॥ অগস্ত্যগীতা ॥
শ্রীবরাহ উবাচ ।
শ্রুত্বা দুর্বাসসো বাক্যং ধরণীব্রতমুত্তমম্ ।
য়য়ৌ সত্যতপাঃ সদ্যো হিমবত্পার্শ্বমুত্তমম্ ॥ ৫১.১॥
পুষ্পভদ্রা নদী য়ত্র শিলা চিত্রশিলা তথা ।
বটো ভদ্রবটো য়ত্র তত্র তস্যাশ্রমো বভৌ ।
তত্রোপরি মহত্ তস্য চরিতং সম্ভবিষ্যতি ॥ ৫১.২॥
ধরণ্যুবাচ ।
বহুকল্পসহস্ত্রাণি ব্রতস্যাস্য সনাতন ।
ময়া কৃতস্য তপসস্তন্ময়া বিস্মৃতং প্রভো ॥ ৫১.৩॥
ইদানীং ত্বত্প্রসাদেন স্মরণং প্রাক্তনং মম ।
জাতং জাতিস্মরা চাস্মি বিশোকা পরমেশ্বর ॥ ৫১.৪॥
য়দি নাম পরং দেব কৌতুকং হৃদি বর্ততে ।
অগস্ত্যঃ পুনরাগত্য ভদ্রাশ্বস্য নিবেশনম্ ।
য়চ্চকার স রাজা চ তন্মমাচক্ষ্ব ভূধর ॥ ৫১.৫॥
শ্রীবরাহ উবাচ ।
প্রত্যাগতমৃষিং দৃষ্ট্বা ভদ্রাশ্বঃ শ্বেতবাহনঃ ।
বরাসনগতং দৃষ্ট্বা কৃত্বা পূজাং বিশেষতঃ ।
অপৃচ্ছন্মোক্ষধর্মাখ্যং প্রশ্নং সকলধারিণি ॥ ৫১.৬॥
ভদ্রাশ্ব উবাচ ।
ভগবন্ কর্মণা কেন ছিদ্যতে ভবসংসৃতিঃ ।
কিং বা কৃত্বা ন শোচন্তি মূর্ত্তামূর্ত্তোপপত্তিষু ॥ ৫১.৭॥
অগস্ত্য উবাচ ।
শ্রৃণু রাজন্ কথাং দিব্যাং দূরাসন্নব্যবস্থিতাম্ ।
দৃশ্যাদৃশ্যবিভাগোত্থাং সমাহিতমনা নৃপ ॥ ৫১.৮॥
নাহো ন রাত্রির্ন দিশোঽদিশশ্চ
ন দ্যৌর্ন দেবা ন দিনং ন সূর্যঃ ।
তস্মিন্ কালে পশুপালেতি রাজা
স পালয়ামাস পশূননেকান্ ॥ ৫১.৯॥
তান্ পালয়ন্ স কদাচিদ্ দিদৃক্ষুঃ
পূর্বং সমুদ্রং চ জগাম তূর্ণম্ ।
অনন্তপারস্য মহোদধেস্তু
তীরে বনং তত্র বসন্তি সর্পাঃ ॥ ৫১.১০॥
অষ্টৌ দ্রুমাঃ কামবহা নদী চ
তুর্যক্ চোদ্র্ধ্বং বভ্রমুস্তত্র চান্যে ।
পঞ্চ প্রধানাঃ পুরুষাস্তথৈকাং
স্ত্রিয়ং বিভ্রতে তেজসা দীপ্যমানাম্ ॥ ৫১.১১॥
সাঽপি স্ত্রী স্বে বক্ষসি ধারয়ন্তী
সহস্ত্রসূর্যপ্রতিমং বিশালম্ ।
তস্যাধরস্ত্রির্বিকারস্ত্রিবর্ণ-
স্তং রাজানং পশ্য পরিভ্রমন্তম্ ॥ ৫১.১২॥
তূষ্ণীম্ভূতা মৃতকল্পা ইবাসন্
নৃপোঽপ্যসৌ তদ্বনং সংবিবেশ ।
তস্মিন্ প্রবিষ্টে সর্ব এতে বিবিশু-
র্ভয়াদৈক্যং গতবন্তঃ ক্ষণেন ॥ ৫১.১৩॥
তৈঃ সর্পৈঃ স নৃপো দুর্বিনীতৈঃ
সংবেষ্টিতো দস্যুভিশ্চিন্তয়ানঃ ।
কথং চৈতেন ভবিষ্যন্তি য়েন
কথং চৈতে সংসৃতাঃ সম্ভবেয়ুঃ ॥ ৫১.১৪॥
এবং রাজ্ঞশ্চিন্তয়তস্ত্রিবর্ণঃ পুরুষঃ পরঃ ।
শ্বেতং রক্তং তথা কৃষ্ণং ত্রিবর্ণং ধারয়ন্নরঃ ॥ ৫১.১৫॥
স সঞ্জ্ঞাং কৃতবান্ মহ্যমপরোঽথ ক্ব য়াস্যসি ।
এবং তস্য ব্রুবাণস্য মহন্নাম ব্যজায়ত ॥ ৫১.১৬॥
তেনাপি রাজা সংবীতঃ স বুধ্যস্বেতি চাব্রবীত্ ।
এবমুক্তে ততঃ স্ত্রী তু তং রাজানং রুরোধ হ ॥ ৫১.১৭॥
মায়াততং তং মা ভৈষ্ট ততোঽন্যঃ পুরুষো নৃপম্ ।
সংবেষ্ট্য স্থিতবান্ বীরস্ততঃ সর্বেশ্বরেশ্বরঃ ॥ ৫১.১৮॥
ততোঽন্যে পঞ্চ পুরুষা আগত্য নৃপসত্তমম্ ।
সংবিষ্ট্য সংস্থিতাঃ সর্বে ততো রাজা বিরোধিতঃ ॥ ৫১.১৯॥
রুদ্ধে রাজনি তে সর্বে একীভূতাস্তু দস্যবঃ ।
মথিতুং শস্ত্রমাদায় লীনাঽন্যোঽন্যং ততো ভয়াত্ ॥ ৫১.২০॥
তৈর্লীনৈর্নৃপর্তের্বেশ্ম বভৌ পরমশোভনম্ ।
অন্যেষামপি পাপানাং কোটিঃ সাগ্রাভবন্নৃপ ॥ ৫১.২১॥
গৃহে ভূসলিলং বহ্নিঃ সুখশীতশ্চ মারুতঃ ।
সাবকাশানি শুভ্রাণি পঞ্চৈকোনগুণানি চ ॥ ৫১.২২॥
একৈব তেষাং সুচিরং সংবেষ্ট্যাসজ্যসংস্থিতা ।
এবং স পশুপালোঽসৌ কৃতবানঞ্জসা নৃপ ॥ ৫১.২৩॥
তস্য তল্লাঘবং দৃষ্ট্বা রূপং চ নৃপতের্মৃধে ।
ত্রিবর্ণঃ পুরুষো রাজন্নব্রবীদ্ রাজসত্তমম্ ॥ ৫১.২৪॥
ত্বত্পুত্রোঽস্মি মহারাজ ব্রূহি কিং করবাণি তে ।
অস্মাভির্বন্ধুমিচ্ছদ্ভির্ভবন্তং নিশ্চয়ঃ কৃতঃ ॥ ৫১.২৫॥
য়দি নাম কৃতাঃ সর্বে বয়ং দেব পরাজিতাঃ ।
এবমেব শরীরেষু লীনাস্তিষ্ঠাম পার্থিব ॥ ৫১.২৬॥
মর্য্যেকে তব পুত্রত্বং গতে সর্বেষু সম্ভবঃ ।
এবমুক্তস্ততো রাজা তং নরং পুনরব্রবীত্ ॥ ৫১.২৭॥
পুত্রো ভবতি মে কর্ত্তা অন্যেষামপি সত্তম ।
য়ুষ্মত্সুখৈর্নরৈর্ভাবৈর্নাহং লিপ্যে কদাচন ॥ ৫১.২৮॥
এবমুক্ত্বা স নৃপতিস্তমাত্মজমথাকরোত্ ।
তৈর্বিমুক্তঃ স্বয়ং তেষাং মধ্যে স বিররাম হ ॥ ৫১.২৯॥
॥ ইতি শ্রীবরাহপুরাণে ভগবচ্ছাস্ত্রে একপঞ্চাশোঽধ্যায়ঃ ॥ ৫১॥
অগস্ত্য উবাচ ।
স ত্রিবর্ণো নৃপোত্সৃষ্টঃ স্বতন্ত্রত্বাচ্চ পার্থিব ।
অহং নামানমসৃজত্ পুত্রং পুত্রস্ত্রিবর্ণকম্ ॥ ৫২.১॥
তস্যাপি চাভবত্ কন্যা অববোধস্বরূপিণী ।
সা তু বিজ্ঞানদং পুত্রং মনোহ্বং বিসসর্জ ॥ ৫২.২॥
তস্যাপি সর্বরূপাঃ স্যুস্তনয়াঃ পঞ্চভোগিনঃ ।
য়থাসঙ্খ্যেন পুত্রাস্তু তেষামক্ষাভিধানকাঃ ॥ ৫২.৩॥
এতে পূর্বং দস্যবঃ স্যুস্ততো রাজ্ঞা বশীকৃতাঃ ।
অমূর্ত্তা ইব তে সর্বে চক্রুরায়তনং শুভম্ ॥ ৫২.৪॥
নবদ্বারং পুরং তস্য ত্বেকস্তম্ভং চতুষ্পথম্ ।
নদীসহস্ত্রসঙ্কীর্ণ জলকৃত্য সমাস্থিতম্ ॥ ৫২.৫॥
তত্পুরং তে প্রবিবিশুরেকীভূতাস্ততো নব ।
পুরুষো মূর্ত্তিমান্ রাজা পশুপালোঽভবত্ ক্ষণাত্ ॥ ৫২.৬॥
ততস্তত্পুরসংস্থস্তু পশুপালো মহানৃপঃ ।
সংসূচ্য বাচকাঞ্ছব্দান্ বেদান্ সস্মার তত্পুরে ॥ ৫২.৭॥
আত্মস্বরূপিণো নিত্যাস্তদুক্তানি ব্রতানি চ ।
নিয়মান্ ক্রতবশ্চৈব সর্বান্ রাজা চকার হ ॥ ৫২.৮॥
স কদাচিন্নৃপঃ খিন্নঃ কর্মকাণ্ডং প্ররোচয়ন্ ।
সর্বজ্ঞো য়োগনিদ্রায়াং স্থিত্বা পুত্রং সসর্জ হ ॥ ৫২.৯॥
চতুর্বক্ত্রং চতুর্বাহুং চতুর্বেদং চতুষ্পথম্ ।
তস্মাদারভ্য নৃপতের্বশে পশ্বাদয়ঃ স্থিতাঃ ॥ ৫২.১০॥
তস্মিন্ সমুদ্রে স নৃপো বনে তস্মিংস্তথৈব চ ।
তৃণাদিষু নৃপস্সৈব হস্ত্যাদিষু তথৈব চ ।
সমোভবত্ কর্মকাণ্ডাদনুজ্ঞায় মহামতে ॥ ৫২.১১॥
॥ ইতি শ্রীবরাহপুরাণে ভগবচ্ছাস্ত্রে দ্বাপঞ্চাশোঽধ্যায়ঃ ॥ ৫২॥
ভদ্রাশ্ব উবাচ ।
মত্প্রশ্নবিষয়ে ব্রহ্মন্ কথেয়ং কথিতা ত্বয়া ।
তস্যা বিভূতিরভবত্ কস্য কেন কৃতেন হ ॥ ৫৩.১॥
অগস্ত্য উবাচ ।
আগতেয়ং কথা চিত্রা সর্বস্য বিষয়ে স্থিতা ।
ত্বদ্দেহে মম দেহে চ সর্বজন্তুষু সা সমা ॥ ৫৩.২॥
তস্যাং সম্ভূতিমিচ্ছন্ য়স্তস্যোপায়ং স্বয়ং পরম্ ।
পশুপালাত্ সমুত্পন্নো য়শ্চতুষ্পাচ্চতুর্মুখঃ ॥ ৫৩.৩॥
স গুরুঃ স কথায়াস্তু তস্যাশ্চৈব প্রবর্ত্তকঃ ।
তস্য পুত্রঃ স্বরো নাম সপ্তমূর্তিংরসৌ স্মৃতঃ ॥ ৫৩.৪॥
তেন প্রোক্তং তু য়ত্কিঞ্চিত্ চতুর্ণাং সাধনং নৃপ ।
ঋগর্থানাং চতুর্ভিস্তে তদ্ভক্ত্যারাধ্যতাং য়য়ুঃ ॥ ৫৩.৫॥
চতুর্ণাং প্রথমো য়স্তু চতুঃশ্রৃঙ্গসমাস্থিতঃ ।
বৃষদ্বিতীয়স্তত্প্রোক্তমার্গেণৈব তৃতীয়কঃ ।
চতুর্থস্তত্প্রণীতস্তাং পূজ্য ভক্ত্যা সুতং ব্রজেত্ ॥ ৫৩.৬॥
সপ্তমূর্ত্তেস্তু চরিতং শুশ্রুংবুঃ প্রথমং নৃপ ।
ব্রহ্মচর্যেণ বর্ত্তেত দ্বিতীয়োঽস্য সনাতনঃ ॥ ৫৩.৭॥
ততো ভৃত্যাদিভরণং বৃষভারোহণং ত্রিষু ।
বনবাসশ্চ নির্দ্দিষ্ট আত্মস্থে বৃষভে সতি ॥ ৫৩.৮॥
অহমস্মি বদত্যন্যশ্চতুর্দ্ধা একধা দ্বিধা ।
ভেদভিন্নসহোত্পন্নাস্তস্যাপত্যানি জজ্ঞিরে ॥ ৫৩.৯॥
নিত্যানিত্যস্বরূপাণি দৃষ্ট্বা পূর্বং চতুর্মুখঃ ।
চিন্তয়ামাস জনকং কথং পশ্যাম্যহং নৃপ ॥ ৫৩.১০॥
মদীয়স্য পিতুর্যে হি গুণা আসন্ মহাত্মনঃ ।
ন তে সম্প্রতি দৃশ্যন্তে স্বরাপত্যেষু কেষুচিত্ ॥ ৫৩.১১॥
পিতুঃ পুত্রস্য য়ঃ পুত্রঃ স পিতামহনামবান্ ।
এবং শ্রুতিঃ স্থিতা চেয়ং স্বরাপত্যেষু নান্যথা ॥ ৫৩.১২॥
ক্বাপি সম্পত্স্যতে ভাবো দ্রষ্টব্যশ্চাপি তে পিতা ।
এবং নীতেঽপি কিং কার্যমিতি চিন্তাপরোঽভবত্ ॥ ৫৩.১৩॥
তস্য চিন্তয়তঃ শস্ত্রং পিতৃকং পুরতো বভৌ ।
তেন শস্ত্রেণ তং রোষান্মমন্থ স্বরমন্তিকে ॥ ৫৩.১৪॥
তস্মিন্ মথিতমাত্রে তু শিরস্তস্যাপি দুর্গ্রহম্ ।
নালিকেরফলাকারং চতুর্বক্ত্রোঽন্বপশ্যত ॥ ৫৩.১৫॥
তচ্চাবৃতং প্রধানেন দশধা সংবৃতো বভৌ ।
চতুষ্পাদেন শস্ত্রেণ চিচ্ছেদ তিলকাণ্ডবত্ ॥ ৫৩.১৬॥
প্রকামং তিলসঞ্চ্ছিন্নে তদমূলৌ ন মে বভৌ ।
অহং ত্বহং বদন্ ভূতং তমপ্যেবমথাচ্ছিনত্ ॥ ৫৩.১৭॥
তস্মিন্ ছিন্নে তদস্যাংসে হ্রস্বমন্যমবেক্ষত ।
অহং ভূতাদি বঃ পঞ্চ বদন্তং ভূতিমন্তিকাত্ ॥ ৫৩.১৮॥
তমপ্যেবমথো ছিত্ত্বা পঞ্চাশূন্যমমীক্ষত ।
কৃত্বাবকাশং তে সর্বে জল্পন্ত ইদমন্তিকাত্ ॥ ৫৩.১৯॥
তমপ্যসঙ্গশস্ত্রেণ চিচ্ছেদ তিলকাণ্ডবত্ ।
তস্মিঞ্চ্ছিন্নে দশাংশেন হ্রস্বমন্যমপশ্যত ॥ ৫৩.২০॥
পুরুষং রূপশস্ত্রেণ তং ছিত্ত্বাঽন্যমপশ্যত ।
তদ্বদ্ হ্রস্বং সিতং সৌম্যং তমপ্যেবং তদাঽকরোত্ ॥ ৫৩.২১॥
এবং কৃতে শরীরং তু দদর্শ স পুনঃ প্রভুঃ ।
স্বকীয়মেবাকস্যান্তঃ পিতরং নৃপসত্তম ॥ ৫৩.২২॥
ত্রসরেণুসমং মূর্ত্যা অব্যক্তং সর্বজন্তুষু ।
সমং দৃষ্ট্বা পরং হর্ষং উভে বিসস্বরার্ত্তবিত্ ॥ ৫৩.২৩॥
এবংবিধোঽসৌ পুরুষঃ স্বরনামা মহাতপাঃ ।
মূর্ত্তিস্তস্য প্রবৃত্তাখ্যং নিবৃত্তাখ্যং শিরো মহত্ ॥ ৫৩.২৪॥
এতস্মাদেব তস্যাশু কথয়া রাজসত্তম ।
সম্ভূতিরভবদ্ রাজন্ বিবৃত্তেস্ত্বেষ এব তু ॥ ৫৩.২৫॥
এষেতিহাসঃ প্রথমঃ সর্বস্য জগতো ভৃশম্ ।
য় ইমং বেত্তি তত্ত্বেন সাক্ষাত্ কর্মপরো ভবেত্ ॥ ৫৩.২৬॥
॥ ইতি শ্রীবরাহপুরাণে ভগবচ্ছাস্ত্রে ত্রিপঞ্চাশোঽধ্যায়ঃ ॥ ৫৩॥
ভদ্রাশ্ব উবাচ ।
বিজ্ঞানোত্পত্তিকামস্য ক আরাধ্যো ভবেদ্ দ্বিজ ।
কথং চারাধ্যতেঽসৌ হি এতদাখ্যাহি মে দ্বিজ ॥ ৫৪.১॥
অগস্ত্য উবাচ ।
বিষ্ণুরেব সদারাধ্যঃ সর্বদেবৈরপি প্রভুঃ ।
তস্যোপায়ং প্রবক্ষ্যামি য়েনাসৌ বরদো ভবেত্ ॥ ৫৪.২॥
রহস্যং সর্বদেবানাং মুনীনাং মনুজাংস্তথা ।
নারায়ণঃ পরো দেবস্তং প্রণম্য ন সীদতি ॥ ৫৪.৩॥
শ্রূয়তে চ পুরা রাজন্ নারদেন মহাত্মনা ।
কথিতং তুষ্টিদং বিষ্ণোর্ব্র্তমপ্সরসাং তথা ॥ ৫৪.৪॥
নারদস্তু পুরা কল্পে গতবান্ মানসং সরঃ ।
স্নানার্থং তত্র চজাপশ্যত্ সর্বমপ্সরসাং গণম্ ॥ ৫৪.৫॥
তাস্তং দৃষ্ট্বা বিলাসিন্যো জটামুকুটধারিণম্ ।
অস্থিচর্মাবশেষং তু ছত্রদণ্ডকপালিনম্ ॥ ৫৪.৬॥
দেবাসুরমনুষ্যাণাং দিদৃক্ষুং কলহপ্রিয়ম্ ।
ব্রহ্মপুত্রং তপোয়ুক্তং পপ্রচ্ছুস্তা বরাঙ্গনাঃ ॥ ৫৪.৭॥
অপ্সরস ঊচুঃ ।
ভগবন্ ব্রহ্মতনয় ভর্তৃকামা বয়ং দ্বিজ ।
নারায়ণশ্চ ভর্ত্তা নো য়থা স্যাত্ তত্ প্রচক্ষ্ব নঃ ॥ ৫৪.৮॥
নারদ উবাচ ।
প্রণামপূর্বকঃ প্রশ্নঃ সর্বত্র বিহিতঃ শুভঃ ।
স চ মে ন কৃতো গর্বাদ্ য়ুষ্মাভির্যৌবনস্ময়াত্ ॥ ৫৪.৯॥
তথাপি দেবদেবস্য বিষ্ণোর্যন্নামকীর্তিতম্ ।
ভবতীভিস্তথা ভর্ত্তা ভবত্বিতি হরিঃ কৃতঃ ।
তন্নামোচ্চারণাদেব কৃতং সর্বং ন সংশয়ঃ ॥ ৫৪.১০॥
ইদানীং কথয়াম্যাশু ব্রতং য়েন হরিঃ স্বয়ম্ ।
বরদত্বমবাপ্নোতি ভর্তৃত্বং চ নিয়চ্ছতি ॥ ৫৪.১১॥
নারদ উবাচ ।
বসন্তে শুক্লপক্ষস্য দ্বাদশী য়া ভবেচ্ছুভা ।
তস্যামুপোষ্য বিধিবন্ নিশায়াং হরিমর্চ্চয়েত্ ॥ ৫৪.১২॥
পর্যঙ্কাস্তরণং কৃত্বা নানাচিত্রসমন্বিতম্ ।
তত্র লক্ষ্ম্যা য়ুতং রৌপ্যং হরিং কৃত্বা নিবেশয়েত্ ॥ ৫৪.১৩॥
তস্যোপরি ততঃ পুষ্পৈর্মণ্ডপং কারয়েদ্ বুধঃ ।
নৃত্যবাদিত্রগেয়ৈশ্চ জাগরং তত্র কারয়েত্ ॥ ৫৪.১৪॥
মনোভবায়েতি শির অনঙ্গায়েতি বৈ কটিম্ ।
কামায় বাহুমূলে তু সুশাস্ত্রায়েতি চোদরম্ ॥ ৫৪.১৫॥
মন্মথায়েতি পাদৌ তু হরয়েতি চ সর্বতঃ ।
পুষ্পৈঃ সম্পূজ্য দেবেশং মল্লিকাজাতিভিস্তথা ॥ ৫৪.১৬॥
পশ্চাচ্চতুর আদায় ইক্ষুদণ্ডান্ সুশোভনান্ ।
চতুর্দিক্ষু ন্যসেত্ তস্য দেবস্য প্রণতো নৃপ ॥ ৫৪.১৭॥
এবং কৃত্বা প্রভাতে তু প্রদদ্যাদ্ ব্রাহ্মণায় বৈ ।
বেদবেদাঙ্গয়ুক্তায় সম্পূর্ণাঙ্গায় ধীমতে ॥ ৫৪.১৮॥
ব্রাহ্মণাংশ্চ তথা পূজ্য ব্রতমেতত্ সমাপয়েত্ ।
এবং কৃতে তথা বিষ্ণুর্ভর্ত্তা বো ভবিতা ধ্রুবম্ ॥ ৫৪.১৯॥
অকৃত্বা মত্প্রণামং তু পৃষ্টো গর্বেণ শোভনাঃ ।
অবমানস্য তস্যায়ং বিপাকো বো ভবিষ্যতি ॥ ৫৪.২০॥
এতস্মিন্নেব সরসি অষ্টাবক্রো মহামুনিঃ ।
তস্যোপহাসং কৃত্বা তু শাপং লপ্স্যথ শোভনাঃ ॥ ৫৪.২১॥
ব্রতেনানেন দেবেশং পতিং লব্ধ্বাঽভিমানতঃ ।
অবমানেঽপহরণং গোপালৈর্বো ভবিষ্যতি ।
পুরা হর্ত্তা চ কন্যানাং দেবো ভর্ত্তা ভবিষ্যতি ॥ ৫৪.২২॥
অগস্ত্য উবাচ ।
এবমুক্ত্বা স দেবর্ষিঃ প্রয়য়ৌ নারদঃ ক্ষণাত্ ।
তা অপ্যেতদ্ ব্রতং চক্রুস্তুষ্টশ্চাসাং স্বয়ং হরিঃ ॥ ৫৪.২৩॥
॥ ইতি শ্রীবরাহপুরাণে ভগবচ্ছাস্ত্রে চতুঃপঞ্চাশোঽধ্যায়ঃ ॥ ৫৪॥
অগস্ত্য উবাচ ।
শ্রৃণু রাজন্ মহাভাগ ব্রতানামুত্তমং ব্রতম্ ।
য়েন সম্প্রাপ্যতে বিষ্ণুঃ শুভেনৈব ন সংশয়ঃ ॥ ৫৫.১॥
মার্গশীর্ষেঽথ মাসে তু প্রথমাহ্নাত্ সমারভেত্ ।
একভক্তং সিতে পক্ষে য়াবত্ স্যাদ্ দশমী তিথিঃ ॥ ৫৫.২॥
ততো দশম্যাং মধ্যাহ্নে স্নাত্বা বিষ্ণুং সমর্চ্য চ ।
ভক্ত্যা সঙ্কল্পয়েত্ প্রাগ্বদ্ দ্বাদশীং পক্ষতো নৃপ ॥ ৫৫.৩॥
তামপ্যেবমুষিত্বা চ য়বান্ বিপ্রায় দাপয়েত্ ।
কৃষ্ণায়েতি হরির্বাচ্যো দানে হোমে তথার্চ্চনে ॥ ৫৫.৪॥
চাতুর্মাস্যমথৈবং তু ক্ষপিত্বা রাজসত্তম ।
চৈত্রাদিষু পুনস্তদ্বদুপোষ্য প্রয়তঃ সুধীঃ ।
সক্তুপাত্রাণি বিপ্রাণাং সহিরণ্যানি দাপয়েত্ ॥ ৫৫.৫॥
শ্রাবণাদিষু মাসেষু তদ্বচ্ছালিং প্রদাপয়েত্ ।
ত্রিষু মাসেষু য়াবচ্চ কার্ত্তিকস্যাদিরাগতঃ ॥ ৫৫.৬॥
তমপ্যেবং ক্ষপিত্বা তু দশম্যাং প্রয়তঃ শুচিঃ ।
অর্চয়িত্বা হরিং ভক্ত্যা মাসনাম্না বিচক্ষণঃ ॥ ৫৫.৭॥
সঙ্কল্পং পূর্ববদ্ ভক্ত্যা দ্বাদশ্যাং সংয়তেন্দ্রিয়ঃ ।
একাদশ্যাং য়থাশক্ত্যা কারয়েত্ পৃথিবীং নৃপ ॥ ৫৫.৮॥
কাঞ্চনাঙ্গাং চ পাতালকুলপর্বতসংয়ুতাম্ ।
ভূমিন্যাসবিধানেন স্থাপয়েত্ তাং হরেঃ পুরঃ ॥ ৫৫.৯॥
সিতবস্ত্রয়ুগচ্ছন্নাং সর্ববীজসমন্বিতাম্ ।
সম্পূজ্য প্রিয়দত্তেতি পঞ্চরত্নৈর্বিচক্ষণঃ ॥ ৫৫.১০॥
জাগরং তত্র কুর্বীত প্রভাতে তু পুনর্দ্বিজান্ ।
আমন্ত্র্যং সঙ্খ্যয়া রাজংশ্চতুর্বিংশতি য়াবতঃ ॥ ৫৫.১১॥
তেষাং একৈকশো গাং চ অনড্বাহং চ দাপয়েত্ ।
একৈকং বস্ত্রয়ুগ্মং চ অঙ্গুলীয়কমেব চ ॥ ৫৫.১২॥
কটকানি চ সৌবর্ণকর্ণাভরণকানি চ ।
একৈকং গ্রামমেতেষাং রাজা রাজন্ প্রদাপয়েত্ ॥ ৫৫.১৩॥
তন্মধ্যমং সয়ুগ্মং তু সর্বমাদ্যং প্রদাপয়েত্ ।
স্বশক্ত্যাভরণং চৈব দরিদ্রস্য স্বশক্তিতঃ ॥ ৫৫.১৪॥
য়থাশক্ত্যা মহীং কৃত্বা কাঞ্চনীং গোয়ুগং তথা ।
বস্ত্রয়ুগ্মং চ দাতব্যং য়থাবিভবশক্তিতঃ ॥ ৫৫.১৫॥
গাং য়ুগ্মাভরণাত্ সর্বং সহিরণ্যং চ কারয়েত্ ।
এবং কৃতে তথা কৃষ্ণশুক্লদ্বাদশ্যমেব চ ॥ ৫৫.১৬॥
রৌপ্যাং বা পৃথিবীং কৃত্বা য়থাবিভবশক্তিতঃ ।
দাপয়েদ্ ব্রাহ্মণানাং তু তথা তেষাং চ ভোজনম্ ।
উপানহৌ য়থাশক্ত্যা পাদুকে ছত্রিকাং তথা ॥ ৫৫.১৭॥
এতান্ দত্ত্বা বদেদেবং কৃষ্ণো দামোদরো মম ।
প্রীয়তাং সর্বদা দেবো বিশ্বরূপো হরির্মম ॥ ৫৫.১৮॥
দানে চ ভোজনে চৈব কৃত্বা য়ত্ ফলমাপ্যতে ।
তন্ন শক্যং সহস্ত্রেণ বর্ষাণামপি কীর্তিতুম্ ॥ ৫৫.১৯॥
তথাপ্যুদ্দেশতঃ কিঞ্চিত্ ফলং বক্ষ্যামি তেঽনঘ ।
ব্রতস্যাস্য পুরা বৃত্তং শুভান্যস্য শ্রৃণুষ্ব তত্ ॥ ৫৫.২০॥
আসীদাদিয়ুগে রাজা ব্রহ্মবাদী দৃঢব্রতঃ ।
স পুত্রকামঃ পপ্রচ্ছ ব্রহ্মাণং পরমেষ্ঠিনম্ ।
তস্যেদং ব্রতমাচখ্যৌ ব্রহ্মা স কৃতবাংস্তথা ॥ ৫৫.২১॥
তস্য ব্রতান্তে বিশ্বাত্মা স্বয়ং প্রত্যক্ষতাং য়য়ৌ ।
তুষ্টশ্চোবাচ ভো রাজন্ বরো মে ব্রিয়তাং বরঃ ॥ ৫৫.২২॥
রাজোবাচ ।
পুত্রং মে দেহি দেবেশ বেদমন্ত্রবিশারদম্ ।
য়াজকং য়জনাসক্তং কীর্ত্যা য়ুক্তং চিরাভুষম্ ।
অসঙ্খ্যাতগুণং চৈব ব্রহ্মভূতমকল্মষম্ ॥ ৫৫.২৩॥
এবমুক্ত্বা ততো রাজা পুনর্বচনমব্রবীত্ ।
মমাপ্যন্তে শুভং স্থানং প্রয়চ্ছ পরমেশ্বর ।
য়তন্মুনিপদং নাম য়ত্র গত্বা ন শোচতি ॥ ৫৫.২৪॥
এবমস্ত্বিতি তং দেবঃ প্রোক্ত্বা চাদর্শনং গতঃ ।
তস্যাপি রাজ্ঞঃ পুত্রোঽভূদ্ বত্সপ্রীর্নাম নামতঃ ॥ ৫৫.২৫॥
বেদবেদাঙ্গসম্পন্নো য়জ্ঞয়াজী বহুশ্রুতঃ ।
তস্য কীর্ত্তির্মহারাজ বিস্তৃতা ধরণীতলে ॥ ৫৫.২৬॥
রাজাঽপি তং সুতং লব্ধ্বা বিষ্ণুদত্তং প্রতাপিনম্ ।
জগাম তপসে য়ুক্তঃ সর্বদ্বন্দ্বান্ প্রহায় সঃ ॥ ৫৫.২৭॥
আরাধয়ামাস হরিং নিরাহারো জিতেন্দ্রিয়ঃ ।
হিমবত্পর্বতে রম্যে স্তুতিং কুর্বংস্তদা নৃপঃ ॥ ৫৫.২৮॥
ভদ্রাশ্ব উবাচ ।
কীদৃশী সা স্তুতির্ব্রহ্মন্ য়াং চকার স পার্থিবঃ ।
কিং চ তস্যাভবদ্ দেবং স্তুবতঃ পুরুষোত্তমম্ ॥ ৫৫.২৯॥
দুর্বাসা উবাচ ।
হিমবন্তং সমাশ্রিত্য রাজা তদ্গতমানসঃ ।
স্তুতিং চকার দেবায় বিষ্ণবে প্রভবিষ্ণবে ॥ ৫৫.৩০॥
রাজোবাচ ।
ক্ষরাক্ষরং ক্ষীরসমুদ্রশায়িনং
ক্ষিতীধরং মূর্তিমতাং পরং পদম্ ।
অতীন্দ্রিয়ং বিশ্বভুজাং পুরঃ কৃতং
নিরাকৃতং স্তৌমি জনার্দনং প্রভুম্ ॥ ৫৫.৩১॥
ত্বমাদিদেবঃ পরমার্থরূপী
বিভুঃ পুরাণঃ পুরুষোত্তমশ্চ ।
অতীন্দ্রিয়ো বেদবিদাং প্রধানঃ
প্রপাহি মাং শঙ্খগদাস্ত্রপাণে ॥ ৫৫.৩২॥
কৃতং ত্বয়া দেব সুরাসুরাণাং
সঙ্কীর্ত্যতেঽসৌ চ অনন্তমূর্তে ।
সৃষ্ট্যর্থমেতত্ তব দেব বিষ্ণো
ন চেষ্টিতং কূটগতস্য তত্স্যাত্ ॥ ৫৫.৩৩॥
তথৈব কূর্মত্বমৃগত্বমুচ্চৈ -
স্ত্বয়া কৃতং রূপমনেকরূপ ।
সর্বজ্ঞভাবাদসকৃচ্চ জন্ম
সঙ্কীর্ত্ত্যতে তেঽচ্যুত নৈতদস্তি ॥ ৫৫.৩৪॥
নৃসিংহ নমো বামন জমদগ্নিনাম
দশাস্যগোত্রান্তক বাসুদেব ।
নমোঽস্তু তে বুদ্ধ কল্কিন্ খগেশ
শম্ভো নমস্তে বিবুধারিনাশন ॥ ৫৫.৩৫॥
নমোঽস্তু নারায়ণ পদ্মনাভ
নমো নমস্তে পুরুষোত্তমায় ।
নমঃ সমস্তামরসঙ্ঘপূজ্য
নমোঽস্তু তে সর্ববিদাং প্রধান ॥ ৫৫.৩৬॥
নমঃ করালাস্য নৃসিংহমূর্ত্তে
নমো বিশালাদ্রিসমান কূর্ম ।
নমঃ সমুদ্রপ্রতিমান মত্স্য
নমামি ত্বাং ক্রোডরূপিননন্ত ॥ ৫৫.৩৭॥
সৃষ্ট্যর্থমেতত্ তব দেব চেষ্টিতং
ন মুখ্যপক্ষে তব মূর্ত্তিতা বিভো ।
অজানতা ধ্যানমিদং প্রকাশিতং
নৈভির্বিনা লক্ষ্যসে ত্বং পুরাণ ॥ ৫৫.৩৮॥
আদ্যো মখস্ত্বং স্বয়মেব বিষ্ণো
মখাঙ্গভূতোঽসি হবিস্ত্বমেব ।
পশুর্ভবান্ ঋত্বিগিজ্যং ত্বমেব
ত্বাং দেবসঙ্ঘা মুনয়ো য়জন্তি ॥ ৫৫.৩৯॥
য়দেতস্মিন্ জগধ্রুবং চলাচলং
সুরাদিকালানলসংস্থমুত্তমম্ ।
ন ত্বং বিভক্তোঽসি জনার্দনেশ
প্রয়চ্ছ সিদ্ধিং হৃদয়েপ্সিতাং মে ॥ ৫৫.৪০॥
নমঃ কমলপত্রাক্ষ মূর্ত্তামূর্ত্ত নমো হরে ।
শরণং ত্বাং প্রপন্নোঽস্মি সংসারান্মাং সমুদ্ধর ॥ ৫৫.৪১॥
এবং স্তুতস্তদা দেবস্তেন রাজ্ঞা মহাত্মনা ।
বিশালাম্রতলস্থেন তুতোষ পরমেশ্বরঃ ॥ ৫৫.৪২॥
কুব্জরূপী ততো ভূত্বা আজগাম হরিঃ স্বয়ম্ ।
তস্মিন্নাগতমাত্রে তু সীপ্যাম্রঃ কুব্জকোঽভবত্ ॥ ৫৫.৪৩॥
তং দৃষ্ট্বা মহদাশ্চর্যং স রাজা সংশিতব্রতঃ ।
বিশালস্য কথং কৌব্জ্যমিতি চিন্তাপরোভবত্ ॥ ৫৫.৪৪॥
তস্য চিন্তয়তো বুদ্ধির্বভৌ তং ব্রাহ্মণং প্রতি ।
অনেনাগতমাত্রেণ কৃতমেতন্ন সংশয়ঃ ॥ ৫৫.৪৫॥
তস্মাদেষৈব ভবিতা ভগবান্ পুরুষোত্তমঃ ।
এবমুক্ত্বা নমশ্চক্রে তস্য বিপ্রস্য স নৃপঃ ॥ ৫৫.৪৬॥
অনুগ্রহায় ভগবন্ নূনং ত্বং পুরুষোত্তমঃ ।
আগতোঽসি স্বরূপং মে দর্শয়স্বাধুনা হরে ॥ ৫৫.৪৭॥
এবমুক্তস্তদা দেবঃ শঙ্খচক্রগদাধরঃ ।
বভৌ তত্পুরতঃ সৌম্যো বাক্যং চেদমুবাচ হ ॥ ৫৫.৪৮॥
বরং বৃণীষ্ব রাজেন্দ্র য়ত্তে মনসি বর্ততে ।
ময়ি প্রসন্নে ত্রৈলোক্য তিলমাত্রমিদং নৃপ ॥ ৫৫.৪৯॥
এবমুক্তস্ততো রাজা হর্ষোত্ফুল্লিতলোচনঃ ।
মোক্ষং প্রয়চ্ছ দেবেশেত্যুক্ত্বা নোবাচ কিঞ্চন ॥ ৫৫.৫০॥
এবমুক্তঃ স ভগবান্ পুনর্বাক্যমুবাচ হ ।
ময়্যাগতে বিশালোঽয়মাম্রঃ কুব্জত্বমাগতঃ ।
য়স্মাত্ তস্মাত্ তীর্থমিদং কুব্জকাম্রং ভবিষ্যতি ॥ ৫৫.৫১॥
তির্যগ্যোন্যাদয়োঽপ্যস্মিন্ ব্রাহ্মণান্তা য়দি স্বকম্ ।
কলেবরং ত্যজিষ্যন্তি তেষাং পঞ্চশতানি চ ।
বিমানানি ভবিষ্যন্তি য়োগিনাং মুক্তিরেব চ ॥ ৫৫.৫২॥
এবমুক্ত্বা নৃপং দেবঃ শঙ্খাগ্রেণ জনার্দনঃ ।
পস্পর্শ স্পৃষ্টমাত্রোঽসৌ পরং নির্বাণমাপ্তবান্ ॥ ৫৫.৫৩॥
তস্মাত্ত্বমপি রাজেন্দ্র তং দেবং শরণং ব্রজ ।
য়েন ভূয়ঃ পুনঃ শোচ্যপদবীং নো প্রয়াস্যসি ॥ ৫৫.৫৪॥
য় ইদং শ্রৃণুয়ান্নিত্যং প্রাতরুত্থায় মানবঃ ।
পঠেদ্ য়শ্চরিতং তাভ্যাং মোক্ষধর্মার্থদো ভবেত্ ॥ ৫৫.৫৫॥
শুভব্রতমিদং পুণ্যং য়শ্চ কুর্যাজ্জনেশ্বর ।
স সর্বসম্পদং চেহ ভুক্ত্বেতে তল্লয়ং ব্রজেত্ ॥ ৫৫.৫৬॥
॥ ইতি শ্রীবরাহপুরাণে ভগবচ্ছাস্ত্রে পঞ্চপঞ্চাশোঽধ্যায়ঃ ॥ ৫৫॥
অগস্ত্য উবাচ ।
অতঃ পরং প্রবক্ষ্যামি ধন্যব্রতমনুত্তমম্ ।
য়েন সদ্যো ভবেদ্ ধন্য অধন্যোঽপি হি য়ো ভবেত্ ॥ ৫৬.১॥
মার্গশীর্ষে সিতে পক্ষে প্রতিপদ্ য়া তিথির্ভবেত্ ।
তস্যাং নক্তং প্রকুর্বীত বিষ্ণুমগ্নিং প্রপূজয়েত্ ॥ ৫৬.২॥
বৈশ্বানরায় পাদৌ তু অগ্নয়েত্যুদরং তথা ।
হবির্ভুঞ্জায় চ উরো দ্রবিণোদেতি বৈ ভুজো ॥ ৫৬.৩॥
সংবর্ত্তায়েতি চ শিরো জ্বলনায়েতি সর্বতঃ ।
অভ্যর্চ্যৈবং বিধানেন দেবদেবং জনার্দনম্ ॥ ৫৬.৪॥
তস্যৈব পুরতঃ কুণ্ডং কারয়িত্বা বিঘানতঃ ।
হোমং তত্র প্রকুর্বীত এভির্মন্ত্রৈর্বিচক্ষণঃ ॥ ৫৬.৫॥
ততঃ সংয়াবকং চান্নং ভুঞ্জীয়াদ্ ঘৃতসংয়ুতম্ ।
কৃষ্ণপক্ষেঽপ্যেবমেব চাতুর্মাস্যং তু য়াবতঃ ॥ ৫৬.৬॥
চৈত্রাদিষু চ ভুঞ্জীত পায়সং সঘৃতং বুধঃ ।
শ্রাবণাদিষু সক্তূংশ্চ ততশ্চৈতত্ সমাপ্যতে ॥ ৫৬.৭॥
সমাপ্তে তু ব্রতে বহ্নিং কাঞ্চনং কারয়েদ্ বুধঃ ।
রক্তবস্ত্রয়ুগচ্ছন্নং রক্তপুষ্পানুলেপনম্ ॥ ৫৬.৮॥
কুঙ্কুমেন তথা লিপ্য ব্রাহ্মণং দেবদেব চ ।
সর্বাবয়বসম্পূর্ণং ব্রাহ্মণং প্রিয়দর্শনম্ ॥ ৫৬.৯॥
পূজয়িত্বা বিধানেন রক্তবস্ত্রয়ুগেন চ ।
পশ্চাত্ তং দাপয়েত্ তস্য মন্ত্রেণানেন বুদ্ধিমান্ ॥ ৫৬.১০॥
ধন্যোঽস্মি ধন্যকর্মাঽস্মি ধন্যচেষ্টোঽস্মি ধন্যবান্ ।
ধন্যেনানেন চীর্ণেন ব্রতেন স্যাং সদা সুখী ॥ ৫৬.১১॥
এবমুচ্চার্য তং বিপ্রে ন্যস্য কোশং মহাত্মনঃ ।
সদ্যো ধন্যত্বমাপ্নোতি য়োঽপি স্যাদ্ ভাগ্যবর্জিতঃ ॥ ৫৬.১২॥
ইহ জন্মনি সৌভাগ্যং ধনং ধান্যং চ পুষ্কলম্ ।
অনেন কৃতমাত্রেণ জায়তে নাত্র সংশয়ঃ ॥ ৫৬.১৩॥
প্রাগ্জন্মজনিতং পাপমগ্নির্দহতি তস্য হ ।
দগ্ধে পাপে বিমুক্তাত্মা ইহ জন্মন্যসৌ ভবেত্ ॥ ৫৬.১৪॥
য়োঽপীদং শ্রৃণুয়ান্নিত্যং য়শ্চ ভক্ত্যা পঠেদ্ দ্বিজঃ ।
উভৌ তাবিহ লোকে তু ধন্যৌ সদ্যো ভবিষ্যতঃ ॥ ৫৬.১৫॥
শ্রূয়তে চ ব্রতং চৈতচ্চীর্ণমাসীন্মহাত্মনা ।
ধনদেন পুরা কল্পে শূদ্রয়োনৌ স্থিতেন তু ॥ ৫৬.১৬॥
॥ ইতি শ্রীবরাহপুরাণে ভগবচ্ছাস্ত্রে ষট্পঞ্চাশোঽধ্যায়ঃ ॥ ৫৬॥
অগস্ত্য উবাচ ।
অতঃ পরং প্রবক্ষ্যামি কান্তিব্রতমনুত্তমম্ ।
য়ত্কৃত্বা তু পুরা সোমঃ কান্তিমানভবত্ পুনঃ ॥ ৫৭.১॥
য়ক্ষ্মণা দক্ষশাপেন পুরাক্রান্তো নিশাকরঃ ।
এতচ্চীর্ত্বা ব্রতং সদ্যঃ কান্তিমানভবত্ কিল ॥ ৫৭.২॥
দ্বিতীয়ায়াং তু রাজেন্দ্র কার্ত্তিকস্য সিতে দিনে ।
নক্তং কুর্বীত য়ত্নেন অর্চয়ন্ বলকেশবম্ ॥ ৫৭.৩॥
বলদেবায় পাদৌ তু কেশবায় শিরোঽর্চয়েত্ ।
এবমভ্যর্চ্য মেধাবী বৈষ্ণবং রূপমুত্তমম্ ॥ ৫৭.৪॥
পরস্বরূপং সোমাখ্যং দ্বিকলং তদ্দিনে হি য়ত্ ।
তস্যার্ঘং দাপয়েদ্ ধীমান্ মন্ত্রেণ পরমেষ্ঠিনঃ ॥ ৫৭.৫॥
নমোঽস্ত্বমৃতরূপায় সর্বৌষধিনৃপায় চ ।
য়জ্ঞলোকাধিপতয়ে সোমায় পরমাত্মনে ॥ ৫৭.৬॥
অনেনৈব চ মার্গেণ দত্ত্বার্ঘ্যং পরমেষ্ঠিনঃ ।
রাত্রৌ সবিপ্রো ভুঞ্জীত য়বান্নং সঘৃতং নরঃ ॥ ৫৭.৭॥
ফাল্গুনাদিচতুষ্কে তু পায়সং ভোজয়েচ্ছুচিঃ ।
শালিহোমং তু কুর্বীত কার্ত্তিকে তু য়বৈস্তথা ॥ ৫৭.৮॥
আষাঢাদিচতুষ্কে তু তিলহোমং তু কারয়েত্ ।
তদ্বত্ তিলান্নং ভুঞ্জীত এষ এব বিধিক্রমঃ ॥ ৫৭.৯॥
ততঃ সংবত্সরে পূর্ণে শশিনং কৃতরাজতম্ ।
সিতবস্ত্রয়ুগচ্ছন্নং সিতপুষ্পানুলেপনম্ ।
এবমেব দ্বিজং পূজ্য ততস্তং প্রতিপাদয়েত্ ॥ ৫৭.১০॥
কান্তিমানপি লোকেঽস্মিন্ সর্বজ্ঞঃ প্রিয়দর্শনঃ ।
ত্বত্প্রসাদাত্ সোমরূপিন্ নারায়ণ নমোঽস্তু তে ॥ ৫৭.১১॥
অনেন কিল মন্ত্রেণ দত্ত্বা বিপ্রায় বাগ্যতঃ ।
দত্তমাত্রে ততস্তস্মিন্ কান্তিমান্ জায়তে নরঃ ॥ ৫৭.১২॥
আত্রেয়েণাপি সোমেন কৃতমেতত্ পুরা নৃপ ।
তস্য ব্রতান্তে সন্তুষ্টঃ স্বয়মেব জনার্দনঃ ।
য়ক্ষ্মাণমপনীয়াশু অমৃতাখ্যাং কলাং দদৌ ॥ ৫৭.১৩॥
তাং কলাং সোমরাজাঽসৌ তপসা লব্ধবানিতি ।
সোমত্বং চাগমত্ সোঽস্য ওষধীনাং পতির্বভৌ ॥ ৫৭.১৪॥
দ্বিতীয়ামশ্বিনৌ সোমভুজৌ কীর্ত্যেতে তদ্দিনে নৃপ ।
তৌ শেষবিষ্ণূ বিখ্যাতৌ মুখ্যপক্ষৌ ন সংশয়ঃ ॥ ৫৭.১৫॥
ন বিষ্ণোর্ব্যতিরিক্তং স্যাদ্ দৈবতং নৃপসত্তম ।
নামভেদেন সর্বত্র সংস্থিতঃ পরমেশ্বরঃ ॥ ৫৭.১৬॥
॥ ইতি শ্রীবরাহপুরাণে ভগবচ্ছাস্ত্রে সপ্তপঞ্চাশোঽধ্যায়ঃ ॥ ৫৭॥
অগস্ত্য উবাচ ।
অতঃ পরং মহারাজ সৌভাগ্যকরণং ব্রতম্ ।
শ্রৃণু য়েনাশু সৌভাগ্যং স্ত্রীপুংসামুপজায়তে ॥ ৫৮.১॥
ফাল্গুনস্য তু মাসস্য তৃতীয়া শুক্লপক্ষতঃ ।
উপাসিতব্যা নক্তেন শুচিনা সত্যবাদিনা ॥ ৫৮.২॥
সশ্রীকং চ হরিং পূজ্য রুদ্রং বা চোময়া সহ ।
য়া শ্রীঃ সা গিরিজা প্রোক্তা য়ো হরিঃ স ত্রিলোচনঃ ॥ ৫৮.৩॥
এবং সর্বেষু শাস্ত্রেষু পুরাণেষু চ পঠ্যতে ।
এতস্মাদন্যথা য়স্তু ব্রূতে শাস্ত্রং পৃথক্তয়া ॥ ৫৮.৪॥
রুদ্রো জনানাং মর্ত্যানাং কাব্যং শাস্ত্রং ন তদ্ভবেত্ ।
বিষ্ণুং রুদ্রকৃতং ব্রূয়াত্ শ্রীর্গৌরী ন তু পার্থিব ।
তন্নাস্তিকানাং মর্ত্যানাং কাব্যং জ্ঞেয়ং বিচক্ষণৈঃ ॥ ৫৮.৫॥
এবং জ্ঞাত্বা সলক্ষ্মীকং হরিং সম্পূজ্য ভক্তিতঃ ।
মন্ত্রেণানেন রাজেন্দ্র ততস্তং পরমেশ্বরম্ ॥ ৫৮.৬॥
গম্ভীরায়েতি পাদৌ তু সুভগায়েতি বৈ কটিম্ ।
উদরং দেবদেবেতি ত্রিনেত্রায়েতি বৈ মুখম্ ।
বাচস্পতয়ে চ শিরো রুদ্রায়েতি চ সর্বতঃ ॥ ৫৮.৭॥
এবমভ্যর্চ্য মেধাবী বিষ্ণুং লক্ষ্ম্যা সমন্বিতম্ ।
হরং বা গৌরিসংয়ুক্তং গন্ধপুষ্পাদিভিঃ ক্রমাত্ ॥ ৫৮.৮॥
ততস্তস্যাগ্রতো হোমং কারয়েন্মধুসর্পিষা ।
তিলৈঃ সহ মহারাজ সৌভাগ্যপতয়েতি চ ॥ ৫৮.৯॥
ততস্ত্বক্ষারবিরসং নিস্নেহং ধরণীতলে ।
গোধূমান্নং তু ভুঞ্জীত কৃষ্ণেপ্যেবং বিধিঃ স্মৃতঃ ।
আষাঢাদিদ্বিতীয়াং তু পারণং তত্র ভোজনম্ ॥ ৫৮.১০॥
য়বান্নং তু ততঃ পশ্চাত্ কার্ত্তিকাদিষু পার্থিব ।
শ্যামাকং তত্র ভুঞ্জীত ত্রীন্ মাসান্ নিয়তঃ শুচিঃ ॥ ৫৮.১১॥
ততো মাঘসিতে পক্ষে তৃতীয়ায়াং নরাধিপ ।
সৌবর্ণাং কারয়েদ্ গৌরীং রুদ্রং চৈকত্র বুদ্ধিমান্ ॥ ৫৮.১২॥
সলক্ষ্মীকং হরিং চাপি য়থাশক্ত্যা প্রসন্নধীঃ ।
ততস্তং ব্রাহ্মণে দদ্যাত্ পাত্রভূতে বিচক্ষণে ॥ ৫৮.১৩॥
অন্নেন হীনে বেদানাং পারগে সাধুবর্তিনি ।
সদাচারেতি বা দদ্যাদল্পবিত্তে বিশেষতঃ ॥ ৫৮.১৪॥
ষড্ভিঃ পাত্রৈরুপেতং তু ব্রাহ্মণায় নিবেদয়েত্ ।
একং মধুময়ং পাত্রং দ্বিতীয়ং ঘৃতপূরিতম্ ॥ ৫৮.১৫॥
তৃতীয়ং তিলতৈলস্য চতুর্থং গুডসংয়ুতম্ ।
পঞ্চমং লবণৈঃ পূর্ণং ষষ্ঠং গোক্ষীরসংয়ুতম্ ॥ ৫৮.১৬॥
এতানি দত্ত্বা পাত্রাণি সপ্তজন্মান্তরং ভবেত্ ।
সুভগো দর্শনীয়শ্চ নারী বা পুরুষোঽপি বা ॥ ৫৮.১৭॥
॥ ইতি শ্রীবরাহপুরাণে ভগবচ্ছাস্ত্রে অষ্টপঞ্চাশোঽধ্যায়ঃ ॥ ৫৮॥
অগস্ত্য উবাচ ।
অথাবিঘ্নকরং রাজন্ কথয়ামি শ্রৃণুষ্ব মে ।
য়েন সম্যক্ কৃতেনাপি ন বিঘ্নমুপজায়তে ॥ ৫৯.১॥
চতুর্থ্যাং ফাল্গুনে মাসি গ্রহীতব্যং ব্রতং ত্বিদম্ ।
নক্তাহারেণ রাজেন্দ্র তিলান্নং পারণং স্মৃতম্ ।
তদেবাগ্নৌ তু হোতব্যং ব্রাহ্মণায় চ তদ্ ভবেত্ ॥ ৫৯.২॥
চাতুর্মাস্যং ব্রতং চৈতত্ কৃত্বা বৈ পঞ্চ মে তথা ।
সৌবর্ণং গজবক্ত্রং তু কৃত্বা বিপ্রায় দাপয়েত্ ॥ ৫৯.৩॥
পায়সৈঃ পঞ্চভিঃ পাত্রৈরুপেতং তু তিলৈস্তথা ।
এবং কৃত্বা ব্রতং চৈতত্ সর্ববিঘ্নৈর্বিমুচ্যতে ॥ ৫৯.৪॥
হয়মেধস্য বিঘ্নে তু সঞ্জাতে সগরঃ পুরা ।
এতদেব চরিত্বা তু হয়মেধং সমাপ্তবান্ ॥ ৫৯.৫॥
তথা রুদ্রেণ দেবেন ত্রিপুরং নিঘ্নতা পুরা ।
এতদেব কৃতং তস্মাত্ ত্রিপুরং তেন পাতিতম্ ।
ময়া সমুদ্রং পিবতা এতদেব কৃতং ব্রতম্ ॥ ৫৯.৬॥
অন্যৈরপি মহীপালৈরেতদেব কৃতং পুরা ।
তপোঽর্থিভির্জ্ঞানকৃতৈর্নির্বিঘ্নার্থে পরন্তপ ॥ ৫৯.৭॥
শূরায় ধীরায় গজাননায়
লম্বোদরায়ৈকদংষ্ট্রায় চৈব ।
এবং পূজ্যস্তদ্দিনে তত্ পুনশ্চ
হোমং কুর্যাদ্ বিঘ্নবিনাশহেতোঃ ॥ ৫৯.৮॥
অনেন কৃতমাত্রেণ সর্ববিঘ্নৈর্বিমুচ্যতে ।
বিনায়কস্য কৃপয়া কৃতকৃত্যো নরো ভবেত্ ॥ ৫৯.৯॥
॥ ইতি শ্রীবরাহপুরাণে ভগবচ্ছাস্ত্রে নবপঞ্চাশোঽধ্যায়ঃ ॥ ৫৯॥
অগস্ত্য উবাচ ।
শান্তিব্রতং প্রবক্ষ্যামি তব রাজন্ শ্রৃণুষ্ব তত্ ।
য়েন চীর্ণেন শান্তিঃ স্যাত্ সর্বদা গৃহমেধিনাম্ ॥ ৬০.১॥
পঞ্চম্যাং শুক্লপক্ষস্য কার্ত্তিকে মাসি সুব্রত ।
আরভেদ্ বর্ষমেকং তু ভুঞ্জীয়াদম্লবর্জিতম্ ॥ ৬০.২॥
নক্তং দেবং তু সম্পূজ্য হরিং শেষোপরি স্থিতম্ ।
অনন্তায়েতি পাদৌ তু বাসুকায়েতি বৈ কটিম্ ॥ ৬০.৩॥
তক্ষকায়েতি জঠরমুরঃ কর্কোটকায় চ ।
পদ্মায় কণ্ঠং সম্পূজ্য মহাপদ্মায় দোর্যুগম্ ॥ ৬০.৪॥
শঙ্খপালায় বক্ত্রং তু কুটিলায়েতি বৈ শিরঃ ।
এবং বিষ্ণুগতং পূজ্য পৃথক্ত্বেন চ পূজয়েত্ ॥ ৬০.৫॥
ক্ষীরেণ স্নপনং কুর্যাত্ তানুদ্দিশ্য হরেঃ পুনঃ ।
তদগ্রে হোময়েত্ ক্ষীরং তিলৈঃ সহ বিচক্ষণঃ ॥ ৬০.৬॥
এবং সংবত্সরস্যান্তে কুর্যাদ্ ব্রাহ্মণভোজনম্ ।
নাগং তু কাঞ্চনং কুর্যাদ্ ব্রাহ্মণায় নিবেদয়েত্ ॥ ৬০.৭॥
এবং য়ঃ কুরুতে ভক্ত্যা ব্রতমেতন্নরাধিপঃ ।
তস্য শান্তির্ভবেন্নিত্যং নাগানাং ন ভয়ং তথা ॥ ৬০.৮॥
॥ ইতি শ্রীবরাহপুরাণে ভগবচ্ছাস্ত্রে ষষ্টিতমোঽধ্যায়ঃ ॥ ৬০॥
অগস্ত্য উবাচ ।
কামব্রতং মহারাজ শ্রৃণু মে গদতোঽধুনা ।
য়েন কামাঃ সমৃদ্ধ্যন্তে মনসা চিন্তিতা অপি ॥ ৬১.১॥
ষষ্ঠ্যাং ফলাশনো য়স্তু বর্ষমেকং ব্রতং চরেত্ ।
পৌষমাসসিতে পক্ষে চতুর্থ্যাং কৃতভোজনঃ ॥ ৬১.২॥
ষষ্ঠ্যাং তু পারয়েদ্ ধীমান্ প্রথমং তু ফলং নৃপ ।
ততো ভুঞ্জীত য়ত্নেন বাগ্যতঃ শুদ্ধমোদনম্ ॥ ৬১.৩॥
ব্রাহ্মণৈঃ সহ রাজেন্দ্র অথবা কেবলৈঃ ফলৈঃ ।
তমেকং দিবসং স্থিত্বা সপ্তম্যাং পারয়েন্নৃপ ॥ ৬১.৪॥
অগ্নিকার্যং তু কুর্বীত গুহরূপেণ কেশবম্ ।
পূজয়িত্বাভিধানেন বর্ষমেকং ব্রতং চরেত্ ॥ ৬১.৫॥
ষড্বক্ত্র কার্ত্তিক গুহ সেনানী কৃত্তিকাসুত ।
কুমার স্কন্দ ইত্যেবং পূজ্যো বিষ্ণুঃ স্বনামভিঃ ॥ ৬১.৬॥
সমাপ্তৌ তু ব্রতস্যাস্য কুর্যাদ্ ব্রাহ্মণভোজনম্ ।
ষণ্মুখং সর্বসৌবর্ণং ব্রাহ্মণায় নিবেদয়েত্ ॥ ৬১.৭॥
সর্বে কামাঃ সমৃদ্ধ্যন্তাং মম দেব কুমারক ।
ত্বত্প্রসাদাদিমং ভক্ত্যা গৃহ্যতাং বিপ্র মাচিরম্ ॥ ৬১.৮॥
অনেন দত্ত্বা মন্ত্রেণ ব্রাহ্মণায় সয়ুগ্মকম্ ।
ততঃ কামাঃ সমৃদ্ধ্যন্তে সর্বে বৈ ইহ জন্মনি ॥ ৬১.৯॥
অপুত্রো লভতে পুত্রমধনো লভতে ধনম্ ।
ভ্রষ্টরাজ্যো লভেদ্ রাজ্যং নাত্র কার্যা বিচারণা ॥ ৬১.১০॥
এতদ্ ব্রতং পুরা চীর্ণং নলেন নৃপসত্তম ।
ঋতুপর্ণস্য বিষয়ে বসতা ব্রতচর্যয়া ॥ ৬১.১১॥
তথা রাজ্যচ্যুতৈরন্যৈর্বহুভির্নৃপসত্তমৈঃ ।
পৌরাণিকং ব্রতং চৈব সিদ্ধ্যর্থং নৃপসত্তম ॥ ৬১.১২॥
॥ ইতি শ্রীবরাহপুরাণে ভগবচ্ছাস্ত্রে একষষ্টিতমোঽধ্যায়ঃ ॥ ৬১॥
অগস্ত্য উবাচ ।
অথাপরং মহারাজ ব্রতমারোগ্যসঞ্জ্ঞিতম্ ।
কথয়ামি পরং পুণ্যং সর্বপাপপ্রণাশনম্ ॥ ৬২.১॥
তস্যৈব মাঘমাসস্য সপ্তম্যাং সমুপোষিতঃ ।
পূজয়েদ্ ভাস্করং দেবং বিষ্ণুরূপং সনাতনম্ ॥ ৬২.২॥
আদিত্য ভাস্কর রবে ভানো সূর্য দিবাকর ।
প্রভাকরেতি সম্পূজ্য এবং সম্পূজ্যতে রবিঃ ॥ ৬২.৩॥
ষষ্ঠ্যাং চৈব কৃতাহারঃ সপ্তম্যাং ভানুমর্চয়েত্ ।
অষ্টম্যাং চৈব ভুঞ্জীত এষ এব বিধিক্রমঃ ॥ ৬২.৪॥
অনেন বত্সরং পূর্ণং বিধিনা য়োঽর্চয়েদ্ রবিম্ ।
তস্যারোগ্যং ধনং ধান্যমিহ জন্মমি জায়তে ।
পরত্র চ শুভং স্থানং য়দ্ গত্বা ন নিবর্ততে ॥ ৬২.৫॥
সার্বভৌমঃ পুরা রাজা অনরণ্যো মহাবলঃ ।
তেনায়মর্চিতো দেবো ব্রতেনানেন পার্থিব ।
তস্য তুষ্টো বরং দেবঃ প্রাদাদারোগ্যমুত্তমম্ ॥ ৬২.৬॥
ভদ্রাশ্ব উবাচ ।
কিমসৌ রোগবান্ রাজা য়েনারোগ্যমবাপ্তবান্ ।
সার্বভৌমস্য চ কথং ব্রহ্মন্ রোগস্য সম্ভবঃ ॥ ৬২.৭॥
অগস্ত্য উবাচ ।
স রাজা সার্বভৌমোঽভূদ্ য়শস্বী চ সুরূপবান্ ।
স কদাচিন্নৃপশ্রেষ্ঠো নৃপশ্রেষ্ঠ মহাবলঃ ॥৬২.৮॥
গতবান্ মানসং দিব্যং সরো দেবগণান্বিতম্ ।
তত্রাপশ্যদ্ বৃহদ্ পদ্মং সরোমধ্যগতং সিতম্ ॥ ৬২.৯॥
তত্র চাঙ্গুষ্ঠমাত্রং তু স্থিতং পুরুষসত্তমম্ ।
রক্তবাসোভিরাছন্নং দ্বিভুজং তিগ্মতেজসম্ ॥ ৬২.১০॥
তং দৃষ্ট্বা সারথিং প্রাহ পদ্মমেতত্ সমানয় ।
ইদং তু শিরসা বিভ্রত্ সর্বলোকস্য সন্নিধৌ ।
শ্লাঘনীয়ো ভবিষ্যামি তস্মাদাহর মাচিরম্ ॥ ৬২.১১॥
এবমুক্তস্তদা তেন সারথিঃ প্রবিবেশ হ ।
গ্রহীতুমুপচক্রাম তং পদ্মং নৃপসত্তম ॥ ৬২.১২॥
স্পৃষ্টমাত্রে ততঃ পদ্মে হুঙ্কারঃ সমজায়ত ।
তেন শব্দেন স ত্রস্তঃ পপাত চ মমার চ ॥ ৬২.১৩॥
রাজা চ তত্ক্ষণাত্ তেন শব্দেন সমপদ্যত ।
কুষ্ঠী বিগতবর্ণশ্চ বলবীর্যবিবর্জিতঃ ॥ ৬২.১৪॥
তথাগতমথাত্মানং দৃষ্ট্বা স পুরুষর্ষভঃ ।
তস্থৌ তত্রৈব শোকার্ত্তঃ কিমেতদিতি চিন্তয়ন্ ॥ ৬২.১৫॥
তস্য চিন্তয়তো ধীমানাজগাম মহাতপাঃ ।
বসিষ্ঠো ব্রহ্মপুত্রোঽথ তং স পপ্রচ্ছ পার্থিবম্ ॥ ৬২.১৬॥
কথং তে রাজশার্দূল তব দেহস্য শাসনম্ ।
ইদানীমেব কিং কার্যং তন্মমাচক্ষ্ব পৃচ্ছতঃ ॥ ৬২.১৭॥
এবমুক্তস্ততো রাজা বসিষ্ঠেন মহাত্মনা ।
সর্বং পদ্মস্য বৃত্তান্তং কথয়ামাস স প্রভুঃ ॥ ৬২.১৮॥
তং শ্রুত্বা স মুনিস্তত্র সাধু রাজন্নথাব্রবীত্ ।
অসাধুরথ বা তিষ্ঠ তস্মাত্ কুষ্ঠিত্বমাগতঃ ॥ ৬২.১৯॥
এবমুক্তস্তদা রাজা বেপমানঃ কৃতাঞ্জলিঃ ।
পপ্রচ্ছ সাধ্বহং বিপ্র কথং বাঽসাধ্বহং মুনে ।
কথং চ কুষ্ঠং মে জাতমেতন্মে বক্তুমর্হসি ॥ ৬২.২০॥
বসিষ্ঠ উবাচ ।
এতদ্ ব্রহ্মোদ্ভবং নাম পদ্মং ত্রৈলোক্যবিশ্রুতম্ ।
দৃষ্টমাত্রেণ চানেন দৃষ্টাঃ স্যুঃ সর্বদেবতাঃ ।
এতস্মিন্ দৃশ্যতে চৈতত্ ষণ্মাসং ক্বাপি পার্থিব ॥ ৬২.২১॥
এতস্মিন্ দৃষ্টমাত্রে তু য়ো জলং বিশতে নরঃ ।
সর্বপাপবিনির্মুক্তঃ পরং নির্বাণমর্হতি ॥ ৬২.২২॥
ব্রহ্মণঃ প্রাগবস্থায়া মূর্তিরপ্সু ব্যবস্থিতা ।
এতাং দৃষ্ট্বা জলে মগ্নঃ সংসারাদ্ বিপ্রমুচ্যতে ॥ ৬২.২৩॥
ইমং চ দৃষ্ট্বা তে সূতো জলে মগ্নো নরোত্তম ।
প্রবিষ্টশ্চ পুনরিমং হর্তুমিচ্ছন্নরাধিপ ।
প্রাপ্তবানসি দুর্বুদ্ধে কুষ্ঠিত্বং পাপপূরুষ ॥ ৬২.২৪॥
দৃষ্টমেতত্ ত্বয়া য়স্মাত্ ত্বং সাধ্বিতি ততঃ প্রভো ।
ময়োক্তো মোহমাপন্নস্তেনাসাধুরিতীরিতঃ ॥ ৬২.২৫॥
ব্রহ্মপুত্রো হ্যহং চেমং পশ্যামি পরমেশ্বরম্ ।
অহন্যহনি চাগচ্ছংস্তং পুনর্দৃষ্টবানসি ॥ ৬২.২৬॥
দেবা অপি বদন্ত্যেতে পদ্মং কাঞ্চনমুত্তমম্ ।
মানসে ব্রহ্মপদ্মং তু দৃষ্ট্বা চাত্র গতং হরিম্ ।
প্রাপ্স্যামস্তত্ পরং ব্রহ্ম য়দ্ গত্বা ন পুনর্ভবেত্ ॥ ৬২.২৭॥
ইদং চ কারণং চান্যত্ কুষ্ঠস্য শ্রৃণু পার্থিব ।
আদিত্যঃ পদ্মগর্ভেঽস্মিন্ স্বয়মেব ব্যবস্থিতঃ ॥ ৬২.২৮॥
তং দৃষ্ট্বা তত্ত্বতো ভাবঃ পরমাত্মৈষ শাশ্বতঃ ।
ধারয়ামি শিরস্যেনং লোকমধ্যে বিভূষণম্ ॥ ৬২.২৯॥
এবং তে জল্পতা পাপমিদং দেবেন দর্শিতম্ ।
ইদানীমিমমেব ত্বমারাধয় মহামতে ॥ ৬২.৩০॥
অগস্ত্য উবাচ ।
এবমুক্ত্বা বসিষ্ঠস্তু ইমমেব ব্রতং তদা ।
আদিত্যারাধনং দিব্যমারোগ্যাখ্যং জগাদ হ ॥ ৬২.৩১॥
সোঽপি রাজাঽকরোচ্চেমং ব্রতং ভক্তিসমন্বিতঃ ।
সিদ্ধিং চ পরমাং প্রাপ্তো বিরোগশ্চাভবত্ ক্ষণাত্ ॥ ৬২.৩২॥
॥ ইতি শ্রীবরাহপুরাণে ভগবচ্ছাস্ত্রে দ্বিষষ্টিতমোঽধ্যায়ঃ ॥ ৬২॥
অগস্ত্য উবাচ ।
অথাপরং মহারাজ পুত্রপ্রাপ্তিব্রতং শুভম্ ।
কথয়ামি সমাসেন তন্মে নিগদতঃ শ্রৃণু ॥ ৬৩.১॥
মাসে ভাদ্রপদে য়া তু কৃষ্ণপক্ষে নরেশ্বর ।
অষ্টম্যামুপবাসেন পুত্রপ্রাপ্তিব্রতং হি তত্ ॥ ৬৩.২॥
ষষ্ঠ্যাং চৈব তু সঙ্কল্প্য সপ্তম্যামর্চয়েদ্ হরিম্ ।
দেবক্যুত্সঙ্গগং দেবং মাতৃভিঃ পরিবেষ্টিতম্ ॥ ৬৩.৩॥
প্রভাতে বিমলেঽষ্টম্যামর্চয়েত্ প্রয়তো হরিম্ ।
প্রাগ্বিধানেন গোবিন্দমর্চয়িত্বা বিধানতঃ ॥ ৬৩.৪॥
ততো য়বৈঃ কৃষ্ণতিলৈঃ সঘৃতৈর্হোময়েদ্ দধি ।
ব্রাহ্মণান্ ভোজয়েদ্ ভক্ত্যা য়থাশক্ত্যা সদক্ষিণান্ ॥ ৬৩.৫॥
ততঃ স্বয়ং তু ভুঞ্জীত প্রথমং বিল্বমুত্তমম্ ।
পশ্চাদ্ য়থেষ্টং ভুঞ্জীত স্নেহৈঃ সর্বরসৈর্যুতম্ ॥ ৬৩.৬॥
প্রতিমাসমনেনৈব বিধিনোপোষ্য মানবঃ ।
কৃষ্ণাষ্টমীমপুত্রোঽপি লভেত্ পুত্রং ন সংশয়ঃ ॥ ৬৩.৭॥
শ্রূয়তে চ পুরা রাজা শূরসেনঃ প্রতাপবান্ ।
স হ্যপুত্রস্তপস্তেপে হিমবত্পর্বতোত্তমে ॥ ৬৩.৮॥
তস্যৈবং কুর্বতো দেবো ব্রতমেতজ্জগাদ হ ।
সোঽপ্যেতত্ কৃতবান্ রাজা পুত্রং চৈবোপলব্ধবান্ ॥ ৬৩.৯॥
বসুদেবং মহাভাগমনেকক্রতুয়াজিনম্ ।
তং লব্ধ্বা সোঽপি রাজর্ষিঃ পরং নির্বাণমাপত্বান্ ॥ ৬৩.১০॥
এবং কৃষ্ণাষ্টমী রাজন্ ময়া তে পরিকীর্তিতা ।
সংবত্সরান্তে দাতব্যং কৃষ্ণয়ুগ্মং দ্বিজাতয়ে ॥ ৬৩.১১॥
এতত্ পুত্রব্রতং নাম ময়া তে পরিকীর্তিতম্ ।
এতত্ কৃত্বা নরঃ পাপৈঃ সর্বৈরেব প্রমুচ্যতে ॥ ৬৩.১২॥
॥ ইতি শ্রীবরাহপুরাণে ভগবচ্ছাস্ত্রে ত্রিষষ্টিতমোঽধ্যায়ঃ ॥ ৬৩॥
অগস্ত্য উবাচ ।
অথাপরং প্রবক্ষ্যামি শৌর্যব্রতমনুত্তমম্ ।
য়েন ভীরোরপি মহচ্ছৌর্যং ভবতি তত্ক্ষণাত্ ॥ ৬৪.১॥
মাসি চাশ্বয়ুজে শুদ্ধাং নবমীং সমুপোষয়েত্ ।
সপ্তম্যাং কৃতসঙ্কল্পঃ স্থিত্বাঽষ্টম্যাং নিরোদনঃ ॥ ৬৪.২॥
নবম্যাং পারয়েত্ পিষ্টং প্রথমং ভক্তিতো নৃপ ।
ব্রাহ্মণান্ ভোজয়েদ্ ভক্ত্যা দেবীং চৈব তু পূজয়েত্ ।
দুর্গাং দেবীং মহাভাগাং মহামায়াং মহাপ্রভাম্ ॥ ৬৪.৩॥
এবং সংবত্সরং য়াবদুপোষ্যেতি বিধানতঃ ।
ব্রতান্তে ভোজয়েদ্ ধীমান্ য়থাশক্ত্যা কুমারিকাঃ ॥ ৬৪.৪॥
হেমবস্ত্রাদিভিস্তাস্তু ভূষয়িত্বা তু শক্তিতঃ ।
পশ্চাত্ ক্ষমাপয়েত্ তাস্তু দেবী মে প্রীয়তামিতি ॥ ৬৪.৫॥
এবং কৃতে ভ্রষ্টরাজ্যো লভেদ্ রাজ্যং ন সংশয়ঃ ।
অবিদ্যো লভতে বিদ্যাং ভীতঃ শৌর্যং চ বিদন্তি ॥ ৬৪.৬॥
॥ ইতি শ্রীবরাহপুরাণে ভগবচ্ছাস্ত্রে চতুঃষষ্টিতমোঽধ্যায়ঃ ॥ ৬৪॥
অগস্ত্য উবাচ ।
সার্বভৌমব্রতং চান্যত্ কথয়ামি সমাসতঃ ।
য়েন সম্যক্কৃতেনাশু সার্বভৌমো নৃপো ভবেত্ ॥ ৬৫.১॥
কার্তিকস্য তু মাসস্য দশমী শুক্লপক্ষিকা ।
তস্যাং নক্তাশনো নিত্যং দিক্ষু শুদ্ধবলিং হরেত্ ॥ ৬৫.২॥
বিচিত্রৈঃ কুসুমৈর্ভক্ত্যা পূজয়িত্বা দ্বিজোত্তমান্ ।
দিশাং তু প্রার্থনাং কুর্যান্ মন্ত্রেণানেন সুব্রতঃ ।
সর্বা ভবন্ত্যঃ সিদ্ধ্যন্তু মম জন্মনি জন্মনি ॥ ৬৫.৩॥
এবমুক্ত্বা বলিং তাসু দত্ত্বা শুদ্ধেন চেতসা ।
ততো রাত্রৌ তু ভুঞ্জীত দধ্যন্নং তু সুসংস্কৃতম্ ॥ ৬৫.৪॥
পূর্বং পশ্চাদ্ য়থেষ্টং তু এবং সংবত্সরং নৃপ ।
য়ঃ করোতি নরো নিত্যং তস্য দিগ্বিজয়ো ভবেত্ ॥ ৬৫.৫॥
একাদশ্যাং তু য়ত্নেন নরঃ কুর্যাদ্ য়থাবিধি ।
মার্গশীর্ষে শুক্লপক্ষাদারভ্যাব্দং বিচক্ষণঃ ।
তদ্ ব্রত ধনদস্যেষ্টং কৃতং বিত্তং প্রয়চ্ছতি ॥ ৬৫.৬॥
একাদশ্যাং নিরাহারো য়ো ভুঙ্ক্তে দ্বাদশীদিনে ।
শুক্লে বাঽপ্যথবা কৃষ্ণে তদ্ ব্রতং বৈষ্ণবং মহত্ ॥ ৬৫.৭॥
এবং চীর্ণ সুঘোরাণি হন্তি পাপানি রপার্থিব ।
ত্রয়োদশ্যাং তু নক্তেন ধর্মব্রতমথোচ্যতে ॥ ৬৫.৮॥
শুক্লপক্ষে ফাল্গুনস্য তথারভ্য বিচক্ষণঃ ।
রৌদ্রং ব্রতং চতুর্দশ্যাং কৃষ্ণপক্ষে বিশেষতঃ ।
মাঘমাসাদথারভ্য পূর্ণং সংবত্সরং নৃপ ॥ ৬৫.৯॥
ইন্দুব্রতং পঞ্চদশ্যাং শুক্লায়াং নক্তভোজনম্ ।
পিতৃব্রতমমাবাস্যামিতি রাজন তথেরিতম্ ॥ ৬৫.১০॥
দশ পঞ্চ চ বর্ষাণি য় এবং কুরুতে নৃপ ।
তিথিব্রতানি কস্তস্য ফলং ব্রতপ্রমাণতঃ ॥ ৬৫.১১॥
অশ্বমেধসহস্ত্রাণি রাজসূয়শতানি চ ।
য়ষ্টানি তেন রাজেন্দ্র কল্পোক্তাঃ ক্রতবস্তথা ॥ ৬৫.১২॥
একমেব কৃতং হন্তি ব্রতং পাপানি নিত্যশঃ ।
য়ঃ পুনঃ সর্বমেতদ্ধি কুর্যান্নরবরাত্মজ ।
স শুদ্ধো বিরজো লোকানাপ্নোতি সকলং নৃপ ॥ ৬৫.১৩॥
॥ ইতি শ্রীবরাহপুরাণে ভগবচ্ছাস্ত্রে পঞ্চষষ্টিতমোঽধ্যায়ঃ ॥ ৬৫॥
ভদ্রাশ্ব উবাচ ।
আশ্চর্যং য়দি তে কিঞ্চিদ্ বিদিতং দৃষ্টমেব বা ।
তন্মে কথয় ধর্মজ্ঞ মম কৌতূহলং মহত্ ॥ ৬৬.১॥
অগস্ত্য উবাচ ।
আশ্চর্যভূতো ভগবানেষ এব জনার্দনঃ ।
তস্যাশ্চর্যাণি দৃষ্টানি বহূনি বিবিধানি বৈ ॥ ৬৬.২॥
শ্বেতদ্বীপং গতঃ পূর্বং নারদঃ কিল পার্থিব ।
সোঽপশ্যচ্ছঙ্খচক্রাব্জান্ পুরুষাংস্তিগ্মতেজসঃ ॥ ৬৬.৩॥
অয়ং বিষ্ণুরয়ং বিষ্ণুরেষ বিষ্ণুঃ সনাতনঃ ।
চিন্তাঽভূত্তস্যতান্দৃষ্ট্বা কোঽস্মিন্বিষ্ণুরিতি প্রভুঃ ॥ ৬৬.৪॥
এবং চিন্তয়তস্তস্য চিন্তা কৃষ্ণং প্রতি প্রভো ।
আরাধয়ামি চ কথং শঙ্খচক্রগদাধরম্ ॥ ৬৬.৫॥
য়েন বেদ্মি পরং তেষাং দেবো নারায়ণঃ প্রভুঃ ।
এবং সঞ্চিন্ত্য দধ্যৌ স তং দেবং পরমেশ্বরম্ ॥ ৬৬.৬॥
দিব্যং বর্ষসহস্ত্রং তু সাগ্রং ব্রহ্মসুতস্তদা ।
ধ্যায়তস্তস্য দেবোঽসৌ পরিতোষং জগাম হ ॥ ৬৬.৭॥
উবাচ চ প্রসন্নাত্মা প্রত্যক্ষত্বং গতঃ প্রভুঃ ।
বরং ব্রহ্মসুত ব্রূহি কিং তে দদ্মি মহামুনে ॥ ৬৬.৮॥
নারদ উবাচ ।
সহস্ত্রমেকং বর্ষাণাং ধ্যাতস্ত্বং ভুবনেশ্বর ।
ত্বত্প্রাপ্তির্যেন তদ্ ব্রূহি য়দি তুষ্টোঽসি মেঽচ্যুত ॥ ৬৬.৯॥
দেবদেব উবাচ ।
পৌরুষং সূক্তমাস্থায় য়ে য়জন্তি দ্বিজাস্তু মাম্ ।
সংহিতামাদ্যমাস্থায় তে মাং প্রাপ্স্যন্তি নারদ ॥ ৬৬.১০॥
অলাভে বেদশাস্ত্রাণাং পঞ্চরাত্রোদিতেন হ ।
মার্গেণ মাং প্রপশ্যন্তে তে মাং প্রাপ্স্যন্তি মানবাঃ ॥ ৬৬.১১॥
ব্রাহ্মণক্ষত্রিয়বিশাং পঞ্চরাত্রং বিধীয়তে ।
শূদ্রাদীনাং ন তচ্ছ্রোত্রপদবীমুপয়াস্যতি ॥ ৬৬.১২॥
এবং ময়োক্তং বিপ্রেন্দ্র পুরাকল্পে পুরাতনম্ ।
পঞ্চরাত্রং সহস্ত্রাণাং য়দি কশ্চিদ্ গ্রহীষ্যতি ॥ ৬৬.১৩॥
কর্মক্ষয়ে চ মাং কশ্চিদ্ য়দি ভক্তো ভবিষ্যতি ।
তস্য চেদং পঞ্চরাত্রং নিত্যং হৃদি বসিষ্যতি ॥ ৬৬.১৪॥
ইতরে রাজসৈর্ভাবৈস্তামসৈশ্চ সমাবৃতাঃ ।
ভবিষ্যন্তি দ্বিজশ্রেষ্ঠ মচ্ছাসনপরাঙ্মুখাঃ ॥ ৬৬.১৫॥
কৃতং ত্রেতা দ্বাপরং চ য়ুগানি ত্রীণি নারদ ।
সত্ত্বস্থাং মাং সমেষ্যন্তি কলৌ রজস্তমোঽধিকাঃ ॥ ৬৬.১৬॥
অন্যচ্চ তে বরং দদ্মি শ্রৃণু নারদ সাম্প্রতম্ ।
য়দিদং পঞ্চরাত্রং মে শাস্ত্রং পরমদুর্লভম্ ।
তদ্ভবান্ বেত্স্যতে সর্বং মত্প্রসাদান্ন সংশয়ঃ ॥ ৬৬.১৭॥
বেদেন পঞ্চরাত্রেণ ভক্ত্যা য়জ্ঞেন চ দ্বিজ ।
প্রাপ্যোঽহং নান্যথা বত্স বর্ষকোট্যায়ুতৈরপি ॥ ৬৬.১৮॥
এবমুক্ত্বা স ভগবান্ নারদং পরমেশ্বরঃ ।
জগামাদর্শনং সদ্যো নারদোঽপি য়য়ৌ দিবম্ ॥ ৬৬.১৯॥
॥ ইতি শ্রীবরাহপুরাণে ভগবচ্ছাস্ত্রে ষট্ষষ্টিতমোঽধ্যায়ঃ ॥ ৬৬॥
ভদ্রাশ্ব উবাচ ।
ভগবন্ সিতকৃষ্ণে দ্বে ভিন্নে জগতি কেশবান্ ।
স্ত্রিয়ৌ বভূবতুঃ কে দ্বে সিতকৃষ্ণা চ কা শুভা ॥ ৬৭.১॥
কশ্চাসৌ পুরুষো ব্রহ্মন্ য় একঃ সপ্তধা ভবেত্ ।
কোঽসৌ দ্বাদশধা বিপ্র দ্বিদেহঃ ষট্শিরাঃ শুভঃ ॥ ৬৭.২॥
দম্পত্যং চ দ্বিজশ্রেষ্ঠ কৃতসূর্যোদয়াদনম্ ।
কস্মাদেতজ্জগদিদং বিততং দ্বিজসত্তম ॥ ৬৭.৩॥
অগস্ত্য উবাচ ।
সিতকৃষ্ণে স্ত্রিয়ৌ য়ে তে তে ভগিন্যৌ প্রকীর্তিতে ।
সত্যাসত্যে দ্বিবর্ণা চ নারী রাত্রিরুদাহৃতা ॥ ৬৭.৪॥
য়ঃ পুমান্ সপ্তধা জাত একো ভূত্বা নরেশ্বর ।
স সমুদ্রস্তু বিজ্ঞেয়ঃ সপ্তধৈকো ব্যবস্থিতঃ ॥ ৬৭.৫॥
য়োঽসৌ দ্বাদশধা রাজন্ দ্বিদেহঃ ষট্শিরাঃ প্রভুঃ ।
সংবত্সরঃ স বিজ্ঞেয়ঃ শরীরে দ্বে গতী স্মৃতে ।
ঋতবঃ ষট্ চ বক্ত্রাণি এষ সংবত্সরঃ স্মৃতঃ ॥ ৬৭.৬॥
দম্পত্যং তদহোরাত্রং সূর্যাচন্দ্রমসৌ ততঃ ।
ততো জগত্ সমুত্তস্থৌ দেবস্যাস্য নৃপোত্তম ॥ ৬৭.৭॥
স বিষ্ণুঃ পরমো দেবো বিজ্ঞেয়ো নৃপসত্তম ।
ন চ বেদক্রিয়াহীনঃ পশ্যতে পরমেশ্বরম্ ॥ ৬৭.৮॥
॥ ইতি বরাহপুরাণে ভগবচ্ছাস্ত্রে সপ্তষষ্টিতমোঽধ্যায়ঃ ॥ ৬৭॥
ইতি শ্রীঅগস্ত্যগীতা সমাপ্তা ।
