয়তং মোক্ষহেতুর্মহাত্মনাম্ ।
দ্বে পদে বন্ধমোক্ষায় ন মমেতি মমেতি চ ॥ ৪৪॥
মমেতি বধ্যতে জন্তুর্ন মমেতি বিমুচ্যতে ।
মনসো হ্যুন্মনীভাবাদ্দ্বৈতং নৈবোপলভ্যতে ।
য়দা য়াত্যুন্মনীভাবং তদা তত্পরমং পদম্ ॥ ৪৫॥
হন্যান্মুষ্টিভিরাকাশং ক্ষুধার্তঃ কণ্ডয়েত্তুষম্ ।
নাহং ব্রহ্মেতি জানাতি তস্য মুক্তির্ন জায়তে ॥ ৪৬॥
ইতি উত্তরগীতায়াং দ্বিতীয়োঽধ্যায়ঃ ॥
॥ তৃতীয়োঽধ্যায়ঃ ॥
য়োগী ব্যর্থক্রিয়ালাপপরিত্যাগেন শান্তধীঃ ।
তৃতীয়ে শরণং য়ায়াদ্ধরিমেবেতি কীর্ত্যতে ॥
শ্রীভগবানুবাচ-
অনন্তশাস্ত্রং বহুবেদিতব্য-
মল্পশ্চ কালো বহবশ্চ বিঘ্নাঃ ।
য়ত্সারভূতং তদুপাসিতব্যং
হংসো য়থা ক্ষীরমিবাম্বুমিশ্রম্ ॥ ১॥
পুরাণং ভারতং বেদশাস্ত্রাণি বিবিধানি চ ।
পুত্রদারাদিসংসারো য়োগাভ্যাসস্য বিঘ্নকৃত্ ॥ ২॥
ইদং জ্ঞানমিদং জ্ঞেয়ং য়ঃ সর্বং জ্ঞাতুমিচ্ছতি ।
অপি বর্ষসহস্রায়ুঃ শাস্ত্রান্তং নাধিগচ্ছতি ॥ ৩॥
বিজ্ঞেয়োঽক্ষরতন্মাত্রং জীবিতং চাপি চঞ্চলম্ ।
বিহায় শাস্ত্রজালানি য়ত্সত্যং তদুপাস্যতাম্ ॥ ৪॥
পৃথিব্যাং য়ানি ভূতানি জিহ্বোপস্থনিমিত্তিকম্ ।
জিহ্বোপস্থপরিত্যাগে পৃথিব্যাং কিং প্রয়োজনম্ ॥ ৫॥
তীর্থানি তোয়পূর্ণানি দেবান্পাষাণমৃন্ময়ান্ ।
য়োগিনো ন প্রপদ্যন্তে আত্মধ্যানপরায়ণাঃ ॥ ৬॥
অগ্নির্দেবো দ্বিজাতীনাং মুনীনাং হৃদি দৈবতম্ ।
প্রতিমা স্বল্পবুদ্ধীনাং সর্বত্র সমদর্শিনাম্ ॥ ৭॥
সর্বত্রাবস্থিতং শান্তং ন প্রপশ্যেজ্জনার্দনম্ ।
জ্ঞানচক্ষুর্বিহীনত্বাদন্ধঃ সূর্যমিবোদিতম্ ॥ ৮॥
য়ত্র য়ত্র মনো য়াতি তত্র তত্র পরং পদম্ ।
তত্র তত্র পরং ব্রহ্ম সর্বত্র সমবস্থিতম্ ॥ ৯॥
দৃশ্যন্তে দৃশি রূপাণি গগনং ভাতি নির্মলম্ ।
অহমিত্যক্ষরং ব্রহ্ম পরমং বিষ্ণুমব্যয়ম্ ॥ ১০॥
দৃশ্যতে চেত্খগাকারং খগাকারং বিচিন্তয়েত্ ।
সকলং নিষ্কলং সূক্ষ্মং মোক্ষদ্বারেণ নির্গতম্ ॥ ১১॥
অপবর্গস্য নির্বাণং পরমং বিষ্ণুমব্যয়ম্ ।
সর্বজ্যোতির্নিরাকারং সর্বভূতগুণান্বিতম্ ॥ ১২॥
সর্বত্র পরমাত্মানং অহমাত্মা পরমব্যয়ম্ ।
অহং ব্রহ্মেতি য়ঃ সর্বং বিজানাতি নরঃ সদা ।
হন্যাত্স্বয়মিমান্কামান্সর্বাশী সর্ববিক্রয়ী ॥ ১৩॥
নিমিষং নিমিষার্ধং বা শীতাশীতনিবারণম্ ।
অচলা কেশবে ভক্তির্বিভবৈঃ কিং প্রয়োজনম্ ॥ ১৪॥
ভিক্ষান্নং দেহরক্ষার্থং বস্ত্রং শীতনিবারণম্ ।
অশ্মানং চ হিরণ্যং চ শাকং শাল্যোদনং তথা ॥ ১৫॥
সমানং চিন্তয়েদ্যোগী য়দি চিন্ত্যমপেক্ষতে ।
ভূতবস্তুন্যশোচিত্বং পুনর্জন্ম ন বিদ্যতে ॥ ১৬॥
আত্ময়োগমবোচদ্যো ভক্তিয়োগশিরোমণিম্ ।
তং বন্দে পরমানন্দং নন্দনন্দনমীশ্বরম্ ॥
ইতি উত্তরগীতায়াং তৃতীয়োঽধ্যায়ঃ ॥
